ពិធីបើកវគ្គបណ្តុះបណ្តាលថ្នាក់ពិសេសមធ្យមសុរិយោដីជំនាន់ទី៣ និងពីធីប្រគល់សញ្ញាបត្រដល់សិក្សាការីនៃវគ្គបណ្តុះបណ្តាលថ្នាក់ពិសេសមធ្យមសុរិយោដីជំនាន់ទី ២ ក្រោមអធិបតីភាពដ៏ខ្ពង់ខ្ពស់ ឯកឧត្តមទេសរដ្ឋមន្រ្តី អ៊ឹម ឈុនលឹម រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់

កាលពីព្រឹកថ្ងៃទី២៧ ខែមីនា ឆ្នាំ២០១២នេះ នៅទីស្តីការក្រសួង ឯកឧត្តមទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញចូលរួមក្នុងពិធីបើកវគ្គបណ្តុះបណ្តាលថ្នាក់ពិសេសមធ្យមសុរិយោដីជំនាន់ទី៣ និងប្រគល់សញ្ញាបត្រដល់កម្មសិក្សាការីនៃវគ្គបណ្តុះបណ្តាលថ្នាក់ពិសេសមធ្យមសុរិយោដីជំនាន់ទី២។

    លោក ឃិន ឡុងហេង នាយកសាលាបណ្តុះបណ្តាលវិជ្ជាជីវៈ នៃក្រសួងរៀបចំដែនដី នគរូបនីយកម្ម និងសំណង់ បានអោយដឹងថា ដោយមានការខិតខំប្រឹងប្រែងទាំងកម្លាំងកាយចិត្តរបស់ថ្នាក់ដឹកនាំក្រសួង ពិសេស ឯកឧត្តមទេសរដ្ឋមន្រ្តី សាលាបណ្តុះបណ្តាលវិជ្ជាជីវៈត្រូវបានសម្ពោធដាក់ឲ្យដំណើរការចាប់ពីថ្ងៃទី០១ ខែមីនា ឆ្នាំ២០១១កន្លងមក ហើយមកដល់ពេលនេះសាលាបានបញ្ចប់វគ្គណ្តុះបណ្តាលថ្នាក់ពិសេសមធ្យមសុរិយោដី ជំនាន់ទី២ ប្រកបដោយជោគជ័យ។ ដែលកម្មវិធីសិក្សា ត្រូវបានអនុវត្តទៅតាមគោលការណ៍របស់ក្រសួងដែលបានកំណត់ចំនួន១.០៥៦ម៉ោង ក្នុងនោះ ផ្នែកទ្រឹស្តីមានចំនួន ៩២៨ម៉ោង និងការងារអនុវត្តជាក់ស្តែងមានចំនួន ១២៨ម៉ោង លើមុខវិជ្ជា ០៨មុខ រួមមាន ក្រមរដ្ឋប្បវេណី ច្បាប់ភូមិបាល បច្ចេកទេសវាស់វែង អភិរក្សសុរិយោដី ការរៀបចំ និងការប្រព្រឹត្តទៅរបស់ គណៈកម្មការសុរិយោដី នីតិវិធីនៃការចុះបញ្ជីដីមានលក្ខណៈដាច់ដោយដុំ ដំណើរការនៃការបង្កើតគណៈកម្មការសុរិយោដីប្រព័ន្ធពត៌មានភូមិសាស្រ្ត (GIS) ដែលមានកម្មសិក្សាការី សរុបមានចំនួន ៤៧រូប ក្នុងនោះស្រ្តី០៤រូប ជាលទ្ធផល និទេសល្អណាស់ ចំនួន ១១រូប និង ល្អមានចំនួន ៣៣រូប ។ ចំពោះវគ្គបណ្តុះបណ្តាលជំនាន់ទី៣ ដែលត្រូវបើកវគ្គក្នុងថ្ងៃនេះ គឺមានសិក្ខាកាមចំនួន ៥៣រូប មកពីថ្នាក់ក្រសួង ០៥រូប ថ្នាក់មន្ទីររាជធានី ខេត្ត ៤៥រូប និងមកពីក្រសួងការពារជាតិ ០៣រូប ។

    ឯកឧត្តមទេសរដ្ឋមន្ត្រី អ៊ឹម ឈុនលឹម មានប្រសាសន៍ថា ក្នុងនយោបាយអភិវឌ្ឍន៍ធនធានមនុស្សរបស់ក្រសួង ស្របនឹងគោលនយោបាយរបស់រាជរដ្ឋាភិបាល ក្រសួងមានចក្ខុវិស័យច្បាស់លាស់ និងទូលំទូលាយ គឺ ដើម្បីឆ្លើយតបនឹងសំណូមពរការងារចំពោះមុខផង និងយូរអង្វែងផង ទាំងផ្នែកសមត្ថភាពវិជ្ជាជីវៈ ទាំងផ្នែកសីលធម៌វិជ្ជាជីវៈ និងបន្តនិរន្តរភាពការងាររបស់ក្រសួង ព្រមទាំងពង្រឹងគុណភាពមន្ត្រីឲ្យឆ្លើយតបនឹងស្តង់ដាក្នុងតំបន់ផង និងអន្តរជាតិផង ជាពិសេសស្តង់ដារបស់អាស៊ាន ក្រសួងបានយកចិត្តទុកដាក់លើបណ្តុះបណ្តាលរយៈពេលខ្លី រយៈពេលវែង ទាំងក្នុងប្រទេស និងក្រៅប្រទេស ។ ក្នុងការបណ្តុះបណ្តាលរយៈពេលខ្លីក្នុងមួយឆ្នាំៗ ក្រសួងបានបើកវគ្គបំប៉នជំនាញវិជ្ជាជីវៈជាច្រើន ដល់មន្ត្រីនៅគ្រប់ថ្នាក់ ជាពិសេសថ្នាក់ក្រោមជាតិ និងការបណ្តុះបណ្តាលរយៈពេលវែង ក្រសួងបានបើកមហាវិទ្យាល័យរៀបចំដែនដី និងរដ្ឋបាលដីធ្លី ស្ថិតនៅក្នុងបរិវេណមហាវិទ្យាល័យកសិកម្មចំការដូង និងនៅសាលាបណ្តុះបណ្តាលវិជ្ជាជីវៈរបស់ក្រសួង ។ ទន្ទឹមនឹងការប្រើប្រាស់លទ្ធភាពផ្ទៃក្នុងរបស់ខ្លួន ក្រសួងក៏មានកិច្ចសហការជាមួយប្រទេសជាមិត្ត និងដៃគូរអភិវឌ្ឍន៍អន្តរជាតិមួយចំនួន ក្នុងឆ្នាំ២០១១ ប្រទេសសឹង្ហបុរីតាមរយៈគម្រោងសហប្រតិបត្តិការ ជាមួយមូលនិធិ TEMASEK បានជួយបណ្តុះបណ្តាលជំនាញរៀបចំទីក្រុង សំណង់ និងរដ្ឋបាលដីធ្លី ដល់មន្ត្រីរបស់ក្រសួងជាថ្នាក់ដឹកនាំនយោបាយ និងថ្នាក់ប្រតិបត្តិបានចំនួន១៤០រូប ហើយជំនាញទាំងនេះត្រូវបានធ្វើការបណ្តុះបណ្តាលបន្តដល់មន្ត្រីនៅថ្នាក់ក្រោមជាតិ បានជាង ១.០០០រូប ហើយក៏ត្រូវនឹងធ្វើការបណ្តុះបណ្តាលបន្តបន្ថែមទៀត។ ចំពោះការបណ្តុះបណ្តាលនៅក្រៅប្រទេស ក្រសួងក៏បានបញ្ជូនមន្ត្រីទៅសិក្សាក្នុងឆ្នាំ២០១១ បានចំនួន ៣៣រូប ដូចជា ប្រទេសជប៉ុន សឹង្ហបុរី អាល្លឺម៉ង់ ថៃឡង់ដ៍ វៀតណាម ឡាវ ចិន ស៊ុយអែត កូរ៉េ ម៉ាឡេស៊ី..... ផងដែរ ។ ឯកឧត្តមទេសរដ្ឋមន្រ្តី ក៏បានបញ្ជាក់ថា ដើម្បីពង្រឹងគុណភាពបណ្តុះបណ្តាល ក្រសួងក៏មានទិសដៅធ្វើការអភិវឌ្ឍន៍សាលាបណ្តុះបណ្តាលវិជ្ជាជីវៈឲ្យក្លាយទៅជាវិទ្យាស្ថាន ដើម្បីឲ្យមន្រ្តីមានលទ្ធភាពអាចបណ្តុះបណ្តាលថ្នាក់ឧត្តមសិក្សា លើមុខជំនាញសំខាន់ៗរបស់ក្រសួង ។
    ក្នុងឪកាសនេះផងដែរ ឯកឧត្តមទេសរដ្ឋមន្ត្រី បានធ្វើការផ្តាំផ្ញើរដល់មន្រ្តីក្រោមឱវាទក្រសួងត្រូវយកចិត្តទុកដាក់ដឹកនាំគ្រប់ជំនាញទាំងអស់ឲ្យបានស្មើគ្នា មិនអាចឲ្យជំនាញណាមួយធ្ងន់ស្រាលនោះឡើយ ហើយត្រូវខិតខំធ្វើការឲ្យអស់សមត្ថភាព និងប្រកបដោយមនសិកាវិជ្ជាជីវៈខ្ពស់ ព្រមទាំងត្រូវមានអក្បកិរិយាបម្រើប្រជាពលរដ្ឋឲ្យកាន់តែល្អប្រសើរ ដោយធ្វើយ៉ាងណា បំពេញការងារជូនប្រជាពលរដ្ឋឲ្យបានឆាប់រហ័ស និងងាយស្រួល និងមានតម្លៃទាបបំផុត តាមគោលការណ៍ និងច្បាប់កំណត់ ។

រក្សាសិទ្ធិគ្រប់យ៉ាងដោយ ក្រសួងរៀបចំដែនដីនគរូបនីកម្ម និងសំណង់ - ????

Designed & Hosted by Serving Web Solution