• Welcome to Ministry of Land Management Urban Planning and Construction
ព័ត៌មានផ្សេងៗ
ព័ត៌មានជាវីឌីអូ
ចំនួនអ្នកទស្សនា
0 0 3 8 5 5 9 4 
ឯកឧត្តមទេសរដ្ឋមន្រ្តី​ អ៊ឹម ឈុនលឹម​ រដ្ឋមន្រ្តី​ក្រសួង​រៀប​ចំ​ដែន​ដី​ នគរូប​នីយ​កម្ម​ និង​សំណង់​ និង​លោក​ជំទាវ​ តំណាង​ដ៏​ខ្ពង់​ខ្ពស់​របស់​សម្តេច​អគ្គ​មហា​សេនា​បតី​តេជោ​ ហ៊ុន សែន​ នាយក​រដ្ឋមន្រ្តី​នៃ​ព្រះ​រាជា​ណា​ចក្រ​កម្ពុជា​ និង​ លោក​ជំទាវ​កិត្តិ​ព្រឹទ្ធ​បណ្ធិត​ បាន​អញ្ជើញ​ជា​អធិបតី​ក្នុង​ពិធី​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ​
     ផ្សារ​សាមគ្គី​ក្រុង​ក្រចេះ​ ជា​អំណោយ​ដ៏​ថ្លៃ​ថ្លា​របស់​សម្តេច​តេជោ​ និង​លោក​ជំទាវ​កិត្តិ​ព្រឹទ្ធ​បណ្ឌិត​ត្រូវ​បាន​សាង​សង់​រួច​ជា​ស្ថាពរ​ និង​ត្រូវ​បាន​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ​នា​​ព្រឹក​ថ្ងៃ​ទី​០៨​ ខែ​មេសា​ ឆ្នាំ​២០១២​  ​ក្រោម​អធិបតីភាព​របស់​​ឯក​ឧត្តម​ទេស​រដ្ឋ​មន្រ្តី​ អ៊ឹម ឈុនលឹម រដ្ឋ​មន្រ្តី​ក្រសួង​រៀប​ចំ​ដែន​ដី​ នគរូប​នីយកម្ម​ និង​សំណង់​ និង​លោក​ជំទាវ​ ជា​តំណាង​ដ៏​ខ្ពង់​ខ្ពស់​របស់​សម្តេច​អគ្គ​មហា​សេនា​បតី​តេជោ​ ហ៊ុន សែន នាយក​រដ្ឋ​មន្រ្តី​នៃ​ព្រះ​រាជា​ណាចក្រ​កម្ពុជា​ និង​លោក​ជំទាវ​កិត្តិ​ព្រឹទ្ធ​បណ្ឌិត​។
     បន្ទាប់​ពី​ម​តិស្វាគមន៍​របស់​ឯកឧត្តម​ ខាំ ភឿន អភិបាល​នៃ​គណៈ​អភិបាល​ខេត្ត​ក្រចេះ​រួច​មក​ ឯកឧត្តម​ឧត្តម​សេនីយទោ​ គង់ អៀង មេ​បញ្ជា​ការ​រង​កង​វិស្វកម្ម​នៃ​ក្រសួង​ការ​ពារ​ជាតិ​ បាន​អាន​របាយ​ការណ៍​សាង​សង់​ឲ្យ​ដឹង​ថា​ ផ្សារ​សាមគ្គី​ក្រុង​ក្រចេះ​ ដែល​ទើប​សាង​សង់​រួច​នេះ​ មាន​ផ្ទៃ​ក្រឡា​ ៩០ម​ គុណ​ ៥០ម​ ស្មើ​ ៤.៥០០​ម៉ែត្រ​ការ៉េ​ ចំនួន​៤២២តូប​ សម្រាប់​លក់​ដូរ​ឥវ៉ាន់​ ខោអាវ​ គ្រឿង​មាស​ ប្រាក់​ (ល)​(ល)​ និង​រាន​ចំនួន​ ១៣២រាន​ សម្រាប់​លក់​បន្លែ​ បបរ​ ត្រី​ សាច់​ និង​ស៊ុត​(ពង​គ្រប់​ប្រភេទ​) កន្លែង​ផ្ញើរ​កង់​មាន​ទំហំ​ ៥៧​ម៉ែត្រ​ការ៉េ​ បន្ទប់​អនាម័យ​បុរស​ ស្រ្តី​ចំនួន​ ៦​បន្ទប់​ និង​កន្លែង​ដាក់​សម្រាម​ទំហំ​ ២២​ម៉ែត្រ​ការ៉េ​។ ផ្នែក​ខាង​ក្នុង​មាន​បន្ទប់​រដ្ឋបាល​ទំហំ​ ៣៦​ម៉ែត្រ​ការ៉េ​ សម្រាប់​ចាត់​ការ​ទូទៅ​ក្នុង​ផ្សារ​ទាំង​មូល​ រី​ឯ​តូប​ និ​ងរាន​នីមួយៗ​បាន​បែង​ចែក​រៀប​រយ​ទៅ​តាម​តំបន់​ ដើម្បី​ងាយ​ស្រួល​គ្រប់​គ្រង​ និង​ធ្វើ​អនាម័យ​ ហើយ​ផ្សារ​ទាំង​មួល​មាន​ទ្វារ​ធំ​ចេញ​ ចូល​ចំនួន​ ៤​ទិស​ មាន​ទំហំ​៤​ដល់​ ៦​ម៉ែត្រ​ និង​ទ្វារ​តូប​ធំ​ជុំ​វិញ​ផ្សារ​មាន​ចំនួន​ ២១​ទ្វារ​។ ឯក​ឧត្តម​ឧត្តម​សេនីយ​ បាន​បន្ត​ថា​ ផ្លូវ​បេតុង​សរសៃ​ដែក​ជុំ​វិញ​ផ្សារ​មាន​ប្រវែង​ ៦៨៥​ម៉ែត្រ​ ផ្លូវ​បេទីម​ប្រវែង​ ១៥​ម៉ែត្រ​ និង​លូ​ក្នុង​ផ្សារ​និង​ជុំវិញ​ផ្សារ​មាន​ប្រវែង​ ៤៨៥ម៉ែត្រ​។ តម្លៃ​នៃ​ការ​សាង​សង់​តួ​អគារ​ទំហំ​ ៤.៥០០​ម៉ែត្រ​ការ៉េ​ អស់​ទឹក​ប្រាក់​ចំនួន​ ៧២៤.៤១២,៧៥ដុល្លារ​ សរុប​តូប​ និង​រាន​មាន​ចំនួន​៥៥៤​ ហើយ​សរុប​ប្រាក់​ចំណាយ​មាន​ចំនួន​ ១.០៩១.៤៨៤ដុល្លារ​ ប្រភព​ដដែល​បាន​បញ្ជាក់​ថា​ ការ​សាង​សង់​ផ្សារ​សាមគ្គី​ក្រុង​ក្រចេះ​ មាន​រយៈ​ពេល​ ៧​ខែ​គិត​ចាប់​ពី​ខែ​មិថុនា​ ឆ្នាំ​២០១១​ ដល់​ខែ​មករា​ ឆ្នាំ​២០១២​ រីឯ​តូច​និង​រាន​លក់​ដូរ​សាង​សង់​មាន​រយៈ​ ៣​ខែ​ ចាប់​ពី​ខែ​មករា​ ដល់​ខែ​មីនា​ ឆ្នាំ​២០១២​។
     មាន​ប្រសាសន៍​សំណេះ​សំណាល​ ក្នុង​ពិធី​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ​ផ្សារ​សាមគ្គី​ក្រុង​ក្រចេះ​ នា​ព្រឹក​នោះ​ ឯកឧត្តម​ទេស​រដ្ឋ​មន្រ្តី​ អ៊ឹម ឈុនលឹម រដ្ឋ​មន្រ្តី​ក្រសួង​រៀប​ចំ​ដែន​ដី​ នគរូប​នីយកម្ម​ និង​សំណង់​ បាន​មាន​ប្រសាសន៍​ថា​ អគារ​ថ្មី​​ស្រឡាង​​យ៉ាង​ធំ​ស្កឹម​ស្កៃ​ដ៏​ល្អ​ប្រណិត​នៃ​ផ្សារ​នេះ​ អាច​ចាត់​ទុក​ថា​ជា​សំណង់​ប្រវត្តិ​សាស្រ្ត​មួយ​ទៀត​ក្នុង​ចំណោម​សមិទ្ធ​ផល​ថ្មីៗ​ទាំង​ឡាយ​នៅ​ទូ​ទាំង​ខេត្ត​។ សំណង់​ផ្សារ​ថ្មី​នេះ​ក៏​ជា​ចំណង​ដៃ​របស់​សម្តេច​អគ្គ​មហា​សេនា​បតី​តេជោ​ ហ៊ុន សែន និង​លោក​ជំទាវ​កិត្តិ​ព្រឹទ្ធ​បណ្ឌិត​ ចំពោះ​ អាជីវករ​ និង​ប្រជា​ពលរដ្ឋ​ក្នុង​ខេត្ត​ក្រចេះ​ សម្រាប់​ឆ្នាំ​ថ្មី​ប្រពៃណី​ជាតិ​ ឆ្នាំ​រោង​ ចត្វា​ស័ក​ ព.ស ២៥៥៦​ ដែល​នឹង​ខិត​ចូល​មក​ដល់​ប៉ុន្មាន​ថ្ងៃ​ខាង​មុខ​នេះ​ ។
     ឯកឧត្តម​ទេស​រដ្ឋមន្រ្តី​ បាន​លើក​ឡើង​ថា​ ក្នុង​នាម​សម្តេច​អគ្គ​មហា​សេនា​បតី​តេជោ​ ហ៊ុន សែន និង​លោក​ជំទាវ​កិត្តិ​ព្រឹទ្ធ​បណ្ឌិត​ សូម​សំដែង​កោត​សរសើរ​ចំពោះ​គណៈ​កម្មការ​ និង​អនុ​កម្ម​ការ​ផ្សារ អជ្ញាធរ​ដែនដី​​ ពិសេស​កង​វិស្វកម្ម​​ក្រសួង​ការ​ពារ​ជាតិ​ ដែល​បាន​យក​អស់​កម្លាំង​កាយ​ ចិត្ត​ ស្មារតី​ខិត​ខំ​ធ្វើ​ឲ្យ​សំណង់​សម្រេច​បាន​ល្អ​ប្រសើរ​ដោយ​សុវត្តិភាព​ក្នុង​រយៈ​ ៩ខែ​ ។
     ក្នុង​ឱកាស​នោះ​ដែរ​ ឯកឧត្តម​ទេសរដ្ឋមន្រ្តី​ បាន​ពាំ​នាំ​អំណោយ​របស់​សម្តេច​អគ្គ​មហា​សេនា​បតី​តេជោ​ ហ៊ុន សែន និង​លោក​ជំទាវ​កិត្តិ​ព្រឹទ្ធ​បណ្ឌិត​ ដើម្បី​ចែក​ជូន​ សីល​វ័ន្ត​សីល​វតី​ ចំនួន​ ១០០នាក់​ ក្រណាត់​ស​ ១ដុំ​ (២ម៉ែត្រ)​ លោក​គ្រូ​ អ្នក​គ្រូ​ ចំនួន​១០០នាក់​ ម្នាក់ៗ​ទទួល​បាន​ថវិកា​ ១០.០០០រៀល​ សិស្សា​នុសិស្ស​ ចំនួន​៣០០នាក់​ ម្នាក់ៗ​ទទួល​បាន​ ប៊ិច​ ០២ដើម​ សៀវភៅ​ ២ក្បាល​ និង​ថវិកា​ ៥.០០០៛​ គរុសិស្ស​ចំនួន​ ១៤០នាក់​ ម្នាក់ៗ​ទទួល​បាន​ថវិកា​ ១០.០០០៛​ យុវជន​កាកបាទ​ក្រហម​ ចំនួន​១០០នាក់​ ម្នាក់ៗ​ទទួល​បាន​ថវិកា​ ១០.០០០៛​ យុវជន​កាយរិទ្ធ​ ចំនួន​១០០នាក់​ ម្នាក់ៗ​ទទួល​បាន​ថវិកា​ ១០.០០០៛​ ឧបត្ថម្ភ​រៀប​ចំ​ពិធី​ចំនួន​ ៤.០០០.០០០៛​ ឧបត្ថម្ភ​កង​កម្លាំង​នគរបាល​ ចំនួន​១០០.០០០៛​ ឧបត្ថម្ភ​កង​កម្លាំង​រាជ​អាវុធ​ហត្ថ​ចំនួន​ ១០០.០០០៛​​ ឧបត្ថម្ភ​ទូរទស្សន៍​ ទទក​ បាយ័ន​ ហង្សមាស​ និង​ទូរទស្សន៍​ខេត្ត​ ក្នុង​១ប៉ុស្តិ៍​ ចំនួន​១០០.០០០៛​ ឧបត្ថម្ភ​កាសែត​ កម្ពុជា​ថ្មី​ រស្មី​កម្ពុជា​ ក្នុង​១ប៉ុស្តិ៍​ ចំនួន​៨០.០០០៛​ វិទ្យុ​ខេត្ត​ វិទ្យុ​ជាតិ​ ក្នុង​១​ប៉ុស្តិ៍​ ចំនួន​ ៨០.០០០៛​ ។









 
រក្សាសិទ្ធិគ្រប់យ៉ាងដោយ ក្រសួងរៀបចំដែនដីនគរូបនីកម្ម និងសំណង់ - ២០១៤
Designed & Hosted by Serving Web Solution