• Welcome to Ministry of Land Management Urban Planning and Construction
ព័ត៌មានផ្សេងៗ
ព័ត៌មានជាវីឌីអូ
ចំនួនអ្នកទស្សនា
0 0 2 9 3 1 7 9 
ឯកឧត្តម​ទេសរដ្ឋ​មន្រ្តី​ អ៊ឹម​ ឈុនលឹម រដ្ឋ​មន្រ្តី​ក្រសួង​រៀបចំ​ដែន​ដី នគរូប​នីយកម្ម និងសំណង់ ទទួល​ជួប​ពិភាក្សា​​ជា​មួយ​ឯកឧត្ដម​បណ្ឌិត​ Dr. Wolfgang Moser ឯកអគ្គ​រដ្ឋ​ទូត​សា​ធា​រណៈ​រដ្ឋ​សហព័ន្ធ​អាល្លឺម៉ង​
     កាល​ពី​ព្រឹក​ថ្ងៃ​ទី​ ១០​ ខែ​ មេសា​ ឆ្នាំ​ ២០១២​ ឯកឧត្ដម​ទេសរដ្ឋ​មន្ដ្រី​ អ៊ឹម ឈុនលឹម រដ្ឋ​មន្ដ្រី​ក្រសួង​រៀប​ចំ​ដែន​ដី​ នគរូប​នីយកម្ម​ និង​សំណង់​ បាន​ទទួល​ជួប​ពិភាក្សា​ការងារ​ ជា​មួយ​ឯកឧត្ដម​បណ្ឌិត​ Dr. Wolfgang Moser ឯក​អគ្គ​រដ្ឋ​ទូត​សាធា​រណៈ​រដ្ឋ​សហព័ន្ធ​អាល្លឺម៉ង​ នៅ​ទី​ស្ដី​ការ​ក្រសួង​រៀប​ចំ​ដែន​ដី​ នគរូប​នីយកម្ម​ និង​សំណង់​។ គោល​បំណង​គឺ​ ជួប​ពិភាក្សា​ការ​ងារ​ និង​ស្វែង​យល់​ពី​ភាព​រីក​ចម្រើន​នៃ​ការ​រៀប​ចំ​គោល​គំនិត​ និង​ផែន​ទី​គោចរ​ (Road Map) នៃ​វិស័យ​ដី​ធ្លី​។

    ឯកឧត្ដម​ទេស​រដ្ឋ​មន្ដ្រី​ អ៊ឹម ឈុនលឹម បាន​ស្វាគមន៍​ និង​ថ្លែង​អំណរ​គុណ​ដល់​រដ្ឋាភិបាល​អាល្លឺម៉ង​ ដែល​ផ្ដល់​ការ​យក​ចិត្ដ​ទុក​ដាក់​ជួយ​លើ​ការ​ងារ​វិស័យ​ដី​ធ្លី​ទាំង​មូល​នៅ​កម្ពុជា​។ ជា​កិច្ច​ឆ្លើយ​តប​ ឯក​ឧត្ដម​បណ្ឌិត​ Dr. Wolfgang Moser ឯកអគ្គ​រដ្ឋ​ទូត​សាធា​រណៈ​រដ្ឋ​សហព័ន្ធ​អាល្លឺម៉ង​ ក៏​បាន​ថ្លែង​អំណរ​គុណ​ដល់​ ឯកឧត្ដម​ ទេស​រដ្ឋ​មន្ដ្រី​ផង​ដែរ​ក្នុង​ការ​ទទួល​ជួប​ពិភាក្សា​ការ​ងារ​ និង​ចង់​ស្វែង​យល់​ពី​ភាព​រីក​ចំរើន​គោល​គំណិត​ និង​ផែន​ទី​គោ​ចរ​លើ​វិស័យ​ដី​ធ្លី​នៅ​កម្ពុជា​។ ទាក់​ទង​នឹង​ចំណុច​នេះ​ ឯកឧត្ដម​ទេស​រដ្ឋ​មន្ដ្រី​ បាន​ជម្រាប​ជូន​ភ្ញៀវ​ពី​គោល​គំណិត​ នៃ​ការ​ចុះ​បញ្ជី​បន្ដ​ តាម​ស្មារតី​ច្រក​ចេញ​ចូល​តែ​មួយ​ និង​ជម្រុញ​ការ​ចុះ​បញ្ជី​ជា​ប្រព័ន្ធ​ព្រម​ទាំង​ការ​ដោះ​ស្រាយ​បញ្ហា​ទំនាស់​ ការ​កាន់​កាប់​ដី​មិន​រៀប​រយ​តាម​រយៈ​សារាចរ​ ០២​ ស្ដី​ពី​ការ​កាន់​កាប់​ដី​រដ្ឋ​ដោយ​ខុស​ច្បាប់​ និង​សារាចរ​ លេខ​០៣​ ស្ដី​ពី​ការ​ដោះ​ស្រាយ​សំណង់​បណ្ដោះ​អាសន្ន​លើ​ដី​រដ្ឋ​ដែល​ត្រូវ​បាន​ទន្ទ្រាន​កាន់​កាប់​ដោយ​ខុស​ច្បាប់​តាម​រាជ​ធានី​ ទី​ក្រុង​និង​ទី​ប្រជុំជន​។​ ជា​មួយ​គ្នា​នេះ​ដែរ​ឯកឧត្ដម​ទេស​រដ្ឋ​មន្ដ្រី​  បាន​លើក​ឡើង​ពី​ការ​ងារ​ពាក់​ព័ន្ធ​នឹង​សម្បទាន​ដី​សេដ្ឋកិច្ច​ ដែល​រាជ​រដ្ឋា​ភិបាល​ បាន​អនុញ្ញាត​ឱ្យ​ធ្វើ​ការ​ចុះ​បញ្ជី​ជា​មុន​ ទើប​ចុះ​កិច្ច​សន្យា​ជា​ក្រោយ​។

     សូម​បញ្ជាក់​ជូន​ថា​ ជា​មួយ​នឹង​ការ​ជួយ​របស់​ដៃ​គូ​ជា​មិត្ដ​រដ្ឋា​ភិបាល​អាល្លឺម៉ង់​នឹង​ផ្ដល់​ថវិកា​ជា​ជំនួយ​បច្ចេកទេស​ និង​ហរិញ្ញ​ប្បទាន​សហ​ប្រតិបត្ដ​ការ​ សរុប​ចំនួន​ ១៣លានអឺរូ​  សម្រាប់​ ឆ្នាំ​ ២០១៣​-២០១៥​ ដល់​ក្រសួង​រៀប​ចំ​ដែនដី​ នគរូប​នីយកម្ម​ និង​សំណង់​ សម្រាប់​អនុវត្ដ​លើ​កម្ម​វិធី​ ចំនួន​ ២​ រួម​មាន ​៖
១.​    កម្ម​វិធី​សិទ្ធិ​លើ​ដី​ធ្លី​ជំ​ហ៊ាន​ទី២​ មាន​ទឹក​ប្រាក់​ចំនួន​ ៤​ លាន​អឺរូ​ ជា​ថវិកា​ជំនួយ​បច្ចេកទេស​ សម្រាប់​អនុវត្ដ​លើ​កម្ម​​វិធី​កំណែ​ទម្រង់​ដី​ធ្លី​ ផ្ដោត​លើ​អនុ​វិស័យ​ចំនួន​បី​ គឺ​អនុ​វិស័យ​រដ្ឋបាល​ដី​ធ្លី​ អនុវិស័យ​រៀប​ចំ​ដែន​ដី​ និង​អនុ​វិស័យ​បែង​ចែក​ដី​ធ្លី​។
២.​    កម្ម​វិធី​ស្ដី​ពី​គោល​នយោ​បាយ​ដី​ធ្លី​ និង​រៀប​ចំ​ដែន​ដី​ មាន​ទឹក​ប្រាក់​ចំនួន​៩លាន​អឺរូ​ ជា​ថវិកា​ហិរញ្ញ​ប្បទាន​ សហ​ប្រតិ​បត្ដិ​ការ​  សម្រាប់​អនុវត្ដ​លើ​កម្ម​វិធី​អនុ​វិស័យ​រដ្ឋ​បាល​ដី​ធ្លី​ ដើម្បី​ពន្លឿន​​ការ​ចុះ​បញ្ជី​ដី​ធ្លី​ទ្វេ​ដង​ នៅ​កម្ពុជា​។

ជា​ទី​បញ្ចប់​ ឯកឧត្ដម​ឯកអគ្គ​រដ្ឋ​ទូត​បាន​គោរព​ថ្លែង​អំណរ​គុណ​ជា​ថ្មី​ និង​គោរព​ជូន​ពរ​ឯកឧត្ដម​ទេស​រដ្ឋ​មន្ដ្រី​ អ៊ឹម ឈុនលឹម ក្នុង​ឱ្យ​ឧកាស​បុណ្យ​ចូល​ឆ្នាំ​ថ្មី​ ប្រពៃណីយ​ជាតិ​ខ្មែរ​នា​ពេល​ខាង​មុខ​ប្រកប​ដោយ​ជ័យ​ជំនះ​ គ្រប់​ភារៈ​កិច្ច​។


 
រក្សាសិទ្ធិគ្រប់យ៉ាងដោយ ក្រសួងរៀបចំដែនដីនគរូបនីកម្ម និងសំណង់ - ????
Designed & Hosted by Serving Web Solution