January 12, 2019
សមិទ្ធផលនានា រួមមានដំបូលឧបដ្ឋានសាលា ដងទង់ ផ្លូវបេតុង កុដិ ការ៉ូឡា បង្គោលភ្លើង ការិយាល័យចូលបច្ច័យ ខឿនដើមពោធិព្រឹក្ស និងសមិទ្ធផលផ្សេងៗទៀតក្នុងវត្តរតនមុនីតាប៉ាវ ហៅវត្តពងទឹក ស្ថិតនៅឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ ត្រូវបានសម្ពោធឆ្លងដាក់ឱ្យប្រើបាស់ជាផ្លូវការ ក្រោមអធិបតីភាព ឯកឧត្តម ជា​ សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី​ ហ៊ុនសែន នាព្រឹកថ្ងៃសៅរ៍ ៧កើត​ ខែបុស្ស ឆ្នាំច សំរឺទ្ធិស័ក ព.ស. ២៥៦២ ត្រូវនឹងថ្ងៃទី ១២ ខែមករា ឆ្នាំ២០១៩។ តាមរបាយការណ៍របស់អភិបាលស្រុកត្បូងឃ្មុំស្ដីទី បានឱ្យដឹងថា វត្តរតនមុនីតាប៉ាវ ហៅវត្តពងទឹក នេះមានអាយុកាល ៥៤ឆ្នាំមកហើយ ហើយរហូតមកទល់បច្ចុប្បន្ននេះបានឆ្លងកាត់នូវការដឹកនាំគ្រប់គ្រងពីព្រះគ្រូចៅអធិការ ៦អង្គហើយ។ វត្តនេះមិនខុសពីវត្តដទៃទៀតនៅទូទាំងប្រទេសឡើយ គឺបានឆ្លងកាត់នូវរបបប្រល័យពូជសាសន៍ ប៉ុល ពត ដែលបានបំផ្លិចបំផ្លាញទីអារាមនេះស្ទើរគ្មានសល់។ ក្រោយថ្ងៃរំដោះ ៧មករា ១៩៧៩ ហេដ្ឋារចនាសម្ព័ន្ធសង្គមត្រូវបានកសាង និងស្ដារឡើងវិញ ក្នុងនោះដែរ ទីអារាមវត្តរតនមុនីតាប៉ាវ ហៅវត្តពងទឹក ក៏ដូចជាទីអារាមនៅទូទាំងប្រទេសបា​នចាប់ផ្ដើមជួសជុល និងកសាងសមិទ្ធផលថ្មីៗជាបន្តបន្ទាប់ក្រោមការជួយឧបត្ថម្ភពីសប្បុរសជននិងថ្នាក់ដឹកនាំនៃរាជរដ្ឋាភិបាលរួមជាមួយព្រះគ្រូចៅអធិការវត្ត និងប្រជាពុទ្ធបរិស័ទជិតឆ្ងាយ។ ដោយឡែកសមិទ្ធផលដែលត្រូវបានសម្ពោធឆ្លងនាពេលនេះ រយមមានឧបដ្ឋានសាលាកុដិទំហំ ៩x៩ម៉ែត្រ ដង់ទង់២ដើមប្រវែង ២៦ម៉ែត្រ ផ្លូវបេតុងទំហំ ១ ៦៤២ម៉ែត្រក្រឡា ការិយាល័យចូលបច្ច័យទំហំ ៥x6ម៉ែត្រ ការ៉ូឡាទំហំ ១ ៤៩០ម៉ែត្រក្រឡា បង្គោលភ្លើង ៧៥ដើម និងខឿនដើមពោធិព្រឹក្ស ដែលត្រូវបានកសាងឡើងក្រោមការជួយឧបត្ថម្ភពីថ្នាក់ដឹកនាំនៃរាជរដ្ឋាភិបាលមានដូចជា សម្ដេចអគ្គមហាពញាចក្រី ហេង សំរិន និងលោកជំទាវ ឯកឧត្តមឧបនាយករដ្ឋមន្រ្តី ជា សុផារ៉ា​ និងលោកជំទាវ ឯកឧត្តម គន់ គីម និងលោកជំទាវ និងសប្បុរសជនរួមជាមួយព្រះចៅអធិការវត្ត និងប្រជាពុទ្ធបរិស័ទចំណុះជើងវត្ត សរុបថវិកាក្នុងការកសាងអស់ ៨៨ ១៨០ដុល្លាសហរដ្ឋអាមេរិក។   ក្នុងពិធីនេះ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានថ្លែងអំណរគុណនិងកោតសរសើរដល់ព្រះចៅអធិការវត្ត គណៈកម្មការ អាចារ្យ សប្បុរសជន និងពុទ្ធបរិស័ទទាំងអស់ដែលបានខិតខំជួយបំពេញបន្ថែមដើម្បីឱ្យសម្រេចបាននូវការកសាងសមិទ្ធផលជាច្រើននេះទុកជាសម្បត្តិគរុភណ្ឌក្នុងវិស័យព្រះពុទ្ធសាសនា។ ឯកឧត្តម ឧបនាយករដ្ឋមន្រ្តី​បានលើកឡើងថា រាជរដ្ឋាភិបាលកម្ពុជា តែងតែបានខិតខំបំពេញតាមបំណងប្រាថា្នរបស់ប្រជាពលរដ្ឋលើគ្រប់វិស័យទាំងវិស័យអាណាចក្រ និងពុទ្ធចក្រ និងដោះស្រាយរាល់បញ្ហាប្រឈមនានារបស់ប្រជាពលរដ្ឋ សំដៅធ្វើយ៉ាងណាឱ្យពួកគាត់មានសេចក្ដីសុខ សុភមង្គល រស់នៅដោយគមានភាពភ័យខ្លាច ក្នុងប្រទេសដែលមានសុខសន្ដិភាព និងរីកចម្រើន ទៅមុខទៀតដល់កូនចៅជំនាន់ក្រោយ និងបានថ្លែងអំណរគុណដល់ប្រជាពលរដ្ឋទាំងអស់នៅក្នុងឃុំរកាពប្រាំ និងគ្រប់មូលដ្ឋានទូទាំងប្រទេសដែលបន្តផ្ដល់ការគាំទ្រនិងជឿទុកចិត្តចំពោះរាជរដ្ឋាភិបាលក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ដែលមានគោលការណ៍យ៉ាងរឹងមាំក្នុងការរក្សាសន្ដិភាព ស្ថិរភាពនយោបាយក្នុងប្រទេស និងបញ្ចៀសឱ្យបានដាច់ខាតនូវរាល់សោកនាដកម្មដែលប្រជាជនធ្លាប់ជួបប្រទះកាលពីអតីតកាល ហើយទិសដៅទៅអនាគត គឺចង់ឱ្យប្រជាពលរដ្ឋជួបតែសេចក្ដីសុខ និងភាពរីកចម្រើនថែមទៀត។ ក្នុងឱកាសនោះ ឯកឧត្តមឧបនាយករដ្ឋមន្រ្តី ជា សុផារ៉ា បាននាំយកបច្ច័យរបស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រគេនដល់វត្តរតនមុនីតាប៉ាវ ហៅវត្តពងទឹក ចំនួន ១២ ០០០ដុល្លារ ទុកសម្រាប់សងថ្លៃសាងសង់ និងចែកជូនតាជីយាយជី ១០០នាក់ ម្នាក់ៗ ក្រណាត់ស ១ដុំ និងថវិកា ១ម៉ឺនរៀល លោកគ្រូ អ្នកគ្រូ ៧៤នាក់ និងគ្រូពេទ្យ ១៤នាក់ ម្នាក់ៗ សារុង ១ និងថវិកា ១ម៉ឺនរៀល សិស្សានុសិស្ស ៦៤៦នាក់ ម្នាក់ៗ សៀវភៅ២ក្បាល ប៊ិច១ដើម និងថវិកា ៥ពាន់រៀល យុវជនកាយឫទ្ធិ ៥០នាក់ និងយុវជនកាកបាទក្រហម ៥នាក់ ម្នាក់ៗថវិកា ១ម៉ឺនរៀល និងផ្ដល់ជូនសាលាស្រុកត្បូងឃ្មុំ ១លានរៀល និងសាលាឃុំរកាពប្រាំ ៥០ម៉ឺនរៀល​។ ជាមួយគ្នានេះ ឯកឧត្តមឧបនាយករដ្ឋមន្រ្តីក៏បានប្រគល់វិញ្ញាបនបត្រសម្គាល់ម្ចាស់អលនវត្ថុដល់វត្តពងទឹក វត្តត្រពាំងឬស្សី និងវត្តប្រផាត់ បន្ទាប់មកឯកឧត្តមឧបនាយករដ្ឋមន្រ្តី ក៏បំពាក់មេដៃជូនដល់សប្បុរជនដែលមានស្នាដៃផងដែរ៕















ឯកសារវីឌីអូរ
ចំនួនអ្នកទស្សនា
ថ្ងៃនេះ :
000259
ម្សិលមិញ :
001564
សរុប :
5217349
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលណទ្រព្យនៅកម្ពុជា