February 20, 2021
នៅវត្តជោតិរង្សីហៅវត្តបុស្ស ស្ថិតនៅឃុំរូង ស្រុកមេមត់ ខេត្តត្បូងឃ្មុំ មានរៀបចំពិធីបុណ្យបញ្ចុះខណ្ឌសីមាព្រះវិហារ និងសម្ពោធ​សមិទ្ធផល​នានា​ក្នុង​វត្ត​នេះ​ក្រោម​អធិបតីភាព ឯកឧត្តម ជាសុផារ៉ា ឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងមានការចូលរួមពីអាជ្ញាធរដែនដី ព្រះសង្ឃ អាចារ្យ គណៈកម្មការ មន្ត្រីរាជការ លោកគ្រូ អ្នកគ្រូសិស្សានុសិស្ស និងប្រជាពុទ្ធបរិស័ទជិតឆ្ងាយជាច្រើនកុះករ នាព្រឹកថ្ងៃសៅរ៍ ៩កើត ខែផល្កុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២០ ខែកុម្ភៈ ឆ្នាំ២០២១។ លោក ស្រេង លី អភិបាលនៃគណៈអភិបាលស្រុកមេមត់ បានឱ្យដឹងថា វត្តជោតិរង្សីហៅវត្តបុស្សនេះ ត្រូវបានកសាងឡើងតាំងពីឆ្នាំ ១៩១០ មកម្ល៉េះដោយគិតមកទល់បច្ចុប្បន្នមានអាយុកាល ១១១ ឆ្នាំ និងបានឆ្លងកាត់ការគ្រប់គ្រងពីព្រះគ្រូចៅអធិការចំនួន ១០ អង្កហើយ។ វត្តនេះក៏មិនខុសពីវត្តដទៃទៀតនៅទូទាំងប្រទេសដែរគឺ​​​បាន​ឆ្លងកាត់​នូវ​របប​ប្រល័យ​ពូជសាសន៍​ ប៉ុល ពត ដែល​បាន​បំផ្លិច​បំផ្លាញ​ទី​អារាម​នេះ​ស្ទើរគ្មាន​សល់។ ក្រោយថ្ងៃរំដោះ ៧ មករា ១៩៧៩ ប្រជាពលរដ្ឋ​នៅ​តំបន់​នេះ​ក៏​ដូច​ជា​ប្រជា​ពលរដ្ឋ​ទូទាំងប្រទេស​ដែរ​បាន​រំដោះ​ខ្លួន​រួច​ផុត​ពី​ការ​កាប់​សម្លាប់​មាន​សិទ្ធិសេរីភាព​ពេញលេញ រី​ឯ​វិស័យ​ព្រះពុទ្ធ​សាសនាក៏​ត្រូវ​បាន​ស្ដារ​ឡើង​វិញ​ផងដែរ។ ជាមួយនេះ ជីវភាព​រស់នៅ​របស់​ប្រជាពលរដ្ឋ​មាន​លក្ខណៈ​ល្អ​ប្រសើរ​ពីមួយ​ឆ្នាំ​ទៅ​មួយ​ឆ្នាំ​ ទើប​ប្រជាពលរដ្ឋ​ជា​ពុទ្ធបរិស័ទ​ទាំងអស់​នៅ​តំបន់​នេះ បាន​មូល​មតិ​គ្នា​ជា​ឯកច្ឆ័ន្ទ រួមគ្នាបោស​សម្អាត​ និង​ជួស​ជុល​កសាង​វត្ត​ជោតិ​រង្សី​ហៅ​វត្ត​បុស្ស និង​សមិទ្ធផល​នានា​ក្នុង​វត្តនេះ ឡើង​វិញ​ជាបន្តបន្ទាប់​ សម្រាប់​បន្ត​កិច្ចប្រតិបត្តិ​ផ្នែក​ព្រះពុទ្ធសាសនា​។ ដោយឡែក ព្រះវិហារថ្មី និង​សមិទ្ធផល​នានា ក្នុង​វត្តដែល​ត្រូវ​ធ្វើ​ពិធី​បុណ្យ​បញ្ចុះ​ខណ្ឌ​សីមា​ និង​សម្ពោធ​ឆ្លង​ដាក់​ឱ្យ​ប្រើប្រាស់​ជា​ផ្លូវ​ការ​នាពេលនេះ បាន​ចំណាយថវិកា​ក្នុង​ការ​សាងសង់​អស់ ២៧១ ០៥៦ ០០០ រៀល និង ៤៧២ ៥៦៤ ដុល្លារ ក្នុង​នោះ​មាន​ថវិកា​ចូលរួមឧបត្ថម្ភ​ពី​ឯកឧត្តមឧបនាយករដ្ឋមន្ត្រី ជា សុផារ៉ា និង​លោកជំទាវសរុប ៣១ លានរៀល និង ១១៥៤១៧ ដុល្លារ និង​មាន​ការចូ​លរួម​ចំណែក​ជា​ថវិកា​ពី​ព្រះសង្ឃ​រួម​ និង​សប្បុរសជន​នានា ជាច្រើន​ហើយ​បច្ចុប្បន្ន​នៅជំពាក់​ថ្លៃ​ជាងចំនួន ២៣ ៥៧០ ដុល្លារ ទៀត។  ក្នុង​ពិធី​នេះ​ ឯកឧត្តមឧបនាយករដ្ឋមន្ត្រី ជា សុផារ៉ា បាន​នាំ​មក​នូវ​ការ​ផ្តាំផ្ញើ​សាកសួរ សុខទុក្ខ​ពី​សំណាក់សម្ដេច​អគ្គមហាសេនា​បតីតេជោ ហ៊ុន សែន នាយករដ្ឋមន្ត្រី នៃ​ព្រះរាជា​ណាចក្រ​កម្ពុជា និង​សម្ដេច​កិតិ្តព្រឹទ្ធបណ្ឌិត​ ប៊ុន រ៉ានី ហ៊ុនសែន ជូន​ចំពោះ​ព្រះសង្ឃ និង​ប្រជាពលរដ្ឋ ទាំងអស់​នៅ​ក្នុង​ឃុំរូង​ក៏​ដូចជា​ក្នុង​ស្រុកមេមត់​ទាំងមូល​ ដែល​ជានិច្ចកាល​សម្ដេច​ទាំងពីរ​តែងតែ​គិតគូរ​យក​ចិត្ត​ទុកដាក់ ពី​សុខទុក្ខ​និង​ដោះស្រាយបញ្ហា​ប្រឈម​របស់​ប្រជាពលរដ្ឋ​ធ្វើ​យ៉ាងណា​ឱ្យ​ពួកគាត់​មាន​សេចក្តី​សុខ និង​ភាព​រីក​ចម្រើន។ ឯកឧត្តម ឧបនាយករដ្ឋមន្រ្តី បាន​ចូលរួម​អបអរ​សាទរ​ចំពោះ​ព្រះវិហារ​ថ្មី​ស្រឡាង​ ដែលមានរចនាបថ​យ៉ាង​ល្អ​ប្រណិតនិង​សមិទ្ធិផល នានា ជាច្រើន​ដ៏​វិសេស​វិសាល​ដែល​បាន​កកើត​ឡើង​ក្នុង​វត្ត​ជោតិ​រង្សី​ហៅ​វត្ត​បុស្ស​ក្រោម​ការចូលរួម​បរិច្ចាគ​ធនធាន​ផ្ទាល់​ខ្លួន​ដោយ​សទ្ធា​ជ្រះថ្លា​ពី​សប្បុរសជន និង​ប្រជាពុទ្ធ​បរិស័ទ​ជិត​ឆ្ងាយ ដើម្បីសម្រេច បាន​នូវ​ការ​កសាង​សមិទ្ធផល​សម្រាប់​តម្កល់​ទុក​ជា​សម្បត្តិ​គរុភ័ណ្ឌ​ ដើម្បី​ប្រើប្រាស់​ជា​ប្រយោជន៍​រួមរបស់​ព្រះសង្ឃ និង​ពុទ្ធបរិស័ទ​ក្នុង​ការ​គោរព​ប្រតិបត្តិ​តាម​ជំនឿ​បែប​ព្រះពុទ្ធ​សាសនា​។ ឯកឧត្តម​ឧបនាយករដ្ឋមន្រ្តី បាន​ចាត់ទុក​សមិទ្ធ​ផល​ទាំងឡាយ ដែល​បាន​កកើត​ឡើង​នា​ពេលនេះ ថា​ជា​ការ​រួម​ចំណែក ដើម្បីឧទ្ទិស​ដល់​ព្រះពុទ្ធ​សាសនា និង​ម្យ៉ាងទៀត ក៏​កើត​មាន​ឡើង​ដោយសារ​ការ​តម្រង់ទិស​គោល​នយោបាយរបស់​សម្តេច​អគ្គមហាសេនា​បតីតេជោ ហ៊ុន សែន នាយករដ្ឋមន្រ្តី ដែល​បាន​ខិតខំ​ធ្វើយ៉ាងណា​ឱ្យ​មាន​ភាពសុខដុម​នៅ​ក្នុង​សង្គមជាតិ​ តាមរយៈ​ការ​កំណត់​ថា​ព្រះពុទ្ធសាសនា ជា​សាសនា​របស់រដ្ឋ ប៉ុន្តែ​ក៏​បាន​ផ្តល់​សិទ្ធិសេរីភាព​ជូន​ប្រជាពលរដ្ឋ​ក្នុង​ការ​ជ្រើសរើស​សាសនា ដែល​ខ្លួន​មាន​ជំនឿ​ជឿជាក់​ ដោយ​គ្មាន​ការ​បង្ខិត​បង្ខំផងដែរ។ ឯកឧត្តម​ឧបនាយករដ្ឋមន្រ្តី បាន​លើកឡើង​ពី​គោល​នយោបាយ របស់​សម្តេចតេជោ ហ៊ុន សែននាយករដ្ឋមន្រ្តី ដែលថា​នៅ​ក្នុង​ព្រះរាជាណាចក្រ​កម្ពុជា បច្ចុប្បន្ននេះ ប្រជាពលរដ្ឋ​មាន​ភាព​សប្បាយ​រីករាយសុខដុមរមនា គឺ​ខុស​ពីជាង ៤០ឆ្នាំមុន ដែល​ប្រជាពលរដ្ឋ​​រស់នៅ​ក្នុង​ភាព​ភ័យខ្លាច លំបាក​វេទនា គ្មានសិទ្ធិសេរីភាព​អ្វីទាំងអស់​ ក្នុង​របប​កម្ពុជាប្រជាធិបតេយ្យ។ ភាព​សុខដុម​របស់​ប្រជាពលរដ្ឋ​លើ​គ្រប់ផ្នែក​គ្រប់វិស័យ រួមទាំង​វិស័យ​សាសនា​ផង​នោះ​អាច​កើត​ឡើង​បាន ក៏​អាស្រ័យ​ដោយ​ប្រទេសជាតិ​មាន​សុខសន្តិភាពស្ថិរភាព​នយោបាយ ដែល​ប្រមុខ​រាជរដ្ឋាភិបាល គឺ​សម្តេចតេជោ បាន​ខិត​ខំ​ប្រឹងប្រែង​រក​មក​បាន​ដោយ​លំបាកនិង​បន្ត​រក្សា​នូវ​សុខសន្តិភាព​នេះសម្រាប់ជា​ប្រយោជន៍​ជាតិ​និង​ប្រជាជន ដូច្នេះ​ហើយ​ទើប​សម្តេចតេជោ តែង​តែ​បាន​លើកឡើ​ង​នូវ​ពាក្យ​ថា​អរគុណ​សន្តិភាព និង​ចូលរួម​អរគុណ​សន្តិភាព​ទាំងអស់​គ្នា ដោយ​ធ្វើ​យ៉ាងណា​រួមគ្នា ថែរក្សា​សុខសន្តិភាព នេះឱ្យ​បា​ន​ស្ថិត​ស្ថេរ​គង់វង្ស​ជានិច្ច​និរន្តរ៍ ដើម្បី​ឱ្យ​កម្ពុជា​ឈាន​ឆ្ពោះ​ទៅរកវឌ្ឍនភាព និង​ការអភិវឌ្ឍ​លើ​គ្រប់​វិស័យ​ ប្រជាពលរដ្ឋ​មាន​ជីវភាព​ធូរធារ បាន​រស់នៅ​ជួបជុំ​គ្នា​ប្រកប​ដោយភាពសុខដុម​រមនា​បន្ត​រហូត​ដល់​កូន​ចៅ​ជំនាន់​ក្រោយៗ​ទៀត។ ម្យ៉ាងទៀត​ក៏​ត្រូវ​រួមគ្នា​អនុវត្ត​វិធានការ​អនាម័យ​តាម​ការ​ណែនាំ​របស់​ក្រសួង​សុខាភិបាល​ឱ្យ​បាន​ខ្ជាប់ខ្ជួន​ ដើម្បី​ទប់​ស្កាត់​ការ​ឆ្លង​រាតត្បាត​ពី​ជំងឺ​កូវីដ​ ១៩ ឱ្យ​មាន​ប្រសិទ្ធភាព​ផងដែរ។​ ក្នុងឱកាសនោះ ឯកឧត្តម​ឧបនាយករដ្ឋមន្រ្តី ជា សុផារ៉ា បាន​នាំយក​ថវិកា​របស់សម្តេច​តេជោ ហ៊ុន សែន ទៅ​ប្រគេន​ដល់​ព្រះចៅ​អធិការ​វត្ត​ជោតិរង្សី ហៅវត្តបុស្ស នេះ ចំនួន ៣០ ០០០ ដុល្លារ ទុកសម្រាប់​បង្រ្គប់​ថ្លៃ​ជាង​សាងសង់ និង​បាន​ផ្តល់​ជូន​ លោកតា លោកយាយ ១០០នាក់ ម្នាក់ៗក្រណាត់ស ១ដុំ ថវិកា ១ម៉ឺនរៀល លោកគ្រូ អ្នកគ្រូ ៣៣នាក់ និង គ្រូពេទ្យ ១០នាក់ ម្នាក់ៗទទួលបានសារុង១ ថវិកា ១ម៉ឺនរៀល និង​សិស្សា​នុសិស្ស ៣០០ នាក់ ម្នាក់ៗទទួលបានសម្ភារ​សិក្សា និង​ថវិកា ៥ ០០០រៀល និង​ឧបត្ថម្ភថវិកា​ជូន​សាលាស្រុកមេមត់ ១លានរៀល និង​សាលាឃុំរូង ចំនួន ៥០ម៉ឺនរៀល ព្រមទាំងបានបំពាក់​គ្រឿង​ឥស្សរិយយស​ដល់​បុគ្គល​ ដែល​មាន​ស្នាដៃ​ក្នុង​ការ​ជួយ​កសាង​សមិទ្ធផល​នានា​ បម្រើ​ឱ្យ​វិស័យព្រះពុទ្ធ​សាសនា​ក្នុង​វត្ត​នេះ​ផងដែរ៕












សារស្វាគមន៍

ឯកឧត្តម​ ជា​ សុផារ៉ា

ឧបនាយករដ្ឋមន្រ្តី រដ្ឋមន្ត្រី​ក្រសួង​រៀបចំ​ដែនដី នគរូប​នីយកម្ម និង​សំណង់

អាជ្ញាប័ណ្ណវិស័យសំណង់
ឯកសារវីឌីអូរ
ចំនួនអ្នកទស្សនា
ថ្ងៃនេះ :
111026
ម្សិលមិញ :
093868
សរុប :
9654677
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលណទ្រព្យនៅកម្ពុជា