ឯកឧត្តមទេសរដ្ឋមន្រ្តី ជា សុផារ៉ា អញ្ជើញជាអធិបតីភាពក្នុងពិធីសម្ពោធឆ្លងឧបដ្ឋានសាលា និងសមិទ្ធផលនានានៅវត្តសិលារតនារាម ហៅវត្តថ្ម ស្រុកត្បូងឃ្មុំ

February 04, 2018

ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតីភាពក្នុងពិធីសម្ពោធឆ្លងឧបដ្ឋានសាលា និងសមិទ្ធផលនានានៅវត្តសិលារតនារាម ហៅវត្តថ្មពេជ្រ ស្ថិតនៅឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ នាព្រឹកថ្ងៃអាទិត្យ ៤រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី ០៤ ខែកុម្ភៈ ឆ្នាំ២០១៨។
លោក កេង ប៊ុនណា អភិបាលស្រុកត្បូងឃ្មុំ បានឱ្យដឹងថា វត្តសិលារតនារាម ហៅវត្តថ្មពេជ្រ បានកសាងឡើងក្នុងអំឡុងឆ្នាំ ១៩២០ លើផ្ទៃដី ២.៩៧ហិកតា ក្រោមការផ្ដួចផ្ដើមដឹកនាំកសាងដោយព្រះគ្រូចៅអធិការព្រះមានកែវ។ នៅក្នុងរបប ប៉ុល ពត ទីអារាមនេះត្រូវបានគេយកធ្វើជាឃ្លាំងជី និងជាកន្លែងចិញ្ចឹមសត្វ ចំណែកព្រះសង្ឃត្រូវបានបង្ខំផ្សិកឱ្យទៅធ្វើការនៅតាមកងចល័ត និងការដ្ឋានផ្សេងៗ។ ក្រោយថ្ងៃរំដោះ ៧មករា ១៩៧៩ ទីអារាមនេះ ត្រូវបានផ្ដួចផ្ដើមកសាងឡើងវិញដោយព្រះគ្រូចៅអធិការ ព្រះសង្ឃ គណៈកម្មាវត្ត អាចារ្យ និងប្រជាពុទ្ធបរិស័ទចំណុះជើងវត្ត ដោយមានការគាំទ្រពីរណសិស្សសាមគ្គីសង្គ្រោះជាតិកម្ពុជា (រណសិស្សសាមគ្គីអភិវឌ្ឍមាតុភូមិកម្ពុជា)។
ក្នុងឱកាសនោះដែរ ឯកឧត្តមទេសរដ្ឋមន្រ្តី ជា សុផារ៉ា បាននាំមកនូវប្រសាសន៍ផ្ដាំផ្ញើសាកសួរសុខទុក្ខពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជូនដល់ប្រជាពលរដ្ឋនៅក្នុងឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ ដែលជានិច្ចកាលសម្ដេចតែងតែគិតគូរយកចិត្តទុកដាក់ពីសុខទុក្ខ ក្ដីកង្វល់ បញ្ហាប្រឈម និងសំណូមពរនានារបស់ប្រជាពលរដ្ឋ និងខិតខំរិះរកគ្រប់មធ្យោបាយ ដើម្បីដឹកនាំប្រទេសឱ្យឈានឆ្ពោះទៅរកវឌ្ឍនភាព និងកាត់បន្ថយភាពក្រីក្ររបស់ប្រជាពលរដ្ឋឱ្យនៅកម្រឹតទាបបំផុត។
ឯកឧត្តមទេសរដ្ឋមន្រ្តី ជា សុផារ៉ា បានមានប្រសាសន៍ថា សមិទ្ធផលដែលកើតឡើងនៅពេលនេះ គឺជាការខិតខំប្រឹងប្រែងរបស់ព្រះគ្រូចៅអធិការ ព្រះសង្ឃ លោកតាអាចារ្យ គណៈកម្មាវត្ត និងប្រជាពុទ្ធបរិស័ទជិតឆ្ងាយ បានផ្ដូចផ្ដើមកសាងសមិទ្ធផលនេះឡើង ដើម្បីឧទ្ទេសដល់វិស័យព្រះពុទ្ធសាសនា ជាទីកន្លែងសម្រាប់ប្រជាពុទុ្ធបរិស័ទជិតឆ្ងាយរៀបចំពិធីបុណ្យតូចធំផ្សេងៗ និងជាទីកន្លែងសម្រាប់សិក្សារៀនសូត្រផងដែរ។ ម្យ៉ាងសមិទ្ធិផលដែលកើតឡើងនៅពេលនេះបានបង្ហាញពីការជឿជាក់ និងសាមគ្ដីគ្នាដ៏រឹងមាំរបស់ព្រះគ្រូចៅអធិការ ព្រះសង្ឃ លោកតាអាចារ្យ គណៈកម្មាវត្ត និងប្រជាពុទ្ធបរិស័ទជិតឆ្ងាយ។ យ៉ាណាមិញ ប្រជាពលរដ្ឋនៅទូទាំងប្រទេសមានជំនឿជឿជាក់លើរាជរដ្ឋាភិបាល បានធ្វើឱ្យរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ កាន់តែមានទឹកចិត្តពុះពារគ្រប់ឧបសគ្គ ដើម្បីដឹកនាំប្រទេសចាប់តាំងពីបានរំដោះប្រទេសជាតិឱ្យរួចផុតពីរបបដ៏ខ្មៅងងិត ប៉ុល ពត មកសម្ដេចបានខិតខំគ្រប់បែបយ៉ាងដើម្បីធ្វើយ៉ាងណាការពារកុំឱ្យមានបដិវត្តន៍ពណ៌កើមានឡើង ការពារសន្ដិភាព ស្ថេរភាពនយោបាយ និងមិនអនុញ្ញាតឱ្យបរទេស ឬ ជនអគតិណាមកបំផ្លាញសន្ដិភាព ស្ថេរភាពនយោបាយ និងសមិទ្ធិផលនានាដែលជាតិ និងប្រជាជនបានខិតខំប្រឹងកសាងតាំងពីបាតដៃទទេ រហូតដល់មានសមិទ្ធិផលគួរជាទីមោទនៈដូចសព្វថ្ងៃនេះឡើយ។ ទន្ទឹមនេះ ឯកឧត្តមទេសរដ្ឋមន្រ្តី បានសំណូមពរឱ្យប្រជាពលរដ្ឋទាំងអស់កុំជឿតាមការញុះញុងរបស់ជនបរទេស ឬ ជនអគតិមួយចំនួន ដែលមានគំនិតចង់ធ្វើបដិវត្តន៍ដែលអាចបណ្ដាលឱ្យប្រទេសធ្លាក់ក្នុងភ្នក់ភ្លើងសង្គ្រាមដូចអតីតកាល។ ជាក់ស្ដែងក្នុងរបបសង្គមរាស្រ្តនិយមដែលដឹកនាំដោយ ព្រះករុណា ព្រះនរោត្តមសីហនុ ព្រះបរមរតកោដ បានធ្វើឱ្យប្រទេសជាតិរីកចំរើនលើគ្រប់វិស័យ ប៉ុន្តែដោយសារមានការញុះញុងពីសហរដ្ឋអាមេរិក នៅឆ្នាំ១៩៧០ លន់ ណុល បានទំលាក់ព្រះអង្គចេញពីតំណែង ធ្វើឱ្យប្រទេសជាតិធ្លាក់ក្នុងភ្លើងសង្គ្រាមដ៏រ៉ាំរ៉ៃ ជាពិសេសបន្ទាប់ពី លន់ ណុល ធ្លាក់ពីតំណែងបានបន្តឱ្យប្រទេសជាតិជួបសោកនាដកម្មដ៏ធ្ងន់ធ្ងរ គឺរបប ប៉ុល ពត ប្រជាជននៅទូទាំងប្រទេសត្រូវបានបង្ខំឱ្យធ្វើការហួសកម្លាំង ហូបចុកមិនគ្រប់គ្រាន់ ថែមទាំងសម្លាប់ប្រជាជនស្លូតត្រង់រាប់លាននាក់។ ម្យ៉ាងនៅមជ្ឈឹមបូព៌ាសព្វថ្ងៃនេះ ក៏កំពុងតែជួបប្រទះនៅសង្គ្រាមស៊ីវិលរ៉ាំរ៉ៃ ដែលបានកើតចេញពីការធ្វើបដិវត្តន៍ផ្ដួលរំលំរបបដឹកនាំចាស់ ដាក់របបដឹកនាំថ្មី ធ្វើឱ្យប្រជាជនត្រូវបង្ខំចាកចេញពីមាតុភូមិរបស់ខ្លួនទៅសុំការជ្រកកោនពីបណ្ដាប្រទេសជិតខាង ដោយសារតែក្នុងប្រទេសមានតែមូលដ្ឋានទ័ព។ ដូច្នេះ ឯកឧត្តមទេសរដ្ឋមន្រ្តី ស្នើឱ្យប្រជាពលរដ្ឋទាំងត្រូវបន្តការគាំទ្រ និងមានជំនឿជឿជាក់លើរាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ ដើម្បីការពារសន្ដិភាព ស្ថេរភាពនយោយ និងការពារបូរណភាពទឹកដី និងបន្តអភិវឌ្ឍប្រទេសជាតិឱ្យបានរីកចម្រើនបន្ថែមទៀត។
ក្នុងឱកាសនោះដែរ ឯកឧត្តមទេសរដ្ឋមន្រ្តី ជា សុផារ៉ា ក៏នាំយកថវិកា សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រគេនដល់វត្តសិលារតនារាម ហៅវត្តថ្មពេជ្រ ចំនួន ៤.៥០០ ដុល្លារសហរដ្ឋអាមេរិក តាជីយាយជី ១០០នាក់ ម្នាក់ៗសារុង១ ថវិកា ១ម៉ឺនរៀល លោកគ្រូ អ្នកគ្រូ និងគ្រូពេទ្យ ២៤នាក់ ម្នាក់ៗសារុង១ និងថវិកា១ម៉ឺនរៀល និងសិស្សានុស្ស ៣៣០នាក់ ម្នាក់ៗប៊ិច១ដើម សៀវភៅ ២ក្បាល និងថវិកា ៥,០០០រៀល។ ដោយឡែកជូនដល់គណៈកម្មការសាងសង់នៅភូមិទួលអូពី ១.៥០០ដុល្លារ អនុវិទ្យាល័យថ្មពេជ្រ ១០០០ដុល្លារ និងសាលាបឋមសិក្សាទួលគោក ២លានរៀល ផងដែរ បន្ទាប់មកទៀត ឯកឧត្តមទេសរដ្ឋមន្រ្តី បានអញ្ជើញកាត់ខ្សែបូដាក់សម្ពោធឆ្លងឧបដ្ឋានសាលា និងសមិទ្ធផលនានានៅវត្តសិលារតនារាម ហៅវត្តថ្មពេជ្រ ចាប់ពីពេលនោះតទៅ៕