លោកជំទាវ អ៊ូ វ័ឌី បើកសិក្ខាសាលាផ្សព្វផ្សាយស្ដីពី ការយល់ដឹងទូទៅនៃឥទ្ធិពលគ្រឿងញៀន ទៅលើការរីករាលដាលនៃការឆ្លងមេរោគអេដស៍ ជម្ងឺអេដស៍ និងផែនការយុទ្ធសាស្រ្តជាតិស្ដីពីសិទ្ធិជនពិការ

February 22, 2018

លោកជំទាវ អ៊ូ វ័ឌី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ អញ្ជើញជាធិបតីក្នុងពិធីបើកសិក្ខាសាលាផ្សព្វផ្សាយស្ដីពី ការយល់ដឹងទូទៅនៃឥទ្ធិពលគ្រឿងញៀន ទៅលើការរីករាលដាលនៃការឆ្លងមេរោគអេដស៍ ជម្ងឺអេដស៍ និងផែនការយុទ្ធសាស្រ្តជាតិស្ដីពីសិទ្ធិជនពិការ នៅព្រឹកថ្ងៃព្រហស្បតិ៍ ៨កើត ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី ២២ ខែកុម្ភៈ ឆ្នាំ២០១៨។

លោកជំទាវ ទិត្យ ច័ន្ទតារីន អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា គ្រឿញៀន និងជម្ងឺអេដស៍ គឺជាឃាតករដ៏កំណាចមួយដែលសម្លាប់មនុស្សអស់ជាច្រើនលាននាក់នៅលើពិភពលោក។ ដោយឡែកនៅក្នុងព្រះរាជាណាចក្រកម្ពុជា ក៏គេចមិនផុតពីគ្រោះដ៏កាចសាហាវនេះដែរ តែដោយសារការដឹកនាំដ៏ឈ្លាសវៃ និងប៉ិនប្រសព្វប្រកបដោយគតិបណ្ឌិតរបស់ សម្ដេចតេជោ ហ៊ុន សែន ដែលមានគោលនយោបាយ និងសកម្មភាពច្បាស់លាស់ ទើបការប្រយុទ្ធប្រឆាំងគ្រឿងញៀន និងជម្ងឺអេដស៍ ទទួលបានជោគជ័យជាបន្តបន្ទាប់គួរឱ្យកត់សម្គាល់ តាមរយៈផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបទៅនឹងការទប់ស្កាត់បន្សាបនៃការរីរាលដាលនៃជម្ងឺ និងឆ្លងតាមការប្ដេជ្ញាចិត្ត និងសម្រេចឱ្យបាននូវគោលដៅបីសូន្យ ត្រឹមឆ្នាំ២០២៥ នៃសន្និបាតបូកសរុបលទ្ធផលការងារឆ្នាំ២០១៧ និងទិសដៅផែនការសកម្មភាពការងារប្រចាំឆ្នាំ២០១៨ ២០១៨ របស់អជ្ញាធរជាតិប្រយុទ្ធប្រឆាំងនឹងជម្ងឺអេដស៍។

ក្នុងឱកាសនោះដែរ លោកជំទាវ អ៊ូ វ័ឌី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានសម្ដែងនូវការកោតសរសើរចំពោះ ឯកឧត្តម លោកជំទាវ ប្រធានគណៈកម្មាធិការប្រយុទ្ធប្រឆាំងនឹងមេរោគអេដស៍ ជម្ងឺអេដស៍ គ្រប់ក្រសួងស្ថាប័ន ដែលបានរួមចំណែកយ៉ាងសកម្មក្នុងការប្រយុទ្ធប្រឆាំងនឹងគ្រឿងញៀន ប្រយុទ្ធប្រយុទ្ធប្រឆាំងនឹងមេរោគអេដស៍ ជម្ងឺអេដស៍ និងជាការគាំពារដល់ជនពិការប្រកបដោយឆន្ទៈមោះមុតក្នុងការជួយផ្សព្វផ្សាយ និងចូលរួមគ្រប់សកម្មភាពដើម្បី ប្រយុទ្ធប្រឆាំងនឹងជម្ងឺដ៏កាចសាហាវនេះ ក្នុងន័យកាត់បន្ថយអត្រាមរណៈ កាត់បន្ថយការរើសអើង និងការមាក់ងាយចំពោះអ្នកផ្ទុកមេរោគអេដស៍ និងជម្ងឺអេដស៍ និងខិតខំតាមដាន ទប់ស្កាត់ការជួញដូរគ្រឿងញៀន និងសេពគ្រឿងញៀន។ លោកជំទាវ បានបន្តថា ក្រោមការដឹកនាំរបស់សម្ដេចតេជោ ហ៊ុន សែន ដែលមានចក្ខុវិស័យច្បាស់លាស់ ក្នុងការប្រយុទ្ធប្រឆាំងនឹងជម្ងឺដ៏៏គ្រោះថ្នាក់នេះ បានធ្វើការប្រយុទ្ធនឹងជម្ងឺអេដស៍ ទទួលបានជោគជ័យគួរឱ្យកត់សម្គាល់ វឌ្ឍនភាព ប្រសិទ្ធភាព និងសមិទ្ធផលក្នុងការប្រយុទ្ធនឹងជម្ងឺអេដស៍ ដែលព្រះរាជាណាចក្រកម្ពុជាទទួលបានគឺបញ្ជាក់ច្បាស់ថា រាជរដ្ឋាភិបាលកម្ពុជា មានទស្សនៈវិស័យក្នុងការកសាងសង្គមជាតិមួយដែលគ្មានការគម្រាមកំហែង គ្មានការរើសអើង ពិតជាអាចសម្រេចបានគោលដៅដែលបានដាក់ចេញ។ បច្ចុប្បន្នកម្ពុជាអាចផ្ដល់នូវការព្យាបាលដោយឱសថប្រឆាំងនឹងមេរោគអេដស៍ ទៅដល់អ្នកផ្ទុកមេរោគអេដស៍ដែលកំពុងត្រូវការបានរហូតដល់ ៩៧ភាគរយ។
ទន្ទឹមនេះ លោកជំទាវ បានបន្ថែមទៀតថា រាជដ្ឋាភិបាលកម្ពុជាក៏បាននឹងកំពុងយកចិត្តទុកដាក់ដល់ជនពិការគ្រប់រូបនៅទូទាំងព្រះរាជាណាចក្រកម្ពុជាផងដែរ។ តាមរយៈយុទ្ធសាស្រ្តជាតិស្ដីពី សិទ្ធិជនពិការ ក្រសួងរៀបចំដែនដី នគរូបនីយកម្ម និងសំណង់ បានរួមចំណែកអនុវត្ត និងបានយកចិត្តទុកដាក់ដល់ជនពិការទូទៅ តាមរយៈការរៀបចំបទដ្ឋានគិតិយុត្ត ដោយបានដាក់បញ្ចូលខ្លឹមសារមួយចំនួនដើម្បីបង្កលក្ខណៈងាយស្រួលដល់ជនពិការគ្រប់រូប ក្នុងនោះក្រសួងបានផ្ដល់អាទិភាពដល់ជនពិការគ្រប់រូបដែលមានកម្រឹតវប្បធម៌ចាប់ពីថ្នាក់បរិញ្ញាបត្រ មានសិទ្ធិដាក់ពាក្យប្រឡងចូលជាមន្រ្តីរាជការរបស់ក្រសួង។ បច្ចប្បន្នក្រសួងមានមន្រ្តីជាជនពិការ ចំនួន ៣២នាក់ ស្រី០៦នាក់។ ជនពិការមួយចំនួនធំ ថ្វីត្បិតតែការពិការអវៈយវៈ តែពួកគាត់មានសតិបញ្ញាគ្រប់គ្រាន់អាចបម្រើការងារទៅតាមជំនាញរបស់ខ្លួន ជូនដល់ក្រសួងបានយ៉ាងល្អប្រសើរទៀតផង។ ថ្មីៗនេះ ក្នុងឱកាសទិវាជនពិការលើកទី១៩ ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានចេញលិខិតជម្រាបជូនឯកឧត្តម លោកជំទាវ អភិបាលនៃគណៈអភិបាលរាជធានី ខេត្ត និងជាប្រធានគណៈកម្មាធិការរៀបចំដែនដីនិងនគរូបនីយកម្ម ថ្នាក់រាជធានីខេត្ត ត្រូវចូលរួមកិច្ចការពារ និងលើកកម្ពស់សិទ្ធិជនពិការ ដោយចាត់ចែងឱ្យមានហេដ្ឋារចនាសម្ព័ន្ធ ទីកន្លែង បរិក្ខារ និងសេវាសម្រាប់ជនពិការគ្រប់ប្រភេទ ដូចជាការរៀបចំផ្លូវជម្រាល ផ្លូវដើរ ជណ្ដើរ បង្កាន់ដៃសុវត្ថិភាព ភ្លើងសញ្ញា ស្លាកសញ្ញា និងបរិក្ខារជំនួយសុវត្ថិភាពផ្សេងៗសម្រាប់ជនពិការ៕