ឯកឧត្តមឧបនាយក រដ្ឋមន្រ្តី ជា សុផារ៉ា ដឹកនាំកិច្ចប្រជុំក្រុមការងារតម្រង់ទិស ដើម្បីដោះស្រាយបញ្ហាសំណង់ខុសច្បាប់ និងដីធ្លីក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមគ្រប់គ្រងរបស់អាជ្ញាធរជាតិអប្សរា

August 04, 2022

នាព្រឹកថ្ងៃព្រហស្បតិ៍ ៧កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៤ ខែសីហា ឆ្នាំ ២០២២ ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អញ្ជើញជាអធិបតីភាពដឹកនាំកិច្ចប្រជុំក្រុមការងារតម្រង់ទិស ដើម្បីដោះស្រាយបញ្ហាសំណង់ខុសច្បាប់ និងដីធ្លីក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា តាមប្រព័ន្ធ Zoom។ក្នុងកិច្ចប្រជុំនេះ ឯកឧត្តមឧបនាយករដ្ឋមន្ត្រី ជា សុផារ៉ា បានឱ្យដឹងថាកន្លងមកដោយសារតែមានការកើតឡើងនូវសំណង់ខុសច្បាប់ ក្នុងតំបន់រមណីយដ្ឋានអង្គរ និងនៅពេលដែលការដោះស្រាយបញ្ហានេះមិនស៊ីសង្វាក់គ្នារវាងអាជ្ញាធរខេត្ត និងអាជ្ញាធរជាតិអប្សរានោះ ទើបប្រមុខរាជរដ្ឋាភិបាល គឺសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្រ្តី បានចេញសេចក្តីសម្រេចតែងតាំងសមាសភាពក្រុមការងារថ្នាក់ជាតិតម្រង់ទិសដែលមាន ឯកឧត្តមឧបនាយករដ្ឋមន្ត្រី ផ្ទាល់ ជាប្រធាន លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈជាអនុប្រធាន ឯកឧត្តម ទៀ សីហា អភិបាលខេត្តសៀមរាប ជាអនុប្រធាន ឯកឧត្តម ស៊ុំ ម៉ាប់ រដ្ឋលេខាធិការក្រសួងវប្បធម៌និងវិចិត្រសិល្បៈ ជាអនុប្រធានអចិន្ត្រៃយ៍ និងសមាសភាព ៩រូបទៀតមកពីក្រសួងស្ថាប័នពាក់ព័ន្ធជាសមាជិក ក្នុងគោលបំណងដើម្បីដោះស្រាយបញ្ហាសំណង់ខុសច្បាប់ និងដីធ្លីក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។ ឆ្លងតាមការពិភាក្សាលើបញ្ហាស្មុគស្មាញជាច្រើនយ៉ាងផុសផុលរួចមក ឯកឧត្តមឧបនាយករដ្ឋមន្រ្តី ជា សុផារ៉ា ក្នុងនាមប្រធានអង្គប្រជុំ បានសម្រេចចដោះស្រាយមួយជំហានម្តងៗ ដោយក្នុងនោះបានសម្រេចដាក់វិធានការថា រាល់លិខិតស្នាមផ្សេងៗដែលរដ្ឋបាលខេត្តត្រូវធ្វើនៅខាងអាជ្ញាធរជាតិអប្សរានោះ គឺមិនត្រូវធ្វើទៀតនោះទេ ចៀសវាងមានបញ្ហារំខាន ឬខុសឆ្គង ដោយប្រការផ្សេងៗខាងផ្នែករដ្ឋបាល ដែលនាំឱ្យប៉ះពាល់ដល់ ផលប្រយោជន៍រួមរបស់ជាតិ និងប្រជាជន ហើយមិនត្រូវមានការពិភាក្សាអំពីការធ្វើបណ្ណកម្មសិទ្ធពិសេសណាមួយនៅក្នុងតំបន់អង្គរទេ ទាំងបច្ចុប្បន្ន និងទៅអនាគត។ ជាមួយនេះ ឯកឧត្តមឧបនាយករដ្ឋមន្ត្រី ជា សុផារ៉ា បានបង្ហាញពីការគាំទ្របន្ថែមទៀតដល់ក្រុមការងារ ដើម្បីធានាឱ្យដំណើរការការងារដោះស្រាយសម្របសម្រួលបញ្ហាសំណង់ខុសច្បាប់ និងដីធ្លីក្នុងតំបន់រមណីយដ្ឋានអង្គរនេះបានប្រព្រឹត្តទៅដោយរលូន និងមានប្រសិទ្ធភាពពិតប្រាកដ៕