ឯកឧត្តមឧបនាយករដ្ឋមន្ត្រី ជា សុផារ៉ា ដឹកនាំកិច្ចប្រជុំត្រួតពិនិត្យវឌ្ឍនភាពនៃការដោះស្រាយផលប៉ះពាល់ ចំពោះអ្នកកាន់កាប់ដីធ្លី និងសំណង់ខុសច្បាប់ ក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរាក្នុងក្រុងសៀមរាប ខេត្តសៀមរាប

September 01, 2022

នៅព្រឹកថ្ងៃព្រហស្បតិ៍ ៦កើត ខែភទ្របទ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០១ ខែកញ្ញា ឆ្នាំ២០២២ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារតម្រង់ទិស បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពនៃការដោះស្រាយផលប៉ះពាល់ ចំពោះអ្នកកាន់កាប់ដីធ្លី និងសំណង់ខុសច្បាប់ ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ក្នុងក្រុងសៀមរាប ខេត្តសៀមរាប។

ក្នុងកិច្ចប្រជុំនេះ ឯកឧត្តមឧបនាយករដ្ឋមន្ត្រី ជា សុផារ៉ា បានកោតសរសើរ និងថ្លែងអំណរគុណដល់ក្រុមការងារទាំងអស់ រួមទាំងអាជ្ញាធរជាតិអប្សរា និងរដ្ឋបាលដែនដី ដែលបានខិតខំបំពេញភារកិច្ចតាមការចង្អុរបង្ហាញរបស់ប្រមុខរាជរដ្ឋាភិបាល សំដៅឆ្លើយតបឱ្យមានប្រសិទ្ធភាពនូវយុទ្ធសាស្ត្រ និងសកម្មភាពជាក់ស្ដែងក្នុងការពារតំបន់អង្គរជាមួយនឹងការប្ដេជ្ញាចិត្តរក្សាឱ្យបាននូវតម្លៃដ៏លេចធ្លោជាសកលរបស់អង្គរ។ ឯកឧត្តមឧបនាយករដ្ឋមន្ត្រី បានថ្លែងអំណរគុណដល់រដ្ឋបាលថ្នាក់ក្រោមជាតិ ដែលបានខិតខំបំពេញភារកិច្ចក្នុងការចលនាប្រជាពលរដ្ឋឱ្យសហការចូលរួមជាមួយនឹងក្រុមការងារតម្រង់ទិស ដើម្បីទទួលយកនូវសំណើ ឬលក្ខខណ្ឌ ដំណោះស្រាយនានា ដែលក្រុមការងារបានផ្តល់ជូន។ ឯកឧត្តមឧបនាយករដ្ឋមន្ត្រី បញ្ជាក់ថាថ្វីត្បិតតែប្រជាពលរដ្ឋមានមនោសញ្ចេតនាស្រឡាញ់នឹករលឹកដល់ទីកន្លែង ដែលខ្លួនធ្លាប់រស់នៅយ៉ាងណាក្តី ប៉ុន្តែនេះជាលក្ខខណ្ឌតម្រូវ ជាគោលដៅដែលយើងត្រូវឱ្យពួកគាត់ផ្លាស់ទីលំនៅថ្មីនៅភូមិធម្មជាតិរុនតាឯក ហើយទីបំផុតពួកគាត់ក៏បានទទួលយកនូវសំណូមពររបស់ក្រុមការងារ ដោយក្នុងនោះនៅសេសសល់តែកន្លែងលក់ដូរប៉ុណ្ណោះ ដែលក្រុមការងារតម្រង់ទិសកំពុងតែចលនាឱ្យពួកគាត់យល់ព្រមទទួលយកតាមគោលការណ៍របស់ក្រុមការងារផងដែរ។ ឯកឧត្តមឧបនាយករដ្ឋមន្ត្រី ជា សុផារ៉ា បានបន្ថែមថាការជួបជុំគ្នានាពេលនេះ គឺដើម្បីប្រជុំពិភាក្សាស្វែងរកយុទ្ធសាស្រ្ត និងដំណោះស្រាយបន្តទៀតលើផលប៉ះពាល់ចំពោះអ្នកកាន់កាប់ដីធ្លី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ដើម្បីឱ្យកិច្ចការនេះបានបញ្ចប់ទៅដោយរលូនមានប្រសិទ្ធភាព និងមានការយោគយល់ព្រមព្រៀងទទួលយកពីប្រជាពលរដ្ឋដោយស្ម័គ្រចិត្តគ្មានការបង្ខិតបង្ខំ។

សូមបញ្ជាក់ថាតំបន់រមណីយដ្ឋានអង្គរដែលបានចុះបញ្ជីបេតិកភណ្ឌពិភពលោកនេះមានផ្ទៃដី ៤០១ គីឡូម៉ែត្រក្រឡា ដែលជាផ្ទៃដីត្រូវរក្សាការពារដាច់ខាតដោយចែកចេញជាបីតំបន់ធំៗ។ យោងតាមសេចក្តីសម្រេចរបស់រាជរដ្ឋាភិបាលលេខ ៧០ ស.ស.រ ចុះថ្ងៃទី ១៦ ខែវិច្ឆិកាឆ្នាំ២០០៤ ស្ដីពីការកំណត់បទដ្ឋាននៃការប្រើប្រាស់ដីធ្លីនៅតំបន់១ និងតំបន់២ នៅក្នុងរមណីយដ្ឋានអង្គរបានកំណត់ថា ដីធ្លីក្នុងតំបន់១ និងតំបន់២ ជាទ្រព្យសម្បត្តិសាធារណៈរបស់រដ្ឋ ដែលអាជ្ញាធរជាតិអប្សរាមានកាតព្វកិច្ចត្រូវគ្រប់គ្រងថែរក្សានិងអភិវឌ្ឍន៍ប្រកបដោយចីរភាព រីឯប្រជាពលរដ្ឋដែលមានលំនៅឋានរស់នៅជាយូរលង់មកហើយនៅក្នុងតំបន់១ និងតំបន់២ នេះ អាចបន្តរស់នៅតទៅទៀតបានដោយមិនមានការបណ្ដេញឱ្យចាកចេញពីមូលដ្ឋានឡើយ។ ប៉ុន្តែក្នុងករណីនេះ ក្រសួងរៀបចំដែនដី នគររូបនីយកម្ម និងសំណង់ មិនមានការចេញបណ្ណកម្មសិទ្ធិដោយឡែកសម្រាប់អ្នករស់នៅក្នុងតំបន់១ និងតំបន់២ នោះទេ ហើយក៏មិនអនុញ្ញាតឱ្យមានការទាញយកផលប្រយោជន៍តាមរយៈការផ្លាស់ប្ដូរកម្មសិទ្ធិកាន់កាប់ដីធ្លីនិងអាស្រ័យផលទៅជនដទៃទៀតដែលមិនបានទទួលសិទ្ធិក្នុងការរស់នៅតំបន់នេះដែរ៕