តាម ឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ បានបញ្ជាក់ថា ដោយមើលឃើញពីការរីកចម្រើនខ្លាំងក្លាលើវិស័យបាល់ទាត់ ដែលមានការពេញនិយមពីយុវជន និងស្របតាមតម្រូវការនៃការបណ្ដុះបណ្ដាលថ្នាលកីឡាបាល់ទាត់ឱ្យកាន់តែមានគុណភាពនិងសមត្ថភាពខ្ពស់សម្រាប់ខេត្តកំពង់ស្ពឺ ក៏ដូចជាប្រទេសកម្ពុជាផងនោះ កីឡដ្ឋានខេត្តកំពង់ស្ពឺត្រូវបានសាងសង់ឡើងក្រោមគំនិតផ្ដួចផ្ដើមរបស់ឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ ព្រមទាំងសមាជិកសមាជិការដ្ឋសភា ព្រឹទ្ធសភារួមជាមួយរដ្ឋបាលខេត្តកំពង់ស្ពឺ និងវិស័យឯកជននានា បានចូលរួមក្នុងការរៀបចំគម្រោងសាងសង់កីឡដ្ឋានបាល់ទាត់ខេត្តកំពង់ស្ពឺ ក្នុងស្មារតីរួមសាមគ្គីគ្នាដើម្បីលើកកម្ពស់មុខមាត់ និងកិត្យានុភាពខេត្តកំពង់ស្ពឺផង និងក្នុងគោលបំណងចូលរួមចំណែកជាមួយរាជរដ្ឋាភិបាលក្នុងការអភិវឌ្ឍន៍លើវិស័យកីឡានៅកម្ពុជាឱ្យកាន់តែរីកចម្រើន ឆ្ពោះទៅធ្វើជាម្ចាស់ផ្ទះនៃការប្រកួតកីឡាស៊ីហ្គេមឆ្នាំ ២០២៣ ខាងមុខនេះផងដែរ។ ឯកឧត្តម វ៉ី សំណាង បានឱ្យដឹងថាកីឡដ្ឋានខេត្តកំពង់ស្ពឺ បានចាប់ផ្ដើមបើកការដ្ឋានសាងសង់នៅថ្ងៃទី ២១ ខែកុម្ភៈ ឆ្នាំ ២ឥ២១ និងបានបញ្ចប់ការសាងសង់នៅថ្ងៃទី២១ ខែសីហា ឆ្នាំ២០២២ ដោយមានការសិក្សាបច្ចេកទេសប្លង់ស្ថាបត្យកម្ម ដោយក្រុមហ៊ុនមេគង្គខូអិលធីឌី និងសាងសង់លើផ្ទៃដីមានទំហំ ៤៣ ៤០២ ម៉ែត្រក្រឡា មានទីតាំងស្ថិតនៅតាមបណ្ដោយផ្លូវជាតិលេខ៤៤ ចម្ងាយប្រមាណជាង ៤គីឡូម៉ែត្រ ពីផ្លូវជាតិលេខ៤ ស្ថិតនៅភូមិតាម៉ុល សង្កាត់ច្បារមន ក្រុងច្បារមន។ គម្រោងសាងសង់កីឡដ្ឋានខេត្តកំពង់ស្ពឺ ត្រូវបានកសាងជាពីរដំណាក់កាល គឺដំណាក់កាលសាងសង់របងព័ទ្ធជុំវិញប្រវែង ៨០០ ម៉ែត្រ និងក្លោងទ្វារធំទាំងពីរនៃកីឡដ្ឋាន និងបន្ទាប់មកជាការកសាងសំណង់អគារទីលានបាល់ទាត់ ហេដ្ឋារចនាសម្ព័ន្ធនានា ទាំងក្នុងនិងក្រៅបរិវេណកីឡាដ្ឋានស្របគ្នានឹងការសាងសង់សួនកុមារ កន្លែងហាត់ប្រាណ សម្រាប់សាធារណជន និងការបំពាក់អំពូលភ្លើងសូឡាក្នុងបរិវេណកីឡដ្ឋាន។ សំណង់អគារមានកម្ពស់បីជាន់ អាចផ្ទុកអ្នកទស្សនាបាន ៣០០០ នាក់។ កីឡដ្ឋានខេត្តកំពង់ស្ពឺនេះ សាងសង់ដោយចំណាយថវិកាអស់ ៤ ២៥០ ៦៩៥ ដុល្លារអាមេរិក។ ក្នុងឱកាសនោះ ឯកឧឧបនាយករដ្ឋមន្ត្រី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចូលរួមសាទរចំពោះស្នាដៃក្នុងការដឹកនាំគ្រប់គ្រងរបស់រដ្ឋបាលខេត្តកំពង់ស្ពឺ និងកងកម្លាំងទាំងអស់ ដែលបានថែរក្សាសន្តិសុខសណ្តាប់ធ្នាប់ល្អប្រសើរជូនប្រជាពលរដ្ឋក្នុងខេត្ត ដែលធ្វើឱ្យប្រជាពលរដ្ឋមិនមានការភ័យខ្លាចហើយបង្កលក្ខណៈឱ្យប្រជាពលរដ្ឋទាំងអស់នៅក្នុងខេត្តកំពង់ស្ពឺទាំងមូលមានឱកាសខិតខំប្រឹងប្រែងបង្កើនការរកប្រាក់ចំណូលផ្គត់ផ្គង់ជីវភាពគ្រួសារ។ ឯកឧត្តមឧបនាយករដ្ឋមន្ត្រី បានចាត់ទុកសមិទ្ធផលកីឡដ្ឋាន ដែលត្រូវបានសម្ពោធដាក់ឱ្យប្រើប្រាស់ជាផ្លូវការនាពេលនេះ ថាជាសមិទ្ធផលថ្មីមួយទៀតសម្រាប់ខេត្តកំពង់ស្ពឺ ដែលមានសោភណ្ឌភាពស្រស់ត្រកាល សាងសង់តាមបទដ្ឋានបច្ចេកទេសមានលក្ខណៈសមរម្យសម្រាប់លើកស្ទួយវិស័យកីឡាដែលឆ្លើយតបតាមសេចក្តីត្រូវការចាំបាច់របស់ប្រជាពលរដ្ឋគ្រប់រូប ពិសេសយុវជនដែលត្រូវការកន្លែងសម្រាប់ហ្វឹកហាត់ រួមនិងការងារជំនាញផ្សេងៗពាក់ព័ន្ធនឹងកីឡា។ ឯកឧត្តមឧបនាយករដ្ឋមន្រ្តី បានកត់សម្គាល់ថា គំនិតផ្តួចផ្តើមរបស់ ឯកឧត្តម ហ៊ុន ម៉ានី ក្នុងការសាងសង់កីឡដ្ឋានខេត្តកំពង់ស្ពឺនេះឡើងបានលុះត្រាតែមានការស្រលាញ់ មានជំនឿជឿជាក់នោះទើបសប្បុរសជនដើរតាមនិងគាំទ្រតាមក្រោយ បើគ្មានជំនឿជឿជាក់ទេនោះក៏មិនអាចទទួលបានថវិកាទាំងនេះពីសប្បុរសជនបានដែរ។ ឯកឧត្តមឧបនាយករដ្ឋមន្ត្រី សង្ឃឹមថាកីឡដ្ឋានខេត្តកំពង់ស្ពឺនេះនឹងត្រូវបានប្រើប្រាស់ឱ្យអស់លទ្ធភាព ចំគោលដៅ និងគ្រប់ទម្រង់ ដើម្បីភាពរីកចម្រើនក្នុងខេត្ត។ កីឡានាំមកនូវសុខភាពដល់មនុស្សគ្រប់រូប កីឡាធ្វើឱ្យរាងកាយរឹងមាំ កីឡាត្រូវមានការគោរពវិន័យ ដូច្នេះត្រូវចូលរួមលេងកីឡាទាំងអស់គ្នា ដើម្បីសុខភាពល្អ ហើយត្រូវរួមគ្នាថែរក្សាសមិទ្ធផលកីឡដ្ឋានខេត្តកំពង់ស្ពឺនេះ សម្រាប់ទុកប្រើប្រាស់បានយូរអង្វែង និងទាក់ទាញឱ្យមានការបន្តចូលរួមគាំទ្របន្ថែមទៀត។ ជាមួយនេះឯកឧត្តមឧបនាយករដ្ឋមន្ត្រី ក៏បានកោតសរសើរដល់ក្រសួងអប់រំ យុវជន និងកីឡា ដែលបានពុះពារធ្វើកំណែទម្រង់លើប្រព័ន្ធអប់រំ ដើម្បីបង្កើនគុណភាពនៃការសិក្សារៀនសូត្រ រួមនិងវិស័យជាច្រើនទៀត ដូចជា កីឡា និងសិល្បៈ ជាដើម ដែលអាចប្រកួតប្រជែងនៅលើឆាកអន្តរជាតិ ជាមួយបណ្តាប្រទេសដទៃទៀត ដែលនេះក៏ចាត់ទុកថាជាមោទនភាពក្រោមការដឹកនាំ និងការយកចិត្តទុកដាក់យ៉ាងស៊ីជម្រៅ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយគ្រប់កាលៈទេសៈទាំងអស់ ទទួលបានជោគជ័យខិ តខំប្រឹងប្រែង ដើម្បីតែសេចក្តីសុខសុភមង្គលរបស់ប្រជាពលរដ្ឋ និងមោទនភាពជាតិប៉ុណ្ណោះ៕
សារស្វាគមន៍
ឯកឧត្តម ជា សុផារ៉ា
ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
សេវាសាធារណៈ
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ចំនួនអ្នកទស្សនា
ថ្ងៃនេះ :
000372
ម្សិលមិញ :
007345
សរុប :
17110954
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលនទ្រព្យនៅកម្ពុជា