ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថាសម្ដេចតេជោនាយករដ្ឋមន្ត្រី តែងតែយកចិត្តទុកដាក់ណែនាំនិងដឹកនាំជំរុញការអភិវឌ្ឍន៍វិស័យទេសចរណ៍កម្ពុជាដូចជាការអភិវឌ្ឍន៍ហេដ្ឋារចនាសម្ព័ន្ធទ្រទ្រង់ក្នុងវិស័យទេសចរណ៍ជាបន្តបន្ទាប់រួមទាំងការសាងសង់សាលាជាតិវិជ្ជាជីវៈទេសចរណ៍នាពេលនេះជាដើម។ វិស័យទេសចរណ៍បានលូតលាស់គួរឱ្យកត់សម្គាល់ និងបំពេញតួនាទីជាសសរស្ដម្ភមួយយ៉ាងសំខាន់សម្រាប់អភិវឌ្ឍន៍សេដ្ឋកិច្ចជាតិកម្ពុជា។ គិតចាប់ពីឆ្នាំ២០១០ មកកម្ពុជាមានអត្រាកំណើនទេសចរណ៍អន្តរជាតិ ១២% ក្នុងមួយឆ្នាំ ក្នុងនោះឆ្នាំ២០១៩ ជាឆ្នាំកំពូលនៃវិស័យទេសចរណ៍កម្ពុជា ដោយទទួលបានទេសចរណ៍អន្តរជាតិប្រមាណជាង ៦ លាន ៦ សែននាក់កើនឡើង ៣ដង បើប្រៀបធៀបនឹង ១០ឆ្នាំ មុនបង្កើតមុខរបរ និងការងារទេសចរណ៍ប្រមាណ ៦៣ម៉ឺននាក់ និងនាំចំណូលពីទេសចរណ៍អន្តរជាតិប្រមាណជាង ៤ ០០០ លានដុល្លារសហរដ្ឋអាមេរិក។ ដោយឡែកឆ្នាំ២០២០ និងឆ្នាំ២០២១ វិស័យទេសចរណ៍បានធ្លាក់ចុះយ៉ាងខ្លាំង ដោយសារឥទ្ធិពលនៃវិបត្តិកូវីដ១៩ ក្នុងបរិការដ៏តានតឹងនេះរាជរដ្ឋាភិបាលកម្ពុជាបានខិតខំយ៉ាងសស្រាក់សស្រាំ ដើម្បីទប់ស្កាត់ និងគ្រប់គ្រងការឆ្លងរីករាលដាលនៃជំងឺកូវីដ ១៩ នៅក្នុងសហគមន៍សំដៅការពារអាយុជីវិតរបស់ប្រជាពលរដ្ឋ និងសុខភាពសាធារណៈព្រមទាំងកាត់បន្ថយឱ្យបានជាអតិបរមានូវផលប៉ះពាល់ពីវិបត្តិកូវីដ ១៩ តាមរយៈការដាក់ចេញជាបន្តបន្ទាប់នៅច្បាប់បទបញ្ញត្តិវិធានការសុខាភិបាល វិធានការរដ្ឋបាលនិងវិធានការផ្សេងៗទៀត។ ទន្ទឹមនេះ ក្រសួងទេសចរណ៍ក៏បានយកចិត្តទុកដាក់ខ្ពស់លើការពង្រឹងគុណភាពសេវាកម្មនិងសុវត្ថិភាពជូនភ្ញៀវទេសចរណ៍និងពង្រឹងភាពប្រកួតប្រជែងដើម្បីទាក់ទាញភ្ញៀវទេសចរណ៍ជាតិនិងអន្តរជាតិ។ សម្រាប់រយៈពេល ១០ខែ ដើមឆ្នាំ២០២២ នេះកម្ពុជាទទួលបានទេសចរណ៍អន្តរជាតិប្រមាណ ១លាន ៥៧ម៉ឺននាក់ រីឯការធ្វើទេសចរណ៍ក្នុងប្រទេសបានជាង ១០លាន ៨សែននាក់ គឺមានការកើនឡើងយ៉ាងខ្លាំងលើសលប់ បើប្រៀបធៀបទៅនឹងឆ្នាំ២០២១។ ដោយឡែកនៅពេលនេះ ដោយបានការអនុញ្ញាតពីរាជរដ្ឋាភិបាល ក្រសួងទេសចរណ៍បានបើកការដ្ឋានសាងសង់អគារសាលាជាតិវិជ្ជាជីវៈទេសចរណ៍ចំនួនពីរទីតាំងគឺនៅរាជធានីភ្នំពេញនិងខេត្តព្រះសីហនុ ដើម្បីអភិវឌ្ឍន៍ធនធានមនុស្សក្នុងវិស័យទេសចរណ៍។ រាជរដ្ឋាភិបាលបានចុះកិច្ចព្រមព្រៀងហិរញ្ញប្បទានឥណទានពីទីភ្នាក់ងារបារាំងសម្រាប់ការអភិវឌ្ឍ AFD ក្នុងទំហំទឹកប្រាក់ចំនួន ១១លានអឺរ៉ូ ស្មើនឹងប្រមាណ ១២លានដុល្លារ អាមេរិកសម្រាប់សាងសង់សាលាជាតិវិជ្ជាជីវៈទេសចរណ៍។ ជាមួយគ្នានេះ AFDក៏បានផ្ដល់ហិរញ្ញប្បទានឥតសំណងលើទឹកប្រាក់ចំនួន ១លាន ៥សែនអឺរ៉ូ ទៀតសម្រាប់គម្រោងពង្រឹងសមត្ថភាពពាណិជ្ជកម្មក្នុងវិស័យទេសចរណ៍និងបានដាក់ឱ្យអនុវត្តឆ្លងកាត់នីតិវិធី និងយន្តការអនុវត្តរបស់គម្រោងដៃគូអភិវឌ្ឍន៍ គម្រោងសាងសង់សាលាជាតិវិជ្ជាជីវៈទេសចរណ៍ បានរៀបចំកម្មវិធីសិក្សា និងបណ្ដុះបណ្ដាលស្របតាមស្តង់ដារជាតិ និងអាស៊ានតាមរយៈក្រុមហ៊ុនប្រឹក្សាបច្ចេកទេសមកពីប្រទេសអាល្លឺម៉ង់នឹងបានជ្រើសរើសក្រុមហ៊ុនស្ថាបត្យកម្ម និងម៉ៅការសាងសង់ដែលមានគុណភាពស្តង់ដារបច្ចេកទេសត្រឹមត្រូវផងដែរ។ អគារសាលាជាតិវិជ្ជាជីវៈទេសចរណ៍ទាំងពីរទីតាំងនេះនឹងត្រូវសាងសង់ព្រមៗគ្នា ដោយប្រើប្រាស់រយៈពេល ១៥ខែ ហើយក្រសួងទេសចរណ៍ ក៏បានទទួលលិខិតអនុញ្ញាតសាងសង់ និងបើកការដ្ឋានសាងសង់ពីក្រសួងរៀបចំដែនដី នគរូបនីយកម្ម និងសំណង់ ផងដែរ។ គម្រោងបង្កើតសាលាជាតិវិជ្ជាជីវៈទេសចរណ៍ រាជធានីភ្នំពេញ ប្រើប្រាស់ទំហំវិនិយោគដំបូងសម្រាប់រាជរដ្ឋាភិបាល សរុប ២៦ លានដុល្លារអាមេរិក ក្នុងនោះតម្លៃដីដែលត្រូវសាងសង់លើផ្ទៃដីទំហំ ៤ ០០០ ម៉ែត្រការ៉េ នៅរាជធានីភ្នំពេញ គឺ ១០លាន ដុល្លារអាមេរិក រីឯតម្លៃដីដែលត្រូវសាងសង់នៅខេត្តព្រះសីហនុមានទំហំ ១ ៧៧៥ ម៉ែត្រការ៉េ ស្មើនឹងប្រមាណ ៤លាន ៥សែន ដុល្លារអាមេរិក បូកបញ្ចូលនឹងកម្ចីពីទីភ្នាក់ងារបារាំងសម្រាប់ការអភិវឌ្ឍ AFD ១២ លាន ដុល្លារអាមេរិក សម្រាប់ការសាងសង់បំពាក់សម្ភារៈ និងចំណាយផ្សេងៗទៀតពាក់ព័ន្ធនឹងការគ្រប់គ្រងគម្រោង។ អគារសាលាជាតិវិជ្ជាជីវៈទេសចរណ៍នៅរាជធានីភ្នំពេញនឹងត្រូវសាងសង់ក្នុងកម្ពស់ ៤ ជាន់ មានផ្ទៃក្រឡាសំណង់ សរុប ៧ ៣២៦ ម៉ែត្រក្រឡា ដោយគ្រោងចំណាយថវិកាអស់ ៣ ៤៥១ ៩៧២ ដុល្លារ និងនៅខេត្តព្រះសីហនុគ្រោងសាងសង់ក្នុងកម្ពស់ ៤ជាន់ ដូចគ្នាមានផ្ទៃក្រឡាសំណង់ សរុប ៦ ៧១៣ ម៉ែត្រក្រឡា លើទីតាំងមន្ទីរទេសចរណ៍ខេត្តបច្ចុប្បន្នដោយគ្រោងចំណាយថវិកាសាងសង់ ៣ ០៨៨ ១៨៣ ដុល្លារ ។
ឯកឧត្តម Jacques Pellet ឯកអគ្គរដ្ឋទូតនៃសាធារណរដ្ឋបារាំងប្រចាំកម្ពុជាបានបង្ហាញពីការគាំទ្រដល់កម្ពុជាក្នុងការសាងសង់សាលាជាតិវិជ្ជាជីវៈទេសចរណ៍ចំនួនពីរទីតាំងគឺនៅរាជធានីភ្នំពេញ និងខេត្តព្រះសីហនុ ដែលគម្រោងទាំងពីរនេះគឺជាផ្នែកមួយយ៉ាងសំខាន់នៃការអភិវឌ្ឍន៍សេដ្ឋកិច្ចកម្ពុជាហើយក៏ចូលរួមចំណែកយ៉ាងសំខាន់ក្នុងការអភិវឌ្ឍន៍វិស័យទេសចរណ៍នៅកម្ពុជាទាំងជំនាញរឹងនិងជំនាញទន់ជាដើម។ ក្នុងន័យនេះដែរវិស័យទេសចរគឺជាវិស័យដ៏សំខាន់ក្នុងការចូលរួមអភិវឌ្ឍន៍សេដ្ឋកិច្ចរបស់កម្ពុជា ហើយយើងឃើញថាវាគឺជាកត្តាដ៏សំខាន់មួយផ្សេងទៀតក្នុងការអភិវឌ្ឍន៍ GDP របស់ប្រទេសកម្ពុជា និងបង្កើតការងារដល់យុវជនជំនាន់ក្រោយផងដែរ ដូច្នេះឯកឧត្តមនឹងជំរុញបន្ថែមទៀត ដើម្បីឱ្យសាលាជាតិវិជ្ជាជីវៈទេសចរណ៍ នេះបានដំណើរការដោយរលូន។
ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបង្ហាញពីការអបអរសាទរនិងកោតសរសើរចំពោះការខិតខំប្រឹងប្រែងរបស់ក្រសួងទេសចរណ៍ ក្រោមការដឹកនាំរបស់ ឯកឧត្ដមរដ្ឋមន្ត្រី ថោង ខុន ដែលបានសហការគ្នាជាមួយក្រសួងសេដ្ឋកិច្ចនិងហិរញ្ញវត្ថុនិងទីភ្នាក់ងារបារាំងសម្រាប់ការអភិវឌ្ឍន៍AFDក្នុងការរៀបចំបង្កើតសាលាជាតិវិជ្ជាជីវៈទេសចរណ៍នៅរាជធានីភ្នំពេញ និងខេត្តព្រះសីហនុ រហូតបានឈានដល់ការបើកការដ្ឋានសាងសង់នាពេលនេះ។ សាលាជាតិវិជ្ជាជីវៈទេសចរណ៍ទាំងពីរបានក្លាយទៅជាមជ្ឈមណ្ឌលបណ្ដុះបណ្ដាលនិងវាយតម្លៃជំនាញកម្រិតវិជ្ជាជីវៈទេសចរណ៍ស្របតាមស្តង់ដារជាតិនិងអន្តរជាតិ ដែលជាតម្រូវការចាំបាច់សម្រាប់ការអភិវឌ្ឍវិស័យទេសចរណ៍កម្ពុជាទាំងក្នុងពេលបច្ចុប្បន្ន និងអនាគត និងចូលរួមអនុវត្តនូវគោលនយោបាយរបស់រាជរដ្ឋាភិបាលដែលបានកំណត់យកធនធានមនុស្សជាអាទិភាពទីមួយសម្រាប់ការអភិវឌ្ឍន៍ប្រទេសជាតិ។ ឆ្លៀតឱកាសនេះដែរ ឯកឧត្តមឧបនាយករដ្ឋមន្ត្រី ជា សុផារ៉ា ក៏បានអបអរសាទរខួបលើកទី៧០ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋបារាំងដោយប្រទេសជាតិ និងប្រជាជននៃប្រទេសទាំងពីរបានពូនជ្រុំនូវទំនាក់ទំនងជាប្រពៃណីបន្តពីមួយជំនាន់ទៅមួយជំនាន់ឱ្យកាន់តែរឹងមាំទាំងនៅក្នុងក្របខ័ណ្ឌទ្វេរភាគី និងពហុភាគី។ ឯកឧត្តមឧបនាយករដ្ឋមន្ត្រី ជា សុផារ៉ា បានកត់សម្គាល់ថាការចូលរួមរបស់បារាំងពិតជាមានសារៈសំខាន់និងគុណប្រយោជន៍សម្រាប់ដំណើរការនៃការអភិវឌ្ឍន៍សង្គម និងសេដ្ឋកិច្ចនៅកម្ពុជាក្នុងវិស័យជាច្រើនជាពិសេសវិស័យអប់រំសុខាភិបាល កសិកម្ម ទេសចរណ៍វប្បធម៌និងបរិស្ថានជាដើម។ វត្តមានរបស់វិនិយោគិននិងភ្ញៀវទេសចរណ៍បារាំងក៏បានរួមចំណែកយ៉ាងសំខាន់ដល់ការអភិវឌ្ឍន៍វិស័យទេសចរណ៍របស់កម្ពុជា។ ការផ្ដល់ហិរញ្ញប្បទានឥណទានសម្រាប់ការសាងសង់សាលាជាតិវិជ្ជាជីវៈទេសចរណ៍នាពេលនេះជាសក្ខីភាពមួយទៀតនៃការគាំទ្ររបស់បារាំង ដើម្បីភាពរីកចម្រើននៃវិស័យទេសចរណ៍កម្ពុជា ផងដែរ៕
សារស្វាគមន៍
ឯកឧត្តម ជា សុផារ៉ា
ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
សេវាសាធារណៈ
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ចំនួនអ្នកទស្សនា
ថ្ងៃនេះ :
000192
ម្សិលមិញ :
009156
សរុប :
18191002
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលនទ្រព្យនៅកម្ពុជា