តាមរបាយការណ៍ របស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា ក្លឹបឆ្នេរសមុទ្រដែលស្អាតបំផុតលើសាកលលោក ត្រូវបានបង្កើតឡើងនៅឆ្នាំ ១៩៩៧ នាទីក្រុងប៊ែកឡាំង ប្រទេសអាល្លឺម៉ង់។ បច្ចុប្បន្ន ក្លឹបនេះមានទីស្នាក់ការនៅទីក្រុងវ៉ាន់នីស ប្រទេសបារាំង និងមានឆ្នេរសមាជិក ចំនួន ៤៤ ឆ្នេរ ស្មើនឹង ២៦ ប្រទេស។កម្ពុជាត្រូវបានដាក់បញ្ចូលជាសមាជិកពេញសិទ្ធិក្លឹបឆ្នេរសមុទ្រ ដែលស្អាតបំផុតលើសកលលោកក្នុងមហាសន្និបាតលើកទី ៧ របស់ក្លឹបកាលពីថ្ងៃទី ២៦ ខែឧសភា ឆ្នាំ ២០១១ នៅទីក្រុងតួបាគួតា ប្រទេសសេណេហ្គាល់។បន្ទាប់ពីក្លាយជាសមាជិកក្លឹបឆ្នេរសមុទ្រ ដែលស្អាតបំផុតលើសកលលោក នៅឆ្នាំ២០១១ រួចមក កម្ពុជាធ្លាប់បានធ្វើជាម្ចាស់ផ្ទះរៀបចំមហាសន្និបាតនេះម្ដងរួចមកហើយ កាលពីឆ្នាំ២០១៣ នៅរមណីយដ្ឋានឋានសួគ៌បូកគោក្នុងខេត្តកំពត។ តាមរយៈសំណើរបស់កម្ពុជាមហាសន្និបាតរបស់ក្លឹបលើកទី ១៤ ដែលរៀបចំនៅទីក្រុងឆ្នេរសមុទ្រតូយ៉ាម៉ា ប្រទេសជប៉ុន ឆ្នាំ២០១៩ ក៏បានបោះឆ្នោតជាឯកច្ឆ័នផ្ដល់សិទ្ធិឱ្យកម្ពុជាធ្វើជាម្ចាស់ផ្ទះ រៀបចំមហាសន្និបាតនេះជាលើកទី២ នៅក្នុងឆ្នាំ ២០២២ បន្ទាប់ពីពិនិត្យឃើញកម្ពុជាធ្វើជាម្ចាស់ផ្ទះដោយជោគជ័យនៅឆ្នាំ ២០១២។ មហាសន្និបាតលើកទី ១៦ របស់ក្លឹបឆ្នេរសមុទ្រ ដែលស្អាតបំផុតលើសកលលោក ដែលរៀបចំឡើងនៅកម្ពុជានេះ គឺចាប់ពីថ្ងៃទី ៩ ដល់ថ្ងៃទី ១៤ ខែធ្នូ ឆ្នាំ២០២២ ក្រោមប្រធានបទ "ឆ្នេរនៃសន្តិភាព ឆ្នេរនៃក្តីសង្ឃឹម" ដោយមានការចូលរួមពីឆ្នេរសរុប ៣៤ ក្នុងនោះ រួមមានឆ្នេរសមុទ្រកម្ពុជា និងមកពី ២១ ប្រទេសដោយមានប្រតិភូអន្តរជាតិសរុបប្រមាណ ១៣០ រូប។ ក្នុងមហាសន្និបាតលើកទី១៦ នេះមានកម្មវិធីសំខាន់ៗមួយចំនួនដូចជា ទស្សនកិច្ចស្វែងយល់ការអភិវឌ្ឍន៍ក្រុងព្រះសីហនុ នាថ្ងៃទី ៩ ខែ ធ្នូឆ្នាំ ២០២២ កិច្ចប្រជុំប្រចាំឆ្នាំរបស់ក្លឹបនាថ្ងៃទី ១០ ខែធ្នូ បន្ទាប់ពីបញ្ចប់ពិធីបើកជាផ្លូវការ គណៈប្រតិភូក្លឹបចូលរួមពិធីបើកបុណ្យសមុទ្រនាល្ងាចថ្ងៃទី ១០ ខែធ្នូ ឆ្នាំ ២០២២ កម្មវិធីដាំដើមឈើអនុស្សាវរីយ៍ នាព្រឹកថ្ងៃទី ១១ ខែធ្នូ សន្និសីទអន្តរជាតិស្ដីពីការអភិវឌ្ឍនិងការអភិរក្សតំបន់ឆ្នេរនារសៀលថ្ងៃទី ១១ ខែធ្នូ ដំណើរទស្សនកិច្ចព្រៃកោងកាងនៅពាមក្រសោប ខេត្តកោះកុង និងបន្តទៅកោះឋានសួគ៌ា នាថ្ងៃទី ១២ ខែធ្នូ ជាមួយនោះក៏មានការរៀបចំសិក្ខាសាលាបច្ចេកទេសស្ដីពីការអភិរក្សព្រៃកោងកាង និងជីវៈចម្រុះ ក្រោមសមុទ្រនៅកោះឋានសួគ៌ នារសៀលថ្ងៃទី ១២ ខែធ្នូ ឆ្នាំ ២០២២ ការបោះឆ្នោតជ្រើសរើសគណៈប្រតិបត្តិក្លឹប សម្រាប់អាណត្តិ ២០២៣-២០២៥ និងការផ្ទេរតំណែងប្រធានអាណត្តិបច្ចុប្បន្ន ឯកឧត្តម Michel Bujold (ឆ្នាំ២០១៩ - ២០២២) ទៅ ឯកឧត្តម Louis Thebault (ឆ្នាំ ២០២៣-២០២៥) នារសៀលថ្ងៃទី ១៣ ខែធ្នូ ការបោះឆ្នោតជ្រើសរើសប្រធានក្លឹបសម្រាប់អាណត្តិឆ្នាំ ២០២៦-២០២៨ រួមទាំងពិធីប្រគល់ទង់ក្លឹបទៅឆ្នេរ Yeosu ប្រទេសកូរ៉េខាងត្បូង សម្រាប់ការធ្វើជាម្ចាស់ផ្ទះមហាសន្និបាតលើកទី ១៧ឆ្នាំ ២០២៣។ អង្គមហាសន្និបាត បានបោះឆ្នោតជ្រើសរើសកម្ពុជាធ្វើជាអគ្គលេខាធិការ សម្រាប់អាណត្តិ ២០២៣-២០២៥។ អង្គមហាសន្និបាតក៏បានដាក់បញ្ចូលឆ្នេរសមុទ្រ ចំនួន ៤ ជាសមាជិកថ្មីនៃក្លឹបឆ្នេរសមុទ្រ ដែលស្អាតជាងគេបំផុតលើសាកលលោក ក្នុងនោះមានឆ្នេរ Triple Bays of Pujada, Balite and Mayo របស់ប្រទេសហ្វីលីពីន ឆ្នេរ Lan Ha របស់ប្រទេសវៀតណាម ឆ្នេរ La Ciotatនិងឆ្នេរ Les Sables d'olonn របស់ប្រទេសបារាំងផងដែរ។ ក្នុងឱកាសនោះ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជាតំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា ក្នុងនាមរាជរដ្ឋាភិបាលកម្ពុជា ឯកឧត្តមបានកោតសរសើរ និងវាយតម្លៃខ្ពស់ចំពោះក្រសួងទេសចរណ៍ រដ្ឋបាលខេត្តព្រះសីហនុ និងក្រុមការងាររៀបចំមហាសន្និបាតនៃក្លឹបឆ្នេរសមុទ្រ ដែលស្អាតជាងគេបំផុតលើសាកលលោក ដែលបានសហការរៀបចំមហាសន្និបាតលើកទី១៦ នេះប្រកបដោយជោគជ័យ។ ឯកឧត្តមឧបនាយករដ្ឋមន្ត្រីជាសុផារ៉ា បានបង្ហាញពីការគាំទ្រនិងវាយតម្លៃខ្ពស់ចំពោះរបាយការណ៍បូកសរុបមហាសន្និបាតលើកទី១៦ របស់ក្លឹបឆ្នេរសមុទ្រដែលស្អាតបំផុតលើសាកលលោកនិងបានចូលរួមអបអរសាទរចំពោះឯកឧត្តមLouis Thebault ដែលបានចូលរួមកាន់តំណែងជាប្រធានក្លឹបឆ្នេរសមុទ្រដែលស្អាតបំផុតលើសាកលលោកចាប់ពីពេលនេះរហូតដល់ឆ្នាំ ២០២៥ និងបានវាយតម្លៃខ្ពស់ចំពោះសមិទ្ធផលការងារ ដែលក្លឹបសម្រេចបានក្នុងអាណត្តិរបស់ឯកឧត្តម Michel Bujold ទោះបីប្រឈមនឹងវិបត្តិកូវីដ១៩ នាពេលកន្លងមកយ៉ាងណាក្តី។ ឯកឧត្តមឧបនាយករដ្ឋមន្ត្រី បានលើកឡើងថា រាជរដ្ឋាភិបាលកម្ពុជាបានចាត់ទុកវិស័យទេសចរណ៍ជាវិស័យអាទិភាព និងជាមាសបៃតងរួមចំណែកដល់ការអភិវឌ្ឍន៍សង្គម និងសេដ្ឋកិច្ចជាតិ តាមរយៈការបង្កើតឱកាសការងារបង្កើនប្រាក់ចំណូល ជូនប្រជាពលរដ្ឋដោយផ្ទាល់ និងដោយប្រយោល ជំរុញនាំចេញនៅនឹងកន្លែង ទ្រទ្រង់កំណើនសេដ្ឋកិច្ច កំណើនចំណូលជាតិ ចូលរួមដល់ការអភិរក្សវប្បធម៌ និងរក្សាការពារបរិស្ថានធនធានធម្មជាតិ របស់កម្ពុជាប្រកបដោយប្រសិទ្ធភាព និងការទទួលខុសត្រូវខ្ពស់។ ដោយឡែកប្រឈមនឹងវិបត្តិសកលកូវីដ១៩ រាជរដ្ឋាភិបាលកម្ពុជា បានកំណត់យកការចាក់វ៉ាក់សាំងជាវិធានការយុទ្ធសាស្ត្រគន្លឹះ ដើម្បីបើកប្រទេសឡើងវិញ ដែលវិធានការនេះបានធ្វើឱ្យកម្ពុជាក្លាយជាប្រទេសឈានមុខ ដែលមានប្រជាពលរដ្ឋបានចាក់វ៉ាក់សាំងប្រឆាំងវីរុសកូវីដ១៩ ក្នុងអត្រាខ្ពស់បំផុត និងសម្រេចបាននូវភាពស៊ាំក្នុងសហគមន៍ដែលអនុញ្ញាតឱ្យកម្ពុជាអាចបើកដំណើរការប្រទេសឡើងវិញយ៉ាងពេញលេញ ចាប់តាំងពីថ្ងៃទី ១ ខែវិច្ឆិកា ឆ្នាំ ២០២១ មក។ ស្ថិតក្នុងកាលៈទេសៈដ៏លំបាកនេះ រាជរដ្ឋាភិបាលបានប្រែក្លាយវិបត្តិទៅជាកាលានុវត្ថភាពសម្រាប់ការស្ដារ និងកែលម្អហេដ្ឋារចនាសម្ព័ន្ធចាំបាច់នានាសំដៅគាំទ្រដល់កិច្ចដំណើរការឡើងវិញនៃវិស័យទេសចរណ៍ ជាក់ស្ដែងរាជរដ្ឋាភិបាលបានសម្រេចការកសាងហេដ្ឋារចនាសម្ព័ន្ធសំខាន់ៗដូចជាការសាងសង់បណ្ដាញផ្លូវ ៣៧ ខ្សែ និងហេដ្ឋារចនាសម្ព័ន្ធគាំទ្រនានានៅក្នុងខេត្តព្រះសីហនុនេះផ្ទាល់តែម្ដង។ តាមរយៈមហាសន្និបាតរយៈពេល ៥ ថ្ងៃនេះយើងឃើញថាការអភិវឌ្ឍ និងអភិរក្សតំបន់ឆ្នេរសមុទ្រទាមទារឱ្យមានការគិតគូរជាចម្បងទៅលើការអភិរក្សបរិស្ថានឆ្នេរសមុទ្រ ទន្ទឹមនេះ ការអភិវឌ្ឍន៍ទីក្រុងនៅតាមតំបន់ឆ្នេរឱ្យក្លាយជាទីក្រុងបៃតងក៏ជាផ្នែកមួយនៃការអភិវឌ្ឍន៍ប្រកបដោយនិរន្តរភាព ដែលយើងគួរយកចិត្តទុកដាក់អនុវត្តឱ្យខាងតែបាន ដើម្បីធានានូវការអភិវឌ្ឍទីក្រុងមិនឱ្យបង្កនូវផលវិបាកដល់ឆ្នេរសមុទ្រ។ ការអភិវឌ្ឍន៍ប្រកបដោយនិរន្តរភាព និងការទទួលខុសត្រូវ គឺពិតជាមានភាពចាំបាច់និងមានសារៈសំខាន់ជាមូលដ្ឋានក្នុងការអភិរក្សរក្សាតំបន់វប្បធម៌ធនធានធម្មជាតិ និងបរិស្ថានប្រកបដោយគុណតម្លៃនិងធានាបាននូវនិរន្តរភាពនិងតុល្យភាពផ្នែកសេដ្ឋកិច្ចសង្គម បរិស្ថានតំបន់ឆ្នេរដែលពិភពលោកទាំងមូលកំពុងបោះជំហានទៅមុខនៅក្នុងសម័យកាលបៃតង ទាំងនេះទាមទារឲ្យមានការដាក់ចេញនូវវិធានការយុទ្ធសាស្ត្រឱ្យបានច្បាស់លាស់ និងមានភាពប្រាកដប្រជានៅក្នុងការគ្រប់គ្រងដូចបានគូសបញ្ជាក់នៅក្នុងសុន្ទរកថាបើកមហាសន្និបាតរបស់សម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជា។ចំពោះកម្ពុជាដើម្បីជំរុញដំណើរការអភិវឌ្ឍន៍និងគ្រប់គ្រងទេសចរណ៍តំបន់ឆ្នេរសមុទ្រប្រកបដោយនិរន្តរភាពសុខភាពនិងការទទួលខុសត្រូវខ្ពស់ ឯកឧត្តមឧបនាយករដ្ឋមន្ត្រីជាសុផារ៉ាបានស្នើដល់ឯកឧត្តមបណ្ឌិតថោងខុនរដ្ឋមន្ត្រីក្រសួងទេសចរណ៍និងជាតំណាងឆ្នេរសមុទ្រកម្ពុជា រួមជាមួយឯកឧត្តមអភិបាលនៃគណៈអភិបាលខេត្តនៃតំបន់ឆ្នេរទាំងបួនប្រែក្លាយអនុសាសន៍របស់សម្ដេចអគ្គមហាសេនាបតីតេជោហ៊ុនសែនដែលបានផ្ដល់នៅក្នុងពិធីបើកមហាសន្និបាតនិងលទ្ធផលនៃមហាសន្និបាតលើកទី១៦ នេះឲ្យទៅជាផែនការសកម្មភាពសម្រាប់អនុវត្តប្រកបដោយស្មារតីទទួលខុសត្រូវខ្ពស់។ឯកឧត្តមឧបនាយករដ្ឋមន្ត្រីជឿជាក់ថាតាមរយៈការយកចិត្តទុកដាក់ខ្ពស់និងការចូលរួមរបស់សមាជិកក្លឹបឆ្នេរសមុទ្រដែលស្អាតបំផុតលើសកលលោក អាជ្ញាធរខេត្តតំបន់ឆ្នេរសមុទ្រនិងភាគីពាក់ព័ន្ធទាំងអស់នោះ លទ្ធផលដែលកើតចេញពីមហាសន្និបាតលើកទី១៦ នេះនឹងចូលរួមចំណែកដល់ការអភិវឌ្ឍន៍តំបន់ឆ្នេរសមុទ្រប្រកបដោយនិរន្តរភាព លើកស្ទួយលក្ខខណ្ឌរស់នៅរបស់ប្រជាពលរដ្ឋក្នុងតំបន់និងលើកកម្ពស់ភាពទាក់ទាញទេសចរណ៍របស់ទីក្រុងតំបន់ឆ្នេរ៕
សារស្វាគមន៍
ឯកឧត្តម ជា សុផារ៉ា
ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
សេវាសាធារណៈ
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ចំនួនអ្នកទស្សនា
ថ្ងៃនេះ :
004906
ម្សិលមិញ :
005414
សរុប :
17666287
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលនទ្រព្យនៅកម្ពុជា