ឯកឧត្តមឧបនាយករដ្ឋមន្ត្រី ជា សុផារ៉ា អញ្ជើញរៀបចំពិធីចម្រើនព្រះបរិត្តឡើង អគារមន្ទីរពិសោធន៍ជាតិសំណង់

December 23, 2022

នារសៀលថ្ងៃសុក្រ ១កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវ នឹង ថ្ងៃ ទី ២៣ ខែ ធ្នូ ឆ្នាំ ២០២២ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ ព្រមទាំងថ្នាក់ដឹកនាំ និងមន្រ្តីរាជការក្រោមឱវាទ បានអញ្ជើញ រៀបចំពិធីចម្រើនព្រះបរិត្តឡើងអគារមន្ទីរពិសោធន៍ជាតិសំណង់។
ពិធីនេះបានប្រព្រឹត្តទៅតាមប្រពៃណីព្រះពុទ្ធសាសនា ដោយមានការជួបជុំថ្នាក់ដឹកនាំ និងមន្ត្រីរាជការ ក្រសួងរៀបចំដែនដី នគរូបនីយកម្ម និងសំណង់ ធ្វើនមស្ការព្រះរតនត្រ័យ និមន្តព្រះសង្ឃចម្រើនព្រះបរិត្តដើម្បីចម្រើនសិរីសួស្ដីក្នុងការបើកដំណើរការអគារមន្ទីរពិសោធន៍ជាតិសំណង់ សម្រាប់បម្រើការងារជាប្រយោជន៍ក្នុងវិស័យសំណង់នៅប្រទេសកម្ពុជា។
តាមរបាយការណ៍បានឱ្យដឹងថា មន្ទីរពិសោធន៍ជាតិសំណង់បានចាប់ផ្ដើមបុកគ្រឹះនៅថ្ងៃទី១៥ ខែកក្កដា ឆ្នាំ ២០២១ និងបានសម្រេចរួចរាល់នៅខែសីហា ឆ្នាំ ២០២២។ អគារមន្ទីរពិសោធន៍ជាតិសំណង់បានសាងសង់លើផ្ទៃដី ១,៥ ហិកតា និងក្រឡាផ្ទៃអគារសរុបប្រមាណ ៥០០០ ម៉ែត្រការ៉េ ចែកចេញជាពីរអគារ គឺអគារបេតុង និងអគារដែក។ ចំពោះអគារបេតុងជាប្រភេទសំណង់អគារការិយាល័យមានរចនាបថសម័យទំនើបដែលមានក្រឡាផ្ទៃសំណង់សរុប ៧៥០០ ម៉ែត្រការ៉េ មានកម្ពស់ ៣ ជាន់។ រីឯអគារដែកមានទំហំ ៧២០ ម៉ែត្រការ៉េ សម្រាប់ធ្វើពិសោធន៍គ្រឿងផ្គុំសំណង់ដែលមានខ្នាតធំ។ អគារមន្ទីរពិសោធន៍ជាតិសំណង់នេះសាងសង់អស់ថវិកា ៣ លានដុល្លារអាមេរិក ដោយគិតទាំងការងារបន្ថែមកម្រាលខណ្ឌជាន់ទី២ ប្លុក B និងអគារស្នាក់នៅរបស់សន្តិសុខ និងកម្មករថែសួន។
ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបង្ហាញពីក្តីរីករាយ និងជឿជាក់ថាមន្ទីរពិសោធន៍ជាតិសំណង់នេះនឹងទទួលបានជោគជ័យក្នុងបេសកកម្មរបស់ខ្លួនលើការងារធ្វើពិសោធន៍សម្រាប់បញ្ជាក់គុណភាពសម្ភារៈសំណង់ បរិក្ខារសំណង់ និងផលិតផលសំណង់ ដើម្បីពង្រឹងគុណភាពនិងសុវត្ថិភាពសំណង់ ការសិក្សាស្រាវជ្រាវបង្កើតសម្ភារៈសំណង់ បរិក្ខារសំណង់ និងផលិតផលសំណង់ថ្មីៗ ស្របទៅតាមលក្ខខណ្ឌសេដ្ឋកិច្ច សង្គម បរិស្ថានបច្ចេកវិទ្យា និងវិទ្យាសាស្រ្ត ការបណ្ដុះបណ្ដាល និងណែនាំពីបច្ចេកវិទ្យា និងបច្ចេកទេសថ្មីៗ ដែលបង្កើតឡើងពីការសិក្សាស្រាវជ្រាវ និងបទដ្ឋានបច្ចេកទេសនានាដែលបានចងក្រង។ តាមរយៈស្ថានទូតជប៉ុនប្រចាំកម្ពុជា រដ្ឋាភិបាលជប៉ុនបានផ្ដល់ជំនួយឥតសំណងនូវឧបករណ៍ និងម៉ាស៊ីនពិសោធន៍ចំនួន ២០ មុខ ក្នុងកញ្ចប់ថវិកាចំនួន ២៥០ លានយ៉េន ស្មើនឹង ២,៣ លានដុល្លារអាមេរិក ដល់មន្ទីរពិសោធន៍ជាតិសំណង់នៃក្រសួងរៀបចំដែនដី នគរូបនីយកម្ម និងសំណង់ ហើយឧបករណ៍ និងម៉ាស៊ីនពិសោធន៍ទាំងនេះគ្រោងនឹងមកដល់កម្ពុជា នៅពាក់កណ្ដាលឆ្នាំ ២០២៣ ខាងមុខ។ ឧបករណ៍ និងម៉ាស៊ីនពិសោធន៍ទាំងនេះបម្រើឱ្យការពិសោធន៍សម្រាប់បញ្ជាក់ពីសមាសភាគ លក្ខណៈនិងគុណភាពសម្ភារៈសំណង់ បរិក្ខារសំណង់ និងផលិតផលសំណង់ ដែលអាចធ្វើពិសោធន៍នូវមូលដ្ឋានគ្រឹះនៃការងារសំណង់មានដូចជា ការធ្វើពិសោធន៍ដែក ការធ្វើពិសោធន៍បេតុង ត្រួតពិនិត្យគុណភាពថ្ម ខ្សាច់ និងស៊ីម៉ង់ ព្រមទាំងការធ្វើពិសោធន៍បច្ចេកទេសភូគព្ភសាស្ត្រ ផងដែរ៕