ឯកឧត្ដមឧបនាយករដ្ឋមន្ត្រី ជា សុផារ៉ា អនុញ្ញាតឱ្យ ឯកឧត្តម Buakeo PHUMVONGSAY ឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំនៅព្រះរាជាណាចក្រកម្ពុជាចូលជួបសម្តែងការគួរសម និងពិភាក្សាការងារ

December 28, 2022

នារសៀលថ្ងៃ ពុធ ៦កើត ខែបុស្ស ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៨ ខែធ្នូ ឆ្នាំ២០២២ នៅទីស្តីការក្រសួង ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឱ្យ ឯកឧត្តម Buakeo PHUMVONGSAY ឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋប្រជាធិបតេយ្យប្រជាមានិតឡាវប្រចាំនៅព្រះរាជាណាចក្រកម្ពុជា ចូលជួបសម្តែងការគួរសមនិងពិភាក្សាការងារ។ ក្នុងជំនួបនេះ ឯកឧត្តម ជា សុផារ៉ា ឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានបង្ហាញពីការស្វាគមន៍យ៉ាងកក់ក្តៅចំពោះ ឯកឧត្តម Buakeo PHUMVONGSAY ឯកអគ្គរដ្ឋទូតវិសាមញ្ញនិងពេញសមត្ថភាពថ្មីនៃសាធារណរដ្ឋប្រជាធិបតេយ្យប្រជាមានិតឡាវ ដែលបានមកបំពេញភារកិច្ចនៅព្រះរាជាណាចក្រកម្ពុជា ហើយសង្ឃឹមថាដំណើរការនេះនឹងទទួលបានលទ្ធផលផ្លែផ្កា និងនាំមកនូវទំនាក់ទំនងល្អរវាងកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ។ ឯកឧត្តមបានលើកឡើងថាគោលដៅសំខាន់របស់រាជរដ្ឋាភិបាលកម្ពុជា គឺធ្វើយ៉ាងណាឱ្យប្រទេសជាតិមានសុខសន្តិភាព និងស្ថិរភាពនយោបាយ ដែលជាគោលបំណងដ៏ធំរបស់ប្រជាពលរដ្ឋដែលធ្វើឱ្យប្រជាពលរដ្ឋនិងអ្នកវិនិយោគអាចស្វែងរកដៃគូសម្រាប់ជំរុញការអភិវឌ្ឍន៍សេដ្ឋកិច្ចសង្គម។ ឯកឧត្តមឧបនាយករដ្ឋមន្ត្រី បានលើកឡើងពីសមិទ្ធផលការងារជាច្រើន ដែលក្រសួងរៀបចំដែនដី នគរូបនីយកម្ម និងសំណង់ សម្រេចបាន ហើយសង្ឃឹមថាភាគីឡាវនឹងបង្កើនកិច្ចសហប្រតិបត្តិការដ៏ជិតស្និទ្ធជាមួយក្រសួង ដើម្បីនាំមកនូវផលប្រយោជន៍សម្រាប់ប្រជាជន និងប្រទេសទាំងពីរទៅវិញទៅមក។ ឯកឧត្តមឧបនាយករដ្ឋមន្ត្រី ក៏បានជូនពរដល់ ឯកឧត្តម Buakeo PHUMVONGSAY ឱ្យបំពេញបេសកកម្ម ក្នុងអាណត្តិការទូតរបស់ ឯកឧត្ដម ទទួលបានជោគជ័យនៅក្នុងព្រះរាជាណាចក្រកម្ពុជា ផងដែរ។ ជាការឆ្លើយតប ឯកឧត្តម Buakeo Phumvongsay បានថ្លែងអំណរគុណដល់ ឯកឧត្តមឧបនាយករដ្ឋមន្ត្រីជា សុផារ៉ា ដែលបានចំណាយពេលវេលាជួបសំណេះសំណាល សម្ដែងការគួរសមនិងពិភាក្សាការងារនាពេលនេះ និងបានបង្ហាញពីក្តីរីករាយចំពោះទំនាក់ទំនងមិត្តភាពសាមគ្គីភាព និងកិច្ចសហប្រតិបត្តិការដ៏ល្អរវាងរដ្ឋាភិបាលនិងប្រជាជននៃប្រទេសទាំងពីរ កម្ពុជា-ឡាវ ដោយបានកោតសរសើរ និងវាយតម្លៃខ្ពស់ចំពោះវឌ្ឍនភាព និងការរីកចម្រើនលើគ្រប់វិស័យរបស់ព្រះរាជាណាចក្រកម្ពុជា នាពេលបច្ចុប្បន្នផងដែរ។ឯកឧត្តមបានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលនិងប្រជាជនកម្ពុជា ដែលបានជួយឧបត្ថម្ភគាំទ្រដល់ប្រទេសឡាវនាពេលកន្លងមក ជាពិសេសការជួយឧបត្ថម្ភផ្នែកហិរញ្ញវត្ថុ វ៉ាក់សាំង រថយន្តដឹកវ៉ាក់សាំង និងឧបករណ៍វេជ្ជសាស្ត្រមួយចំនួន។ ក្នុងនាមជាឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំកម្ពុជាដែលទើបទទួលបានការតែងតាំងថ្មី បានសន្យាក្នុងការរក្សាចំណងមិត្តភាពសាមគ្គីភាព និងកិច្ចសហប្រតិបត្តិការឱ្យកាន់តែស្អិតរមួតជាមួយក្រសួងរៀបចំដែនដី នគរូបនីយកម្ម និងសំណង់ ក៏ដូចជាព្រះរាជាណាចក្រកម្ពុជា លើគ្រប់វិស័យ ដែលជាតម្រូវការចាំបាច់ក្នុងកិច្ចការអភិវឌ្ឍន៍នៅកម្ពុជា៕