ឯកឧត្តមឧបនាយករដ្ឋមន្រ្តី ជា សុផារ៉ា អញ្ជើញជាអធិបតីក្នុងពិធីបញ្ចុះបឋមសិលាបើកការដ្ឋានសាងសង់ព្រះពុទ្ធប្បដិមា កម្ពស់១០៨ ម៉ែត្រ នៅលើខ្នងភ្នំបូកគោ

January 04, 2023

នាព្រឹកថ្ងៃពុធ ១៣កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ០៤ ខែ មករា ឆ្នាំ២០២៣ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង សំណង់ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត បានអញ្ជើញជាអធិបតីក្នុងពិធីបញ្ចុះបឋមសិលាបើកការដ្ឋានសាងសង់ព្រះពុទ្ធប្បដិមាកម្ពស់ ១០៨ ម៉ែត្រ នៅលើខ្នងភ្នំបូកគោ ក្នុងឧទ្យានជាតិព្រះមុនីវង្ស “បូកគោ” ស្ថិតនៅក្រុងបូកគោ ខេត្តកំពត។ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត មានប្រសាសន៍ថា ក្រោមការដឹកនាំរបស់ប្រមុខរាជរដ្ឋាភិបាលកម្ពុជា បានធ្វើឱ្យប្រទេសជាតិមានសុខសន្តិភាព ស្ថិរភាពនយោបាយ និងមានការអភិវឌ្ឍលើគ្រប់វិស័យទូទាំងប្រទេសក៏ដូចជាក្នុងខេត្តកំពត មានការអភិវឌ្ឍលើហេដ្ឋារចនាសម្ព័ន្ធសំខាន់ៗជាច្រើន សម្រាប់បម្រើឱ្យផលប្រយោជន៍របស់ប្រជាពលរដ្ឋសំដៅលើកកម្ពស់ជីវភាពរបស់ប្រជាពលរដ្ឋឱ្យកាន់តែប្រសើរឡើង។ ដោយឡែកចំពោះការបើកការដ្ឋានសាងសង់ព្រះពុទ្ធប្បដិមា កម្ពស់១០៨ ម៉ែត្រ នៅលើខ្នងភ្នំបូកគោ នាពេលនេះ គឺជាសមិទ្ធផលថ្មីមួយទៀតនៅក្នុងខេត្តកំពត ក្នុងការរួមចំណែកលើកកម្ពស់ការប្រតិបត្តិព្រះពុទ្ធសាសនា ដែលជាសាសនារបស់រដ្ឋនិងបង្កើតបាននូវសក្តានុពលទេសចរណ៍ថ្មីមួយទៀតផងដែរ។ លោកជំទាវឧកញ៉ា សុខ ចន្ថា តំណាងក្រុមហ៊ុនសុខាអូតែល បានឱ្យដឹងថា ដោយពិនិត្យឃើញថាមានបណ្ដាប្រទេសជាច្រើននៅលើពិភពលោកជាពិសេសប្រទេសកាន់ព្រះពុទ្ធសាសនាបានសាងសង់ ព្រះពុទ្ធ រូបធំៗ ដើម្បីរំលឹកដល់គុណព្រះសម្មាសម្ពុទ្ធនិងជាទីសក្ការៈប្រកបដោយភាពទាក់ទាញតាមរចនាប័ទ្មប្រទេសនីមួយៗនោះ ដូច្នេះហើយ ទើបក្រុមហ៊ុនសុខាអូតែល មានគំនិតផ្ដួចផ្ដើមសាងសង់ព្រះពុទ្ធប្បដិមាដ៏ធំមួយអង្គនៅលើខ្នងភ្នំបូកគោ ស្ថិតក្នុងភូមិសាស្ត្រវាលស្រែ ៥០០ នៃឧទ្យានជាតិព្រះមុនីវង្សបូកគោ ដើម្បីជាទីសក្ការៈសម្រាប់ពុទ្ធសាសនិកជនប្រតិបត្តិធម៌ និងឧទ្ទិសសុំសេចក្តីសុខ សេចក្តីចម្រើនរុងរឿងជានិច្ចនិរន្តតរៀងទៅ សម្រាប់ប្រជាពលរដ្ឋ និងព្រះរាជាណាចក្រកម្ពុជាទាំងមូល។ គម្រោងសាងសង់ព្រះពុទ្ធប្បដិមានេះត្រូវបានធ្វើការសិក្សា និងសាងសង់ស្ថាបត្យកម្ម ដោយយុវស្ថាបត្យករជាកុលបុត្រកុលធីតាខ្មែរមួយក្រុមដោយមានការផ្ដល់យោបល់បន្ថែមពីក្រុមការងារអន្តរក្រសួង ដឹកនាំដោយក្រសួងបរិស្ថាន និងចូលរួមដោយក្រសួងធម្មការ និងសាសនា ក្រសួងវប្បធម៌និងវិចិត្រសិល្បៈ ក្រសួងរៀបចំដែនដី នគរូបនីយកម្មនិងសំណង់ ក្រសួងទេសចរណ៍ និងរដ្ឋបាលខេត្តកំពត។ ក្នុងឱកាសនោះ ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បាននាំមកនូវការផ្ដាំផ្ញើសាកសួរសុខទុក្ខ ក្តីនឹករលឹក និងពរជ័យពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុនរ៉ានី ហ៊ុនសែន ប្រគេននិងជូនចំពោះព្រះមន្រ្តីសង្ឃ មន្ត្រីរាជការនិងប្រជាពលរដ្ឋទាំងអស់។ ឯកឧត្តមឧបនាយករដ្ឋមន្ត្រី មានប្រសាសន៍ថា ទន្ទឹមនឹងការអភិវឌ្ឍន៍នៅលើភ្នំបូកគោ ក្រុមហ៊ុនសុខាបានយកចិត្តទុកដាក់លើវិស័យជំនឿសាសនា ដែលជាវប្បធម៌និងប្រពៃណីទំនៀមទម្លាប់ដ៏ផូរផង់របស់ប្រជាពលរដ្ឋខ្មែរជាយូរលង់ណាស់មកហើយ ដោយបានបើកការដ្ឋានសាងសង់ព្រះពុទ្ធប្បដិមា កម្ពស់ ១០៨ ម៉ែត្រ មានលក្ខណៈ ស្របតាមក្បួនខ្នាតទំនៀមទម្លាប់ព្រះពុទ្ធសាសនា ដែលព្រះពុទ្ធបដិមានេះមានទំហំធំ និងកម្ពស់ខ្ពស់ជាងគេនៅព្រះរាជាណាចក្រកម្ពុជា និងស្ថិតនៅក្នុងចំណោមព្រះពុទ្ធប្បដិមា ដែលមានកម្ពស់ខ្ពស់ៗនៅបណ្ដាប្រទេសក្នុងពិភពលោកផងដែរ។ ឯកឧត្តមឧបនាយករដ្ឋមន្ត្រី ជា សុផារ៉ា បានលើកឡើងថាក្រោមម្លប់សន្តិភាព រាជរដ្ឋាភិបាលបានសម្រេចនូវសមិទ្ធផលថ្មីៗ ជាច្រើនដូចជា ១.ធានាបានស្ថិរភាពនយោបាយ និងសណ្ដាប់ធ្នាប់សង្គមនាំមកនូវការអភិវឌ្ឍន៍ ពិសេសនៅក្នុងដំណាក់កាលកូវីដ១៩ ២.ជោគជ័យនៃការបោះឆ្នោតក្រុមប្រឹក្សាឃុំសង្កាត់ ៣.ជោគជ័យនៃការរៀបចំកិច្ចប្រជុំកំពូលលើកទី៤០ និង៤១ និងកិច្ចប្រជុំពាក់ព័ន្ធនានាក្នុងឋានៈកម្ពុជា ជាប្រធានអាស៊ាន ៤.ជោគជ័យនៃការរៀបចំមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតនៅលើពិភពលោក ៥.គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ គម្រោងសាងសង់ស្ពានមិត្តភាពកម្ពុជាសាធារណរដ្ឋកូរ៉េ ជ្រោយចង្វារអរិយក្សត្រ គម្រោងពង្រឹងសមត្ថភាពប្រព័ន្ធបណ្ដាញបញ្ជូនអគ្គិសនីនៅខេត្តព្រះសីហនុ និងបណ្ដាការដ្ឋានសាងសង់ផ្លូវជាតិ ផ្លូវខេត្ត ផ្លូវជនបទ ស្ពានធំៗ រួមទាំងសំណង់ប្រព័ន្ធស្រោចស្រពខ្សែបណ្ដាញអគ្គិសនីនៅទូទាំងប្រទេស ៦.កំណើនសេដ្ឋកិច្ចប៉ាន់ស្មានប្រមាណ ៥,៥% នៅឆ្នាំ២០២២។ ជាមួយនេះ ឯកឧត្តមឧបនាយករដ្ឋមន្ត្រី ជា សុផារ៉ា បានថ្លែងអំណរគុណដល់ក្រុមហ៊ុនសុខាអូតែល ដែលបានរួមចំណែកយ៉ាងសកម្មក្នុងការអភិវឌ្ឍន៍តំបន់រមណីយដ្ឋានបូកគោ និងបានផ្ដួចផ្ដើមគំនិតសាងសង់ព្រះពុទ្ធប្បដិមានេះឡើង ដែលនឹងក្លាយទៅជាមជ្ឈមណ្ឌលទេសចរណ៍ព្រះពុទ្ធសាសនាដ៏ធំមួយនៅព្រះរាជាណាចក្រកម្ពុជា និងពិភពលោក៕