ឯកឧត្តមឧបនាយករដ្ឋមន្ត្រី ជា សុផារ៉ា អញ្ជើញសម្ពោធដាក់ឱ្យប្រើប្រាស់សមិទ្ធផលនានា ក្នុងវត្តសិបណយារាម ហៅវត្តចំបក់ នៅស្រុកមេមត់ ខេត្តត្បូងឃ្មុំ

February 03, 2023

សមិទ្ធផលនានាក្នុងវត្តសិបណយារាម ហៅវត្តចំបក់ ស្ថិតនៅក្នុងឃុំរូង ស្រុកមេមត់ ខេត្តត្បូងឃ្មុំ ត្រូវបានសម្ពោធឆ្លងដាក់ឱ្យប្រើប្រាស់ជាផ្លូវការនាព្រឹកថ្ងៃសុក្រ ១៣កើត ខែមាឃ ឆ្នាំខាល ចត្វាស័ក ព.ស.៥៦៦ ត្រូវនឹងថ្ងៃទី៣ ខែកុម្ភៈ ឆ្នាំ២០២៣ ក្រោមអធិបតីភាព ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន។

តាមរបាយការណ៍របស់ លោក ស្រេង លី អភិបាលនៃគណៈអភិបាលស្រុកមេមត់ បានឱ្យដឹងថា វត្តសិបណយារាម ហៅវត្តចំបក់នេះ បានកកើតឡើងតាំងពីឆ្នាំ ១៩៦៥ មកម៉្លេះ ។ បច្ចុប្បន្ន វត្តនេះ មានអាយុកាលជាង ៥៨ ឆ្នាំ។ វត្តនេះក៏មិនខុសពីវត្តដទៃទៀតដែរ ត្រូវបានរងការបំផ្លិចបំផ្លាញខ្ទេចខ្ទីអស់គ្មានសល់នៅក្នុងរបបកម្ពុជាប្រជាធិបតេយ្យ។ ក្រោយថ្ងៃរំដោះ ៧ មករា ១៩៧៩ វិស័យនានាត្រូវបានរស់ឡើងវិញរួមទាំងវិស័យពុទ្ធចក្រផងដែរ ដូច្នេះប្រជាពុទ្ធបរិស័ទបានមូលមតិគ្នាផ្តើមកសាងវត្តនេះឡើងវិញ សម្រាប់ទុកជាទីសក្ការៈបូជារបស់ពុទ្ធបរិស័ទ។ ដោយឡែក មហាកុដិថ្មី និងសមិទ្ធផលនានា ក្នុងវត្តសិបណយារាម ហៅវត្តចំបក់ដែលអាចកើតចេញជារូបរាងបាន និងត្រូវសម្ពោធឆ្លងឱ្យប្រើប្រាស់នាពេលនេះ អាស្រ័យដោយមានការចូលរួមចំណែកពីថ្នាក់ដឹកនាំនៃរាជរដ្ឋាភិបាល គឺ ឯកឧត្តមឧបនាយករដ្ឋមន្ត្រី ជា សុផារ៉ា រួមនិងសប្បុរសជនជិតឆ្ងាយ ដែលសរុបទទួលបានថវិកា ៧៤ ៩០៧ ដុល្លារអាមេរិក និងនៅខ្វះថ្លៃសាងសង់ចំនួន ១០ ៨៤៣ ដុល្លារអាមេរិកទៀត។

នាឱកាសនោះ ឯកឧត្តមឧបនាយករដ្ឋមន្ត្រី ជា សុផារ៉ា បាននាំមកនូវការផ្ដាំផ្ញើសាកសួរសុខទុក្ខនឹករលឹកពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះព្រះសង្ឃ និងប្រជាពលរដ្ឋទាំងអស់ ដែលជានិច្ចកាលសម្ដេចតែងតែយកអស់កម្លាំងកាយ ចិត្ត បញ្ញា ស្មារតី ខិតខំបំពេញតាមបំណងប្រាថ្នារបស់ប្រជាពលរដ្ឋលើគ្រប់វិស័យ ទាំងវិស័យអាណាចក្រ និងពុទ្ធចក្រ និងដោះស្រាយរាល់បញ្ហាប្រឈមនានា របស់ប្រជាពលរដ្ឋ សំដៅធ្វើយ៉ាងណាឱ្យពួកគាត់ មានសេចក្តីសុខ សុភមង្គល រីកចម្រើន ទៅមុខទៀត ដល់កូនចៅជំនាន់ក្រោយ និងបានជួយលើកស្ទួយជីវភាពរបស់ប្រជាពលរដ្ឋឱ្យកាន់តែប្រសើរឡើង ទើបពួកគាត់អាចមានលទ្ធភាពចូលរួមចំណែកក្នុងការកសាងសមិទ្ធផលនានា បម្រើឱ្យវិស័យពុទ្ធចក្របាន។ ឯកឧត្តមឧបនាយករដ្ឋមន្ត្រី បានកោតសរសើរចំពោះរចនាបថនៃព្រះវិហារនៅក្នុងវត្តសិបណយារាម ហៅវត្តចំបក់ ដែលមានលក្ខណៈល្អប្រសើរសាកសមជាទីកន្លែងប្រកបដោយមោទកភាពរបស់ប្រជាពលរដ្ឋនៅក្នុងឃុំរូងក្តី ពុទ្ធបរិស័ទចំណុះជើងវត្តក្តី និងពុទ្ធបរិស័ទគ្រប់ទិសទី ដែលបានចូលមកធ្វើបុណ្យទាននៅក្នុងបរិវេណវត្តនេះ តែងតែមានការកោតសរសើរចំពោះសមិទ្ធផល ដែលយើងទាំងអស់គ្នាបានរួមគ្នាកសាងនៅទីនេះ។ ម្យ៉ាងទៀត សមិទ្ធផលនេះ ក៏ចាត់ទុកថាជាគំរូមួយផងដែរ។ ក្រៅពីរចនាបទជាទស្សនទានរបស់ព្រះគ្រូចៅអធិការវត្ត ការកសាងសមិទ្ធផលទាំងនេះក៏ជាការបម្រើដល់ការធ្វើសក្ការៈបូជារបស់ពុទ្ធបរិស័ទផង និងឧទ្ទិសដល់វិស័យព្រះពុទ្ធសាសនាផង។ឯកឧត្តមឧបនាយករដ្ឋមន្ត្រី ជា សុផារ៉ា បានបញ្ជាក់ថា ភាពសុខដុមរបស់ប្រជាពលរដ្ឋលើគ្រប់ផ្នែកគ្រប់វិស័យ រួមទាំងវិស័យសាសនាផងនោះ អាចកើតឡើងបានអាស្រ័យដោយប្រទេសជាតិមានសុខសន្តិភាព ស្ថិរភាព នយោបាយ ដែលប្រមុខរាជរដ្ឋាភិបាល គឺសម្ដេចអគ្គមហាសេនាបតីតេជោ ហ៊ុន សែន បានខិតខំប្រឹងប្រែងរកមកបានដោយលំបាក។ ឯកឧត្តមឧបនាយករដ្ឋមន្រ្តី បានសំណូមពរឱ្យប្រជាពលរដ្ឋនៅក្នុងខេត្តត្បូងឃ្មុំ រួមនឹងប្រជាពលរដ្ឋនៅទូទាំងប្រទេស ត្រូវបន្តខិតខំរក្សានូវសុខសន្តិភាពនេះសម្រាប់ជាប្រយោជន៍ជាតិ និងប្រជាជន ដោយត្រូវធ្វើយ៉ាងណារួមគ្នាថែរក្សាសុខសន្តិភាពនេះឱ្យបានស្ថិតស្ថេរ គង់វង្ស ជានិច្ចនិរន្តរ៍ ដើម្បីឱ្យកម្ពុជាឈានឆ្ពោះទៅរកវឌ្ឍនភាព និងការអភិវឌ្ឍន៍លើគ្រប់វិស័យប្រជាពលរដ្ឋមានជីវភាពធូរធារ បានរស់នៅជួបជុំគ្នាប្រកបដោយភាពសុខដុមរមនា បន្តរហូតដល់កូនចៅជំនាន់ក្រោយៗទៀត។ ទន្ទឹមនេះ ឯកឧត្តមឧបនាយករដ្ឋមន្ត្រី បានលើកឡើងអំពីយុទ្ធសាស្ត្រប្រកបដោយភាពជោគជ័យក្នុងការទប់ស្កាត់វីរុសកូវីដ១៩ របស់ប្រមុខរាជរដ្ឋាភិបាលកម្ពុជា ដែលបានធ្វើឱកយប្រទេសជាតិអាចបើកដំណើរការឡើងវិញ លើគ្រប់វិស័យ ហើយកម្ពុជាអាចរៀបចំព្រឹត្តិការណ៍ធំៗបាន ដូចជាការធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី ៤០ និងទី ៤១ ប្រកបទៅដោយជោគជ័យ និងធានាបាននូវសុវត្ថិភាពដល់ដល់ថ្នាក់ដឹកនាំ និងគណៈប្រតិភូនៃបណ្ដាប្រទេសនានា ដែលបានមកចូលរួមក្នុងជំនួបកំពូលនេះ ដោយមិនមានការឆ្លងរាតត្បាតពីវីរុសកូវីដ ១៩ ឡើយ។ ឯកឧត្តមឧបនាយករដ្ឋមន្ត្រី ជា សុផារ៉ា ក៏បានអំពាវនាវដល់ប្រជាពលរដ្ឋទាំងអស់នៅទូទាំងប្រទេស ក៏ដូចជាប្រជាពលរដ្ឋនៅក្នុងខេត្តត្បូងឃ្មុំ ឱ្យបន្តផ្ដល់ការគាំទ្រដល់រាជរដ្ឋាភិបាលកម្ពុជាក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន ដើម្បីដឹកនាំប្រទេសជាតិឈានឆ្ពោះទៅរកវឌ្ឍនភាពតាមរយៈការបោះឆ្នោត នាពេលខាងមុខនេះ ឱ្យទទួលបានអាសនៈសរុប ៨ អាសនៈ នៅក្នុងខេត្តត្បូងឃ្មុំ នេះ។

ឆ្លៀតក្នុងឱកាស ឯកឧត្តមឧបនាយករដ្ឋមន្ត្រី ជា សុផារ៉ា បាននាំយកថវិការបស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធិបណ្ឌិត ប្រគេនដល់ព្រះចៅអធិការវត្តសិបណ យារាម ហៅវត្តចំបក់នេះ ចំនួន ១០ ០០០ ដុល្លារអាមេរិក ទុកសម្រាប់ចូលរួមចំណែកបង្គ្រប់ថ្លៃជាងសាងសង់ ផងដែរ៕