ឯកឧត្តមឧបនាយករដ្ឋមន្ត្រី ជា សុផារ៉ា អញ្ជើញសម្ពោធឆ្លងឧបដ្ឋានសាលាថ្មី និងសមិទ្ធផលនានា ក្នុងវត្តហត្ថិវនារាម ហៅវត្តក្តុល ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ

February 27, 2023

នាព្រឹកថ្ងៃចន្ទ ៨កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែកុម្ភៈ ឆ្នាំ២០២៣ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិបណ្ឌិត ប៊ុន រ៉ានី ហ៊ុនសែន បានអញ្ជើញជាអធិបតីក្នុងពិធីសម្ពោធឆ្លងឧបដ្ឋានសាលាថ្មី និងសមិទ្ធផលនានា ក្នុងវត្តហត្ថិវនារាម ហៅវត្តក្តុល ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ។

តាមរបាយការណ៍របស់ លោក ស្រេង លី អភិបាលស្រុកមេមត់ បានឱ្យដឹងថា វត្តហត្ថិវនារាម ហៅវត្តក្តុល បានកសាងឡើងក្នុងឆ្នាំ ១៩៦៣ រហូតមកទល់បច្ចុប្បន្ននេះ មានអាយុកាលប្រមាណជាង ៦០ ឆ្នាំហើយ។ វត្តនេះ មានផ្ទៃដីប្រមាណ ២៩៦៥០,៥៩ ម៉ែត្រការ៉េ និងមានចម្ងាយប្រមាណ ២២ គីឡូម៉ែត្រ ពីទីរួមស្រុកមេមត់។ ចាប់តាំងពីកកើតរហូតមកដល់បច្ចុប្បន្ន វត្តនេះ ត្រូវបានគ្រប់គ្រងដោយព្រះចៅអធិការវត្តចំនួន ៧ អង្គ មកហើយ។ វត្តនេះក៏មិនខុសពីវត្តដទៃទៀត នៅទូទាំងប្រទេសដែរ គឺបានរងនូវវិនាសកម្មក្នុងរបបកម្ពុជាប្រជាធិបតេយ្យ ដែលបានធ្វើឱ្យវត្តនេះខូចខាតខ្ទេចខ្ទីគ្មានសល់។ ក្រោយថ្ងៃរំដោះ ៧ មករា ១៩៧៩ វត្តហត្ថិវនារាម ហៅវត្តក្តុល ត្រូវបានរៀបចំកសាងឡើងវិញជាបន្តបន្ទាប់ និងមានការរីកចម្រើនពីមួយឆ្នាំទៅមួយឆ្នាំ ក្រោមការយកចិត្តទុកដាក់ និងការចូលរួមពី សម្ដេចតេជោនាយករដ្ឋមន្រ្តី និងសម្ដេចកិតិ្តព្រឹទ្ធបណ្ឌិត ព្រមទាំង ឯកឧត្តមឧបនាយករដ្ឋមន្រ្តី ជា សុផារ៉ា រួមជាមួយឥស្សរជនផ្សេងទៀតជាបន្តបន្ទាប់ និងពុទ្ធបរិស័ទចំណុះជើងវត្តផងដែរ។ ដោយឡែកឧបដ្ឋានសាលាថ្មី ដ៏ធំស្កឹមស្កៃទំហំ ២៣ម x ៤៣ម និងសមិទ្ធផល នានា ក្នុងវត្តហត្ថិវនារាម ហៅវត្តក្តុល ដែលត្រូវសម្ពោធឆ្លងដាក់ឱ្យប្រើប្រាស់នៅពេលនេះបានចាប់ផ្ដើមកសាងឡើងនា ខែធ្នូ ឆ្នាំ ២០១៦ រហូតមកទល់បច្ចុប្បន្ននេះបានសាងសង់រួចរាល់ជាស្ថាពរ ដោយចំណាយថវិកាសរុបអស់ ៩០៥ ០៨០ ដុល្លារអារមេរិក ជាថវិកាដែលបានមកពីការរួមចំណែកពី ឯកឧត្តមឧបនាយករដ្ឋមន្រ្តី ជា សុផារ៉ា និងលោកជំទាវ ឯកឧត្តម ប្រាជ្ញ ចន្ទ និងលោកជំទាវ ឯកឧត្តម អ៊ុក ប៊ុនឈឿន និងលោកជំទាវ ព្រមទាំងសប្បុរសជន និងពុទ្ធបរិស័ទចំណុះជើងវត្តជាច្រើនរូបទៀត ដោយបច្ចុប្បន្នវត្តនៅខ្វះថ្លៃជាងសាងសង់ និងសម្ភារៈសំណង់ចំនួន ១២ ៣០០ ដុល្លារអាមេរិក។

ក្នុងឱកាសនោះ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បាននាំមកនូវការផ្ដាំផ្ញើសាកសួរសុខទុក្ខ និងការនឹករលឹកគោរពស្រលាញ់ពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប្រគេនដល់ព្រះសង្ឃ និងជូនចំពោះប្រជាពលរដ្ឋទាំងអស់ក្នុងស្រុកមេមត់ ខេត្តត្បូងឃ្មុំ ពិសេសប្រជាពលរដ្ឋក្នុងឃុំទន្លូង និងអាចារ្យ គណៈកម្មការ លោកគ្រូ អ្នកគ្រូ សិស្សានុសិស្ស ទាំងអស់ណដែលមានវត្តមាននៅទីនេះ ដែលជានិច្ចកាលសម្ដេចតែងតែបានខិតខំបំពេញតាមបំណងប្រាថ្នារបស់ប្រជាពលរដ្ឋលើគ្រប់វិស័យទាំងវិស័យអាណាចក្រ និងពុទ្ធចក្រ និងដោះស្រាយរាល់បញ្ហាប្រឈមនានា របស់ប្រជាពលរដ្ឋ លើកស្ទួយជីវភាពរស់នៅឱ្យប្រសើរឡើង ដើម្បីឱ្យប្រជាពលរដ្ឋមានលទ្ធភាពធនធានគ្រប់គ្រាន់ក្នុងការចូលរួមលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋតាមរយៈការចូលរួមកសាងសមិទ្ធផលផ្សេងៗ ក្នុងវិស័យពុទ្ធចក្រ។ ឯកឧត្តមឧបនាយករដ្ឋមន្រ្តី បានចាត់ទុកឧបដ្ឋានសាលាថ្មី និងសមិទ្ធិផលនានាក្នុងវត្តហត្ថិវនារាម ហៅវត្តក្តុល ដែលត្រូវសម្ពោធឆ្លងនាពេលនេះ ថាជាសមិទ្ធផលដ៏ធំស្កឹមស្កៃមួយសម្រាប់ទុកជាសម្បត្តិគរុភ័ណ្ឌក្នុងវិស័យព្រះពុទ្ធសាសនា ដែលសប្បុរសជន និងពុទ្ធបរិស័ទជិតឆ្ងាយបានរួមចំណែកក្នុងការកសាង ដោយសទ្ធាជ្រះថ្លា ដើម្បីឱ្យវត្តនេះមានគ្រប់រចនាសម្ព័ន្ធសាកសមជាទីសក្ការៈបូជារបស់ពុទ្ធបរិស័ទគ្រប់ទិសទី។ ឯកឧត្តមឧបនាយករដ្ឋមន្រ្តី ជា សុផារ៉ា បានសំណូមពរដល់ប្រជាពលរដ្ឋទាំងអស់នៅក្នុងឃុំទន្លូង ក៏ដូចជាពុទ្ធបរិស័ទជិតឆ្ងាយទាំងអស់ ឱ្យចូលរួមថែរក្សាសមិទ្ធផលនានា ក្នុងវត្តហត្ថិវនារាម ហៅវត្តក្តុល នេះឱ្យបានគង់វង្ស ដើម្បីលើកស្ទួយវិស័យព្រះពុទ្ធសាសនា ពីព្រោះសមិទ្ធផលទាំងនេះ គឺជាមោទកភាពរបស់ប្រជាពលរដ្ឋជាពុទ្ធបរិស័ទទាំងអស់ ក៏ដូចជាប្រជាពលរដ្ឋក្នុងឃុំទន្លូងផ្ទាល់ ដែលបានរួមចំណែកបរិច្ចាគធនធានផ្ទាល់ខ្លួន ដើម្បីឱ្យសមិទ្ធផលដ៏ល្អទាំងនេះលេចចេញជារូបរាងបាន ហើយឯកឧត្តមក៏សូមឧទ្ទិសកុសល ដែលកើតចេញពីការកសាងសមិទ្ធផលនានា ក្នុងវត្តនេះជូនដល់វិញ្ញាណក្ខ័ន្ធយុទ្ធជន យុទ្ធនារី ដែលបានពលីជីវិតក្នុងបុព្វហេតុរំដោះជាតិ និងប្រជាជន ព្រមទាំងវិញ្ញាណក្ខ័ន្ធប្រជាជនស្លូតត្រង់ដែលបានបាត់បង់ជីវិតយ៉ាងអយុត្តិធម៌ក្នុងរបបកម្ពុជាប្រជាប្រជាធិបតេយ្យ សូមបានទៅកាន់សុគតិភពកុំបីឃ្លាងឃ្លាតផងដែរ។ ឯកឧត្តមឧបនាយករដ្ឋមន្រ្តី ជា សុផារ៉ា បានបញ្ជាក់ថា រាជរដ្ឋាភិបាលក្រោមការដឹកនាំរបស់ សម្តេចតេជោនាយករដ្ឋមន្រ្តី បានដឹកនាំប្រទេសជាតិប្រកបដោយយុទ្ធសាស្រ្តត្រឹមត្រូវ គ្រប់ជ្រុងជ្រោយ ផ្តល់នូវក្តីសង្ឃឹម និងភាពកក់ក្តៅដល់ប្រជាពលរដ្ឋ ឱ្យចាកផុតពីភាពភ័យខ្លាច នានា ក្នុងនោះក៏មានយុទ្ធសាស្រ្តទប់ស្កាត់វីរុសឆ្លងរាតត្បាតកូវីត ១៩ ប្រកបដោយភាពជោគជ័យ ដែលបង្កលក្ខណៈឱ្យកម្ពុជាអាចបើកដំណើរការឡើងវិញលើគ្រប់វិស័យ ដូច្នេះ ឯកឧត្តមឧបនាយករដ្ឋមន្រ្តី បានអំពាវនាវដល់ប្រជាពលរដ្ឋទាំងអស់ត្រូវចូលរួមបោះឆ្នោតជ្រើសតាំងតំណាងរាស្រ្ត ឱ្យបានគ្រប់ៗគ្នានាថ្ងៃទី ២៣ ខែកក្កដា ឆ្នាំ២០២៣ខាងមុខនេះ ដោយផ្តល់ការគាំទ្រយ៉ាងពេញទំហឹងដល់ សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី ដើម្បីបង្ហាញពីការដឹងនូវគុណូបការៈចំពោះការខិតខំប្រឹងប្រែងឥតស្រាកស្រាន្តរបស់សម្តេច ដើម្បីបុព្វហេតុជាតិ និងប្រជាជន។

បន្ទាប់មកឯកឧត្តមឧបនាយករដ្ឋមន្ត្រី ជា សុផារ៉ា ក៏បាននាំយកថវិការបស់ សម្តេចតេជោនាយករដ្ឋមន្រ្តី ប្រគេនដល់ព្រះចៅអធិការវត្តហត្ថិវនារាម ហៅវត្តក្តុល ដើម្បីបង្រ្គប់ថ្លៃជាងសាងសង់ និងសម្ភារៈសំណង់ចំនួន ១២ ៣០០ ដុល្លារអាមេរិក ផងដែរ៕