ឯកឧត្តមឧបនាយករដ្ឋមន្ត្រី ជា សុផារ៉ា ចុះពិនិត្យទីតាំងដីសម្រាប់សាងសង់លំនៅឋាន ចែកជូនគ្រួសារកងទ័ព នគរបាលឈរជើង អតីតកងកម្លាំងប្រដាប់អាវុធ និងគ្រួសារ និងប្រជាពលរដ្ឋក្រីក្រទូទៅ នៅតាមខ្សែបន្ទាត់ព្រំដែនកម្ពុជា វៀតណាម ក្នុងភូមិសាស្រ្តស្រុកចន្ទ្រា ខេត្តស្វាយរៀង

March 05, 2023

នាព្រឹកថ្ងៃអាទិត្យ ១៤កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ០៥ ខែមិនា ឆ្នាំ២០២៣ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការសម្បទានដីសង្គមកិច្ចថ្នាក់ជាតិ រួមនឹងប្រតិភូអន្តរក្រសួងបានអញ្ជើញចុះពិនិត្យទីតាំងដីសម្រាប់សាងសង់លំនៅឋាន ចែកជូនគ្រួសារកងទ័ព នគរបាលឈរជើង អតីតកងកម្លាំងប្រដាប់អាវុធ និងគ្រួសារ និងប្រជាពលរដ្ឋក្រីក្រទូទៅ នៅតាមខ្សែបន្ទាត់ព្រំដែនកម្ពុជា វៀតណាម ក្នុងភូមិសាស្រ្តស្រុកចន្ទ្រា ខេត្តស្វាយរៀង។

តាមរបាយការណ៍បានឱ្យដឹងថា កន្លងមកខេត្តស្វាយរៀង បានអនុវត្តគម្រោងដីសម្បទានសង្គមកិច្ចបានចំនួន ២ទីតាំងហើយ ដែលក្នុងនោះមានគម្រោងចាស់មួយមានទីតាំងស្ថិតនៅក្នុងភូមិជីកដី ឃុំអណ្ដូងត្របែក ស្រុករមាសហែក មានក្រឡាផ្ទៃ ១៥៣ ហិកតា ៦៥អា ដោយបានបែងចែកផ្ទៃដីលំនៅឋានទំហំ ៤០ ម៉ែត្រគុណនឹង ៥០ ម៉ែត្រ ក្នុងមួយគ្រួសារជូនប្រជាពលរដ្ឋ ៤០០ គ្រួសារ ដែលចេញពីអតីតកងកម្លាំងប្រដាប់អាវុធចំនួន ៣៣១ គ្រួសារ និងចេញពីគ្រួសារកងទ័ព និងនគរបាលជាតិចំនួន ៦៩ គ្រួសារ និងបានស្ថាបនាផ្លូវប្រវែង ១០ គីឡូម៉ែត្រ ៤០០ ម៉ែត្រ សាងសង់លូកាត់ផ្លូវចំនួន ២០ កន្លែង ដាក់បង្គោលភ្លើងនិងតភ្ជាប់បណ្ដាញអគ្គិសនីចូលផ្ទះប្រជាពលរដ្ឋបានចំនួន ៤០០ ខ្នងផ្ទះ បានជីកអណ្ដូងស្នប់ចំនួន ៣៤ អណ្ដូង និងធ្វើបង្គន់អនាម័យចំនួន ១៨០ បង្គន់។ ដោយឡែកចំពោះគម្រោងថ្មីដែលខេត្តស្វាយរៀង ទើបទទួលបានតាមរយៈលិខិតសជណ លេខ ១៩៥ ចុះថ្ងៃទី ១៧ ខែកុម្ភៈឆ្នាំ ២០២៣ ដែលរាជរដ្ឋាភិបាលបានអនុញ្ញាតឱ្យប្រើប្រាស់ដីតាមបណ្ដោយព្រំដែន បន្ទាប់ពីយើងបានបោះបង្គោលខណ្ឌសីមាព្រំដែនរវាងខេត្តស្វាយរៀងនៃព្រះរាជាណាចក្រកម្ពុជាជាមួយនឹងខេត្តឡុងអាន និងខេត្តតៃនិញនៃប្រទេសវៀតណាម ដែលមានផ្ទៃដីសរុប ៦៥៣ ហិកតា ២៥ អា សម្រាប់អនុវត្តកម្មវិធីសម្បទានដីសង្គមកិច្ចជូនគ្រួសារកងទ័ព នគរបាលជាតិឈរជើងតាមបណ្ដោយព្រំដែនកម្ពុជាវៀតណាម អតីតកងកម្លាំងប្រដាប់អាវុធនិងគ្រួសារ និងប្រជាពលរដ្ឋក្រីក្រទូទៅ។ ក្នុងជំហានទី១ នេះ រដ្ឋបាលខេត្តស្វាយរៀង បានកំណត់យកផ្ទៃដីទំហំ ៣០០ ហិកតា ៨អា ដើម្បីអនុវត្តនៅក្នុងស្រុកកំពង់រោទិ៍ និងស្រុកចន្ទ្រា ដោយបែងចែកជាតំបន់លំនៅឋាននៅចន្លោះបង្គោលព្រំដែនលេខ ២០០ ចាប់ពីចំណុចស្រុកចន្ទ្រា រហូតដល់បង្គោលព្រំដែនលេខ ២០២/២ ក្នុងនោះបានបែងចែកដីឡូលំនៅឋាជូនប្រជាពលរដ្ឋបាន ១២៣៦ ឡូត៍ និងបែងចែកជាហេដ្ឋារចនាសម្ព័ន្ធបម្រើឱ្យតំបន់រដ្ឋបាលសាធារណៈដូចជា ផ្សារ សាលារៀន វត្តអារាម ដីរួមភូមិ ប៉ុស្តិ៍ការពារព្រំដែនទាំងខាងកងទ័ព និងនគរបាលជាតិ ក្នុងនោះក៏មានរៀបចំដីសមាគមនារីចំនួន ៣ ហិកតា និងដីផ្សារចំនួន ៣ ហិកតា ២៩អា និងមានរៀបចំជាសួនសាធារណៈបង្កើនភាពបៃតង និងដីការិយាល័យទី ២ កងទ័ពជើងគោក ៥ហិកតា។ សម្រាប់ដីលំនៅឋានជូនប្រជាពលរដ្ឋរស់នៅក្នុងមួយគ្រួសារ គឺមានទំហំ ៣០ ម៉ែត្រគុណនឹង ៤០ ម៉ែត្រ។

ក្នុងឱកាសនោះ ឯកឧត្តមឧបនាយករដ្ឋមន្ត្រី ជា សុផារ៉ា បានឱ្យដឹងថា ការជួបជុំគ្នានាពេលនេះ គឺដោយយោងតាមបទបញ្ជាដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីឱ្យយើងបានរៀបចំទីតាំងនេះសម្រាប់ធ្វើជាលំនៅឋានរបស់កងកម្លាំងប្រដាប់អាវុធ អតីតយុទ្ធជនក៏ដូចជាប្រជាពលរដ្ឋក្រីក្រទូទៅ ដោយនៅក្នុងទីតាំងទាំង២ នេះ យើងបានទទួលការគាំទ្រពីរាជរដ្ឋាភិបាលនូវលំនៅឋានចំនួន ១០០ ខ្នង ក្នុងនោះលំនៅឋាន ៥០ ខ្នង នៅក្នុងស្រុកចន្ទ្រា និង ៥០ ខ្នងទៀតនៅស្រុកកំពង់រោទិ៍។ ឯកឧត្តមឧបនាយករដ្ឋមន្ត្រី បានស្នើសុំឱ្យមានការគាំទ្រពីរដ្ឋមន្ត្រីក្រសួងអភិវឌ្ឍន៍ជនបទ ចំពោះការស្ថាបនាផ្លូវចូលទៅក្នុងភូមិដែលយើងត្រូវអនុវត្តគម្រោងសាងសង់លំនៅឋាន នេះហើយក៏ត្រូវអមជាមួយនឹងការដាំដើមឈើនៅតាមដងផ្លូវផងដែរ។ ជាមួយនេះ ឯកឧត្តមឧបនាយករដ្ឋមន្រ្តី បានស្នើឱ្យមានការជីកអណ្ដូងទឹកស្អាតសម្រាប់ប្រជាពលរដ្ឋប្រើប្រាស់។ ចំណែកឯក្រសួងបរិស្ថានសូមចូលរួមគាំទ្រជួយផ្គត់ផ្គង់កូនឈើសម្រាប់ដាំដុះបង្កើតជាម្លប់សម្រាប់ជ្រកកោនដល់ប្រជាពលរដ្ឋ បង្កើនភាពបៃតងក្នុងមូលដ្ឋាន។ ចំពោះក្រសួងសង្គមកិច្ច នៅពេលដែលបានក្តាប់មុខសញ្ញានេះហើយឯកឧត្តមឧបនាយករដ្ឋមន្ត្រី ជា សុផារ៉ា បានស្នើឱ្យមានការគាំទ្រចំពោះបណ្ណក្រីក្រ ១ និងបណ្ណក្រីក្រ ២ ស្របតាមជំនាញរបស់ក្រសួង។ ដោយឡែកចំពោះស្ថាប័ន CMAC ដែលដឹកនាំដោយ ឯកឧត្តម ហេង រតនា និងក្រុមការងារ ឯកឧត្តមឧបនាយករដ្ឋមន្ត្រី ជា សុផារ៉ា បានស្នើឱ្យមានការបោសសម្អាតមីន និងយុទ្ធភ័ណ្ឌមិនទាន់ផ្ទុះជៀសវាងកិច្ចការ ដែលយើងបានអនុវត្តហើយមានការខ្វះចន្លោះ។ ចំពោះក្រសួងរៀបចំដែនដី នគរូបនីយកម្ម និងសំណង់ ឯកឧត្តមឧបនាយករដ្ឋមន្ត្រី ជា សុផារ៉ា បានជំរុញឱ្យឱ្យមានផែនការគាំទ្រដល់ការរៀបចំសាងសង់លំនៅឋានក្នុងស្រុកចន្ទ្រា និងស្រុកកំពង់រោទ៍ រៀបចំដើម្បីធ្វើការសិក្សាតំបន់នេះ ដឹកនាំដោយ ឯកឧត្តម បេងហុង សុជាតិ ខេមរ៉ូ ក្នុងការរៀបចំសិក្សាប្លង់គោលប្រើប្រាស់ដីនៅក្នុងតំបន់នេះគួបផ្សំជាមួយនឹងដំណើរការតែម្ដង ដើម្បីកសាងហេដ្ឋារចនាសម្ព័ន្ធ ផែនការប្រើប្រាស់ដីនៅតំបន់នេះ ដើម្បីបែងចែកឱ្យបានច្បាស់លាស់ចំពោះដីលំនៅឋាន និងដីស្រែឱ្យបានរួចជាស្រេចជៀសវាងនូវការអភិវឌ្ឍន៍ ដែលមិនចំទិសដៅ។ ឯកឧត្តមឧបនាយករដ្ឋមន្ត្រី ក៏បានស្នើសុំឱ្យមានការគាំទ្រពីអាជ្ញាធរមូលដ្ឋានក៏ដូចជាអភិបាលខេត្តស្វាយរៀង ដើម្បីរៀបចំតំបន់នេះឱ្យក្លាយទៅជាតំបន់មានសក្តានុពល មានការអភិវឌ្ឍ និងលើកស្ទួយដល់ជីវភាពរស់នៅរបស់ប្រជាពលរដ្ឋ ដូចជាការគៀងគរសប្បុរសជនឱ្យជួយសាងសង់ព្រះវិហារ ឧបដ្ឋានសាលាក្នុងវត្តអារាម ដោយមិនត្រូវឱ្យមានការកែប្រែរចនាបថនោះទេ សម្រាប់បម្រើឱ្យវិស័យព្រះពុទ្ធសាសនាក្នុងមូលដ្ឋាននេះ។ ក្រៅពីនេះ ឯកឧត្តមឧបនាយករដ្ឋមន្ត្រី បានស្នើឱ្យលោកជំទាវកិតិ្តសង្គហបណ្ឌិត ម៉ែន សំអន ជួយសម្របសម្រួលរៀបចំក្នុងការសាងសង់ផ្សារនៅលើផ្ទៃដី ប្រមាណ ៣ ហិកតា ដោយមិនត្រូវឱ្យមានការកែប្រែរចនាបថនោះទេ៕