ឯកឧត្ដមឧបនាយករដ្ឋមន្ត្រី ជា សុផារ៉ា សំណេះសំណាលជាមួយថ្នាក់ដឹកនាំ និងមន្ត្រីរាជការ ជានារីក្រោមឱវាទក្រសួង ក្នុងពិធីអបអរសាទរខួបអនុស្សាវរីយ៍លើកទី១១២ ទិវាអន្តរជាតិនារី ៨មិនា ឆ្នាំ(១៩១០ ២០២៣)

March 07, 2023

នារសៀលថ្ងៃអង្គារ ១រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៧ ខែមីនា ឆ្នាំ២០២៣ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីរាជការ ជានារីក្រោមឱវាទក្រសួង ក្នុងពិធីអបអរសាទរខួបអនុស្សាវរីយ៍លើកទី១១២ ទិវាអន្តរជាតិនារី ៨ មីនា (ឆ្នាំ១៩១០ ដល់ ២០២៣) ក្រោមមូលបទ ស្ត្រីរួមគ្នារក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល ដោយមានការចូលរួមពីនារីក្នុងវិស័យដីធ្លី និងសំណង់មកពីគ្រប់ថ្នាក់ដែលនៅថ្នាក់ក្រសួងមានចំនួនសរុប ២៨១នាក់ និងថ្នាក់រាជធានី ខេត្ត មាន៣៣៩ នាក់។

តាមលោកជំទាវ ទេព បូរ៉ាមីន រដ្ឋលេខាធិការ និងជាប្រធានក្រុមការងារយេនឌ័រនៃក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថាតាមរយៈមូលបទក្នុងទិវានារីអន្តរជាតិ ៨ មីនា ឆ្នាំ ២០២៣ នេះគឺ ស្រ្តីរួមគ្នារក្សាសុខសន្តិភាពដើម្បីកិច្ចអភិវឌ្ឍក្នុងយុគសម័យឌីជីថល បានបង្ហាញឱ្យឃើញថាការលើកកម្ពស់សមភាពយេនឌ័រនៅតែជារបៀបវារៈអាទិភាពរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស ការលើកកម្ពស់សមធម៌ បរិយាប័ន្ន និងភាពសុខដុមក្នុងសង្គម ដែលនឹងផ្តល់តម្លៃបន្ថែមនូវកាលានុវត្តភាពដល់ប្រជាពលរដ្ឋគ្រប់រូប ជាពិសេសស្រ្តី និងក្មេងស្រី អាចមានលទ្ធភាពគ្រប់គ្រាន់ក្នុងការអនុវត្តសិទ្ធិនិងការប្រើប្រាស់សក្តានុពលរបស់ខ្លួនជាអតិបរមា។ កត្តានេះជាឱកាសរួម ដើម្បីឱ្យគ្រប់រូបចូលរួមជាដៃគូជាមួយបុរសក្នុងដំណើរការអភិវឌ្ឍសេដ្ឋកិច្ចនិងសង្គមជាតិ ឆ្ពោះទៅធ្វើឱ្យសម្រេចបាននូវចក្ខុវិស័យរបស់រាជរដ្ឋាភិបាល ដែលនឹងប្រែក្លាយប្រទេសកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសអភិវឌ្ឍនៅឆ្នាំ ២០៥០។ លោកជំទាវ បន្តថា រាជរដ្ឋាភិបាលកម្ពុជាក៏បាននឹងកំពុងផ្តោតលើការដោះស្រាយគម្លាតយេនឌ័រក្នុងវិស័យឌីជីថលសំដៅបង្កើនការចូលរួមរបស់ស្រ្តីក្នុងវិស័យនេះ ការប្រើប្រាស់បច្ចេកវិទ្យា ដោយប្រសិទ្ធភាព ការអប់រំចំណេះដឹង និងជំនាញផ្នែកវិទ្យាសាស្រ្ត បច្ចេកវិទ្យា វិស្វកម្ម សិល្បៈនៃការច្នៃប្រឌិត និងគណិតវិទ្យា (STEAM)។ ទន្ទឹមនេះ រាជរដ្ឋាភិបាលក៏នឹងកែលម្អការរៀបចំកញ្ចប់ថវិកាឆ្លើយតបនឹងគោលនយោបាយយេនឌ័រតាមវិស័យជំនាញនីមួយៗ ដើម្បីអាចធ្វើការវិភាជន៍ថវិកាប្រចាំឆ្នាំរបស់ជាតិលើការងារយេនឌ័របានដូចវិស័យជំនាញផ្សេងៗទៀតដែរ។

ក្នុងឱកាស នោះ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានចាត់ទុកមូលបទក្នុងទិវានារីអន្តរជាតិ ៨ មីនា ឆ្នាំនេះ ថា មានសារសំខាន់ក្នុងការផ្តល់ការគាំទ្រជាបន្តទៀត ដើម្បីប្រសិទ្ធភាព និងភាពកក់ក្តៅរបស់ស្រ្តី។ ជារៀងរាល់ឆ្នាំក្រសួងរៀបចំដែនដី នគរូបនីយកម្មនិងសំណង់ តែងតែយកឱកាសនេះ ដើម្បីជួបសំណេះសំណាលជាមួយនារីក្រោមឱវាទក្រសួង ប៉ុន្តែបានអាក់ខានរយៈពេល ៣ឆ្នាំ ជាប់ៗគ្នា ដែលមិនបានរៀបចំពិធីជួបជុំគ្នា ដោយសារមានការឆ្លងរាតត្បាតពីជំងឺកូវីដ ១៩។ ឯកឧត្តមឧបនាយករដ្ឋមន្រ្តី បានរំលេចអំពីប្រវត្តិនៃការកកើតទិវានារីអន្តរជាតិ ចាប់តាំងពីឆ្នាំ1១៩១០ ដល់ឆ្នាំ ២០២៣ និងការផ្តល់តម្លៃដល់ស្រ្តីក្នុងបរិបទសង្គមកម្ពុជា ដែលមានតាំងពីបុរាណកាលរហូតមកដល់បច្ចុប្បន្ននេះ។ ឯកឧត្តមឧបនាយករដ្ឋមន្រ្តី បានផ្តល់ការគាំទ្រចំពោះមូលបទក្នុងទិវានារីអន្តរជាតិ ៨ មីនា ឆ្នាំនេះ ដែលមូលបទនេះ គឺសាកសមពីព្រោះថា ដើម្បីឱ្យមានសន្តិភាពពេញលេញអាចអភិវឌ្ឍប្រទេសជាតិបាននេះ គឺជាខ្លឹមសារដ៏ពិសិដ្ឋ ដែលប្រជាជាតិកម្ពុជាធ្លាប់បានឆ្លងកាត់នូវរបបដ៏ខ្មៅងងឹត និងសង្រ្គាមរ៉ាំរ៉ៃមានតែឈាម និងទឹកភ្នែក និងមានបំណងប្រាថ្នាតែមួយគត់ គឺចង់ឱ្យប្រទេសជាតិមានសុខសន្តិភាព និងភាពសុខដុមរមនានៅក្នុងក្រុមគ្រួសារ និងសង្គមជាតិ ដូច្នេះទើបយុទ្ធជន យុទ្ធនារីតែងតែមានការប្តេជ្ញាចិត្តទប់ស្កាត់កុំឱ្យសោកនាដកម្មប្រល័យពូជសាសន៍នេះវិលត្រលប់មកសាជាថ្មីទៀត ដោយយកអាយុជីវិតធ្វើជាដើមទុនក្នុងការតស៊ូរំដោះប្រទេសជាតិឱ្យរួចផុតពីរបបដ៏ខ្មៅងងឹតនេះ និងទទួលបាននូវសុខសន្តិភាពពេញបរិបូរណ៍ទូទាំងប្រទេស។ ឯកឧត្តមឧបនាយករដ្ឋមន្រ្តី បញ្ជាក់ថា នេះគឺជាឆ្នាំចុងក្រោយនៃការអនុវត្តនូវគោលនយោបាយរបស់រាជរដ្ឋាភិបាលក្នុងនីតិកាលទី ៦ ហើយយើងទាំងអស់គ្នានឹងចូលរួមបោះឆ្នោតជ្រើសតាំងតំណាងរាស្រ្តនីតិកាលទី ៧ នាថ្ងៃទី ២៣ ខែកក្កដា ឆ្នាំ ២០២៣។ នាឆ្នាំ ២០២២ កន្លងមក ថ្នាក់ដឹកនាំ មន្រ្ដីរាជការទាំងអស់នៃក្រសួងរៀបចំដែនដី នគរូបនីយកម្ម និងសំណង់ បានរួមចំណែកយ៉ាងសកម្មស្តារឡើងវិញនូវស្ថានភាពគ្រប់បែបយ៉ាងប្រកបដោយភាពសប្បាយរីករាយ ដោយក្រសួងបានផ្តល់សេវាជាច្រើនជូនដល់ប្រជាពលរដ្ឋ ហើយការលើកកម្ពស់សេចក្តីថ្លៃថ្នូរនៃស្ថាប័នថ្នាក់ជាតិមួយនេះក៏បានមកដោយសារស្រ្តីពីព្រោះភាពទន់ភ្លន់ម៉ឺងម៉ាត់ និងការទទួលខុសត្រូវរបស់ស្រ្តី គឺគ្រប់ការិយាល័យទាំងអស់តែងតែមានការប្រាស្រ័យទាក់ទងល្អជាមួយប្រជាពលរដ្ឋក៏ដូចជាសាមគ្គីភាពផ្ទៃក្នុងល្អប្រសើរ និងមិនមានវិវាទផ្ទៃក្នុងការងារនោះឡើយ។ ឯកឧត្តមឧបនាយករដ្ឋមន្រ្តី ជា សុផារ៉ា បានថ្លែងអំណរគុណដល់ថ្នាក់ដឹកនាំ និងមន្រ្តីរាជការជាស្រ្តីនៅក្នុងក្រសួងរៀបចំដែនដី នគរូបនីយកម្ម និងសំណង់ ដែលបានរួមចំណែកធំធេងបំពេញតួនាទីភារកិច្ចរបស់ខ្លួនមិនខ្លាចនឿយហត់ ដើម្បីសម្រេចតាមផែនការ ដែលក្រសួងបានដាក់ជូន និងរួមចំណែកក្នុងការអភិវឌ្ឍស្ថាប័ននេះ ឱ្យក្លាយជាស្ថាប័នមួយមានប្រសិទ្ធភាពក្នុងការអនុវត្តនូវគោលនយោបាយរបស់រាជរដ្ឋាភិបាល៕