ឯកឧត្ដមឧបនាយករដ្ឋមន្ត្រី ជា សុផារ៉ា អញ្ជើញសម្ពោធបើកដំណើរការជាផ្លូវការនូវគម្រោងឆ្នេរសមុទ្រគំរូរបស់រីសតថ្ងៃបាំងឆ័ត្រ ស្ថិតនៅក្នុងក្រុងកែប ខេត្តកែប

March 24, 2023

នារសៀលថ្ងៃ សុក្រ ៣កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែមីនា ឆ្នាំ២០២៣ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា បានអញ្ជើញសម្ពោធបើកដំណើរការជាផ្លូវការនូវគម្រោងឆ្នេរសមុទ្រគំរូរបស់រីសតថ្ងៃបាំងឆ័ត្រ ដែលមានទីតាំងស្ថិតនៅក្នុងក្រុងកែប ខេត្តកែប។

លោក មូន ចូសេហ្វ ម្ចាស់រមណីយដ្ឋានថ្ងៃបាំងឆ័ត្រ បានថ្លែងអំណរគុណយ៉ាងជ្រាលជ្រៅដល់ ឯកឧត្តមឧបនាយករដ្ឋមន្រ្តី ជា សុផារ៉ា ថ្នាក់ដឹកនាំជាន់ខ្ពស់នៃគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាព្រមទាំង ឯកឧត្តមអភិបាលនៃគណៈអភិបាលខេត្តកែប និងមន្រ្តីពាក់ព័ន្ធទាំងអស់នៅថ្នាក់ជាតិនិងថ្នាក់ខេត្ត ដែលបានផ្តល់ការណែនាំការលើកទឹកចិត្ត និងគាំទ្រវយ៉ាងពេញទំហឹងចំពោះគម្រោងគំរូនៅឆ្នេរសមុទ្រសម្រាប់ខេត្តកែប គឺនៅក្នុងទីតាំងកំសាន្តថ្មី១ របស់លោកនៅប្របមាត់ឆ្នេរ ដែលមានឈ្មោះថាកែបវេស។

តាម ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប បានឱ្យដឹងថា គម្រោងអភិវឌ្ឍរមណីយដ្ឋានឆ្នេរខ្សាច់កម្រាន្តសាធារណៈកម្រិតខ្ពស់នេះ ស្ថិតនៅក្នុងភូមិថ្មី សង្កាត់ព្រៃធំ ក្រុងកែប ខេត្តកែប ដែលមានបណ្តោយប្រវែង ២ ៧០០ម៉ែត្រ និងទទឹង ១៣០ម៉ែត្រ ដោយក្នុងនោះបែងចែកជា ៦ ផ្នែក ដូចជា ១.ចំណែកដីសម្រាប់កាត់ជូនឯកជនមានទទឹង ៥០ម៉ែត្រ បណ្តោយ ២ ៧០០ម៉ែត្រ និងចាក់ដីបន្ថែមស្របតាមគំនូសប្លង់មេ ដែលមានក្នុងអនុក្រឹត្យលេខ ២៥៧ អនក្រ.បក ចុះថ្ងៃទី ៨ ខែធ្នូ ឆ្នាំ២០២២ របស់រាជរដ្ឋាភិបាល ២.សួនច្បារសាធារណៈមានទទឹង ៥០ ម៉ែត្រ បណ្តោយ ២ ៧០០ម៉ែត្រ ៣.ឆ្នេរខ្សាច់កម្សាន្តសាធារណៈទទឹង ៣០ម៉ែត្រ បណ្តោយ ២ ៧០០ ម៉ែត្រ ៤.ការងារចាក់ដីពង្រីករង្វង់មូល ២កន្លែង ៥.ការងារសាងសង់វិថី និងអនុវិថីចំនួន ៥ខ្សែ និង ៦.ការងារបន្ថែមផ្សេងៗ ដែលគិតមកដល់ថ្ងៃទី ១៧ ខែមីនា ឆ្នាំ២០២៣ គម្រោងនេះសម្រេចបានលទ្ធផលយ៉ាងល្អប្រសើរជាច្រើន។

ក្នុងឱកាសនោះ ឯកឧត្តមឧបនាយករដ្ឋមន្រ្តី ជា សុផារ៉ា បានបញ្ជាក់ថា រាជរដ្ឋាភិបាលបានអនុញ្ញាតឱ្យគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា អនុវត្តគម្រោងអភិវឌ្ឍរមណីយដ្ឋានឆ្នេរខ្សាច់កម្រាន្តសាធារណៈកម្រិតខ្ពស់ ដែលមានប្រវែង ២ ៧០០ម៉ែត្រ ដោយមានរៀបចំសួនច្បារសាធារណៈ ឆ្នេរខ្សាច់កម្រាន្តសាធារណៈ ស្ថាបនាវិថី និងអនុវិថីចូលឆ្នេរសមុទ្រជាដើម។ ឯកឧត្តមឧបនាយករដ្ឋមន្រ្តី បានបន្ថែមថា គម្រោងឆ្នេរសមុទ្រគំរូរបស់រីសតថ្ងៃបាំងឆ័ត្រ ដែលនឹងត្រូវសម្ពោធដាក់ឱ្យដំណើរការនាពេលនេះក៏ជាផ្នែកមួយ នៃការអនុវត្តគម្រោងអភិវឌ្ឍរមណីយដ្ឋានឆ្នេរខ្សាច់កំសាន្តខាងលើនេះដែរ។ គម្រោងឆ្នេរសមុទ្រគំរូរបស់រីសតថ្ងៃបាំងឆ័ត្រ នេះ នឹងរួមចំណែកយ៉ាងសំខាន់ក្នុងការលើកកម្ពស់សោភ័ណភាពតំបន់ឆ្នេរ និងបង្កើតនូវសេវាកម្មទេសចរណ៍ថ្មីៗ សាកសមជាទីកន្លែងសម្រាកលំហែរកាយ ជាមួយនឹងការគយគន់ទេសភាពសមុទ្រ និងខ្យល់អាកាសបរិសុទ្ធ។ ឯកឧត្តមឧបនាយករដ្ឋមន្រ្តី បានផ្តល់ការគាំទ្រចំពោះការបំពាក់ប្រព័ន្ធចម្រោះទឹកកខ្វក់នៅក្នុងគម្រោងនេះ ដែលនឹងរក្សាបាននូវបរិស្ថានល្អមិនប៉ះពាល់ដល់សោភណ្ឌភាពឆ្នេរ និងសុខភាពរបស់ប្រជាពលរដ្ឋចេញចូលកម្សាន្ត និងជាគំរូសម្រាប់ការអនុវត្តនៅតាមបណ្តាទីតាំងគម្រោងផ្សេងទៀត។ ឯកឧត្តមឧបនាយករដ្ឋមន្រ្តី បានកោតសរសើរ និងវាយតម្លៃខ្ពស់ចំពោះក្រុមហ៊ុនថ្ងៃបាំងឆ័ត្រ ដែលជាប្រតិបត្តិករ និងជាវិនិយោគិនបរទេសមួយមានស្នាដៃ និងគុណភាពល្អប្រកបដោយសក្តានុពល ក្នុងការជំរុញ និងទាក់ទាញទេសចរនៅខេត្តកែប និងបានបង្ហាញនូវការបន្តជឿជាក់លើសន្តិភាព និងសក្តានុពលសេដ្ឋកិច្ចនៅកម្ពុជា។ ឯកឧត្តមឧបនាយករដ្ឋមន្រ្តី ជឿជាក់ថាគម្រោងនេះនឹងដំណើរការដោយរលូនមានការគាំទ្រពីមហាជន និងភ្ញៀវទេសចរគ្រប់មជ្ឈដ្ឋាន។ ជាមួយនេះ ឯកឧត្តមឧបនាយករដ្ឋមន្រ្តី ជា សុផារ៉ា ក៏បានអំពាវនាវ និងលើកទឹកចិត្តដល់ធុរជន និងក្រុមហ៊ុនដទៃទៀតឱ្យចូលរួមជាមួយរាជរដ្ឋាភិបាលក្នុងការវិនិយោគក្នុងវិស័យទេសចរណ៍ ហើយក្រសួងរៀបចំដែនដី នគរូបនីយកម្ម និងសំណង់ នឹងផ្តល់កិច្ចសហការជាប់ជាប្រចាំ ដើម្បីជួយសម្រួលសំណើរ និងសំណូមពររបស់អ្នកវិនិយោគ ក្នុងសមត្ថកិច្ចរបស់ខ្លួនផងដែរ៕