ឯកឧត្ដមឧបនាយករដ្ឋមន្ត្រី ជា សុផារ៉ា អនុញ្ញាតឱ្យប្រធានទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ប្រចាំនៅកម្ពុជា ចូលជួបសម្តែងការគួរសម និងជម្រាបលា

March 27, 2023

នារសៀលថ្ងៃចន្ទ ៦កើត ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី ២៧ ខែមីនា ឆ្នាំ២០២៣ នៅទីស្តីការក្រសួង ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឱ្យ លោកស្រី KAMEI Haroku ប្រធានទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ប្រចាំនៅកម្ពុជា ចូលជួបសម្តែងការគួរសម និងជម្រាបលា ក្នុងពេលដែលលោកស្រីនឹងបញ្ចប់បេសកកម្មនាពេលឆាប់ៗខាងមុខ នៅព្រះរាជាណាចក្រកម្ពុជា។

ក្នុងជំនួបនេះ ឯកឧត្តមឧបនាយករដ្ឋមន្រ្តី ជា សុផារ៉ា បានបង្ហាញពីក្តីសោមនស្សរីករាយដែលបានជួបជាមួយ លោកស្រី Kamei Haroku ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA ប្រចាំនៅកម្ពុជា ដែលចាត់ទុកថានេះ ជាបេសកកម្មមួយបន្តនូវជោគជ័យ ដែលយើងធ្លាប់បានទទួលជោគជ័យក្រោមការគាំទ្រពីស្ថានទូតជប៉ុន Jica និងរដ្ឋាភិបាលជប៉ុន។ រាល់គម្រោងទាំងអស់ ទាំងថ្នាក់ជាតិនិងថ្នាក់ក្រោមជាតិ ដែលទទួលបានការគាំទ្រពីរដ្ឋាភិបាល និងប្រជាជនជប៉ុនសុទ្ធតែទទួលបានជោគជ័យទៅលើគ្រប់ការដ្ឋានក្នុងគម្រោងទាំងអស់។ រាល់គម្រោងទាំងអស់ចាត់ទុកថាជាគម្រោងមានលក្ខណៈនិរន្តរភាពបម្រើឱ្យផលប្រយោជន៍ផ្ទាល់ជាមួយប្រជាពលរដ្ឋ ក្នុងការលើកកម្ពស់ជីវភាពរបស់ប្រជាពលរដ្ឋជារួមដូចជាបញ្ហាហេដ្ឋារចនាសម្ព័ន្ធ ធនធានមនុស្ស បញ្ហាបណ្តុះបណ្តាលនិងការសហការគ្នា គឺចាត់ទុកថាជាគម្រោងដែលមានលក្ខណៈនិរន្តរភាពយូរអង្វែង ហើយរាល់គម្រោងទាំងអស់ គឺមានគុណភាពដោយមិនមែនសម្ពោធរួចជួសជុលតាមក្រោយនោះទេ។ ឯកឧត្តមឧបនាយករដ្ឋមន្រ្តី ជា សុផារ៉ា បញ្ជាក់ថាយើងទទួលបានជោគជ័យលើច្បាប់សំណង់រួចហើយ គឺបានធ្វើឱ្យវិស័យសំណង់មានសណ្តាប់ធ្នាប់របៀបរៀបរយ និងសុវត្ថិភាពយូរអង្វែង។ ឯកឧត្តមឧបនាយកលើកឡើងថាមុនពេលមានច្បាប់សំណង់នេះ គឺម្ចាស់សំណង់និងអ្នកវិនិយោគគឺសាងសង់តាមតែចិត្ត ប៉ុន្តែក្រោយពេលមានច្បាប់សំណង់ គឺបានធ្វើឱ្យពួកគាត់ចាប់អារម្មណ៍មកសុំច្បាប់អនុញ្ញាត ហើយស្ថាបត្យករ វិស្វករ បានចាប់អារម្មណ៍មកចុះឈ្មោះ និងទទួលយកការបណ្តុះបណ្តាលដែលនេះបង្ហាញឱ្យឃើញពីការរីកចម្រើនមួយផ្នែក។ ដោយឡែកបញ្ហាចុះបញ្ជីដីធ្លីនៅពេល ដែលយើងទទួលបានការគាំទ្រនោះយើងមានភាពជាក់លាក់ និងមានជំនឿជឿជាក់លើបញ្ហានេះ ដោយបច្ចុប្បន្នយើងបានដំណើរការចុះបញ្ជីដីធ្លីបាន ៩៧,២% លើ ៧ លានក្បាលដី នៅទូទាំងប្រទេសដែលអាចផ្តល់សុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋបានយូរអង្វែង និងផ្តល់ទំនុកទុកចិត្តដល់អ្នកវិនិយោគ ដែលនេះចាត់ទុកថាជាការធានាបាននូវនិរន្តរភាពពិតប្រាកដក្នុងការអភិវឌ្ឍក្រោមជំនួយរបស់ជប៉ុន។ ឯកឧត្តមឧបនាយករដ្ឋមន្រ្តី ក៏បានរំលឹកអំពីការជួយរបស់ជប៉ុនលើគម្រោងទឹកស្អាតកាលពីពេល ដែលឯកឧត្តមនៅជាអភិបាលរាជធានីភ្នំពេញ ផងដែរ។ ឯកឧត្តមឧបនាយករដ្ឋមន្រ្តី បានជូនពរឱ្យបេសកកម្ម និងការស្នាក់អាស្រ័យរបស់លោកស្រី Kamei Haroku ក្នុងព្រះរាជាណាចក្រកម្ពុជា បានទទួលជោគជ័យ ហើយក្រសួងរៀបចំដែនដី នគរូបនីយកម្ម និងសំណង់ និងសហការី នឹងផ្តល់ការស្វាគមន៍ចំពោះលោកស្រី ចំពោះការសហការគ្នាដ៏ល្អប្រសើរតទៅមុខទៀត ដើម្បីផលប្រយោជន៍នៃប្រជាជនប្រទេសទាំងពីរ និងទំនាក់ទំនងល្អប្រសើររវាងកម្ពុជា និងជប៉ុន។

ជាការឆ្លើយតប លោកស្រី Kamei Haroku ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនJICA ប្រចាំនៅកម្ពុជា បានថ្លែងអំណរគុណដល់ ឯកឧត្តមឧបនាយករដ្ឋមន្រ្តី ដែលបានរំលឹកអំពីការជួយរបស់ជប៉ុនលើគម្រោងទឹកស្អាតកាលពីពេល ដែលឯកឧត្តមនៅជាអភិបាលរាជធានីភ្នំពេញ និងបច្ចុប្បន្ន ឯកឧត្តមតែងតែបានផ្តល់ការអនុញ្ញាតឱ្យមន្រ្តីក្រោមឱវាទទៅទទួលការបណ្តុះបណ្តាលនៅប្រទេសជប៉ុន ជាក់ស្ដែងនៅពេលនេះ ក្នុងវិស័យសំណង់យើងទទួលបានមន្រ្តី ៤៤ រូប ទៅទទួលការបណ្តុះបណ្តាលនៅទីក្រុងតូក្យូប្រកបដោយភាពជោគជ័យ។ លោកស្រីបានបង្ហាញពីការចូលរួមអបអរសាទរចំពោះលទ្ធផលល្អប្រសើរជាច្រើនក្រោយពេលមានច្បាប់សំណង់រួចមក។ លោកស្រីបញ្ជាក់ថា ដោយភ្ជាប់ជាមួយគម្រោងដែលសម្រេចបានកន្លងមកបច្ចុប្បន្ន JICA កំពុងតែបន្តអនុវត្តគម្រោងថ្មី គឺគម្រោងកសាង និងអភិវឌ្ឍជាអចិន្រ្តៃយ៍នៅទូទាំងព្រះរាជាណាចក្រកម្ពុជា ដែលការងារនេះកំពុងតែដំណើរការ។ ភាគីជប៉ុនស្នើសុំកិច្ចសហការពីក្រសួងរៀបចំដែនដី នគរូបនីយកម្ម និងសំណង់ និងព្យាយាមប្រឹងប្រែងឱ្យអស់ពីសមត្ថភាព ដើម្បីបញ្ចប់គម្រោងតាមការគ្រោងទុក។ លោកស្រីបានជម្រាបលា ឯកឧត្តមឧបនាយករដ្ឋមន្រ្តី ក្នុងឱកាសដែលលោកស្រីនឹងបញ្ចប់បេសកកម្មនៅកម្ពុជា និងធ្វើមាតុភូមិនិវត្តន៍នៅថ្ងៃសុក្រ សប្តាហ៍នេះ និងស្នើសុំដល់ ឯកឧត្តមឧបនាយករដ្ឋមន្រ្តី បន្តកិច្ចសហការជាមួយសហការីរបស់លោកស្រី ដែលនឹងមកបន្តបេសកកម្ម នាដើមខែមេសាខាងមុខនេះ។

បន្ទាប់ពីជំនួបសវនាការនេះរួចមក ឯកឧត្តមឧបនាយករដ្ឋមន្រ្តី ជា សុផារ៉ា និងលោកស្រី Kamei Harokuព្រមទាំងសហការី បានអញ្ជើញចុះពិនិត្យស្ថានីយវាស់វែងអចិន្រ្តៃយ៍ដោយផ្កាយរណប (CORS ) និងពិនិត្យមើលមន្ទីរពិសោធន៍ជាតិសំណង់ផងដែរ៕