តាមរបាយការណ៍របស់ក្រុមហ៊ុន សុខា អូតែល បានឱ្យដឹងថា ក្រុមហ៊ុន សុខា អូតែល បានទទួលការអនុញ្ញាតពីរាជរដ្ឋាភិបាលកម្ពុជា ដោយវិនិយោគ និងអភិវឌ្ឍនូវឧទ្យានជាតិព្រះមុន្នីវង្សបូកគោ ដែលមានផ្ទៃដីវិនិយោគលាតសន្ធឹងលើខ្នងភ្នំបូកគោ ចាប់តាំងពីភាគខាងត្បូងរហូតដល់ភាគខាងជើង។ កន្លងមកក្រុមហ៊ុនបានចាប់ផ្តើមអភិវឌ្ឍពីតំបន់ភាគខាងត្បូង ដោយបានសាងសង់ និងស្តារឡើងវិញនូវផ្លូវលេខ ៣២ ពីចំណុចផ្លូវបំបែកផ្លូវជាតិលេខ ៣ ឆ្ពោះឡើងទៅលើភ្នំបូកគោ ដែលមានប្រវែង ៣៣គីឡូម៉ែត្រ ដែលនេះជាផ្លូវមេតែមួយគត់សម្រាប់ធ្វើចរាចរណ៍ឡើងចុះ។ ដោយសារតែតំបន់វិនិយោគ និងអភិវឌ្ឍនេះមានទំហំធំធេងហើយមានផ្លូវឡើងចុះតែមួយខ្សែនោះទើបរាជរដ្ឋាភិបាលតាមរយៈលិខិតលេខ ៩៦ សជណ.ដប ចុះថ្ងៃទី៩ ខែកុម្ភៈ ឆ្នាំ២០២២ របស់ទីស្តីការគណៈរដ្ឋមន្រ្តី បានសម្រេចឱ្យបើកផ្លូវថ្មីចំនួន ១ខ្សែ ទៀត ដើម្បីតភ្ជាប់ពីផ្លូវជាតិលេខ ៤ ឆ្ពោះទៅលើភ្នំបូកគោ កាត់តាមដីសម្បទានសេដ្ឋកិច្ចចម្ការដូងប្រេងរបស់ក្រុមហ៊ុន ម៉ុង ឫទ្ធី គ្រុប ដោយការចំណាយជាបន្ទុករបស់ក្រុមហ៊ុន សុខា អូតែល។ ជាមួយនោះក៏បានអនុញ្ញាតជូនក្រុមហ៊ុនដើម្បីស្ថាបនាផ្លូវមេក្នុងតំបន់ភ្នំនេះប្រវែង ១២០ គីឡូម៉ែត្រ ទៀតដើម្បីចម្រើដល់ការធ្វើចរាចរណ៍ និងការដឹកជញ្ជូនក្នុងតំបន់។ ការអភិវឌ្ឍនៅភ្នំបូកគោ គឺជាគម្រោងវិនិយោគរយៈពេលវែង ដែលត្រូវអនុវត្តជាជំហានៗតាមដំណាក់កាលនៃការអភិវឌ្ឍរីកចម្រើនសេដ្ឋកិច្ចជាតិ និងស្របតាមតម្រូវការទីផ្សារ ដូច្នេះការស្ថាបនាហេដ្ឋារចនាសម្ព័ន្ធផ្លូវនៅក្នុងតំបន់នេះ ក៏ត្រូវធ្វើឡើងជាជំហានៗស្របតាមតម្រូវការជាក់ស្តែងក្នុងដំណាក់កាលនីមួយៗ។ ចំពោះការស្ថាបនាផ្លូវថ្មី ១ខ្សែ ដែលយើងកំពុងពិនិត្យវឌ្ឍនភាពនាពេលនេះ គឺជាផ្លូវមេ ដែលត្រូវស្ថាបនាតភ្ជាប់ពីផ្លូវជាតិលេខ ៤ ត្រង់ចំណុចគីឡូម៉ែត្រលេខ ១៥៨+២៩១ ក្នុងឃុំកំពង់សីលា ស្រុកព្រៃនប់ ខេត្តព្រះសីហនុ ឆ្ពោះទៅលើខ្នងភ្នំបូកគោ ភ្ជាប់ជាមួយនឹងកំណាត់ផ្លូវវាលស្រែ ៥០០ ដែលមានប្រវែងប្រមាណ ៦១គីឡូម៉ែត្រ ។ តាមគម្រោងប្លង់ដែលបានធ្វើការសិក្សា ដោយក្រសួងសាធារណការនិងដឹកជញ្ជូន ផ្លូវនេះមានទទឹងសរុប ២០ម៉ែត្រ ចែកចេញជាផ្លូវរថយន្តមានទទឹង ៣,៥ម៉ែត្រ ចំនួន ២គន្លងនិងផ្លូវម៉ូតូ ទទឹង ៣ម៉ែត្រ សងខាងចំនួន ២គន្លង និងចិញ្ចើមផ្លូវ ទទឹង ៣,៥ម៉ែត្រ សងខាង ដែលស្ថាបនាជាផ្លូវកៅស៊ូ AC ប៉ុន្តែផ្អែកតាមស្ថានភាពដីបត់បែនចុះឡើងនៅលើតំបន់ភ្នំនេះ ដែលមានភាពរអិលផងនោះនិងដើម្បីធានានូវភាពរឹងមាំយូរអង្វែងផង ក្រុមហ៊ុននឹងមានគម្រោងចាក់បន្ថែមនូវកម្រាលបេតុងកម្រាស់ ២០០មីលីម៉ែត្រ និងអ៊ុតកៅស៊ូពីលើ។ ផ្លូវនេះត្រូវបានចាប់ផ្តើមរៀបចំស្ថាបនាឡើងបន្ទាប់ពីទទួលបានការសម្រេចរបស់រាជរដ្ឋាភិបាលក្នុង ខែកុម្ភៈ ឆ្នាំ ២០២២ កន្លងទៅ ដោយមានក្រុមហ៊ុន សុខា រៀលអ៊ីសស្តេតជាអ្នកទទួលស្ថាបនា។ មកទល់ពេលនេះ ក្រុមហ៊ុនបានធ្វើការវាស់ស្ទង់ឈូសឆាយសម្អាតចេញជាគន្លងតួផ្លូវហើយបានតភ្ជាប់ទាំងស្រុងពីផ្លូវជាតិលេខ ៤ រហូតដល់កំណាត់ផ្លូវវាលស្រែ ៥០០ នៅលើខ្នងភ្នំបូកគោ ដែលឥឡូវនេះ យើងអាចធ្វើចរាចរណ៍បានជាបណ្តោះអាសន្ន ដោយរថយន្តប្រភេទខ្ពស់ និងម៉ូតូ។ ក្នុងការស្ថាបនាផ្លូវនេះ មានការលំបាក និងជួបនូវបញ្ហាប្រឈមជាច្រើនខុសពីការស្ថាបនាផ្លូវនៅលើដីរាប ដែលស្ថានភាពដីភ្នំនៅទីនេះ មាននីវ៉ូទាបខ្ពស់ខុសគ្នា ជាច្រើន មានជ្រោះជ្រៅ ជ្រលងភ្នំធំៗ និងផ្ទាំងថ្មធំៗជាច្រើនកន្លែង ដែលត្រូវកាប់បន្ទាប និងចាក់បំពេញតម្រូវតាមបទដ្ឋានបច្ចេកទេស នៃការសាងសង់។ រីឯអាកាសធាតុវិញ មានភ្លៀងធ្លាក់ជាច្រើនខែក្នុង ១ឆ្នាំ ដែលធ្វើឱ្យរយៈពេលនៃការធ្វើការងារមិនបានពេញលេញ។ កត្តាទាំងនេះបានធ្វើឱ្យមានការចំណាយខ្ពស់ក្នុងការសាងសង់។ ជារួមមកដល់ពេលនេះ ការស្ថាបនា គឺសម្រេចបានប្រមាណ ៣០% ហើយនឹងត្រូវធ្វើបន្តជាជំហានៗទៀត ទៅតាមស្ថានភាពសេដ្ឋកិច្ច និងការអភិវឌ្ឍទីផ្សារបច្ចុប្បន្ន។ ស្របតាមការណែនាំរបស់ ឯកឧត្តមឧបនាយករដ្ឋមន្រ្តី ជា សុផារ៉ា គឺធ្វើយ៉ាងណាឱ្យកំណាត់ផ្លូវនេះបានតភ្ជាប់ និងអាចធ្វើចរាចរណ៍បានសិន ក្រុមហ៊ុននឹងបន្តការខិតខំប្រឹងប្រែង ដើម្បីសម្រេចការស្ថាបនាផ្លូវនេះជាជំហានៗទៀត នាពេលអនាគត ជាផ្លូវចាក់កៅស៊ូ AC ស្របតាមគម្រោងប្លង់ដែលបានធ្វើការសិក្សាដោយក្រសួងសាធារណការ និងដឹកជញ្ជូន។
ក្នុងឱកាសនោះ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា កាលពីចុងខែមករា ឆ្នាំ២០២២ ក្រោមការដឹកនាំចង្អុលបង្ហាញរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលនៅពេលនោះ មានអ្នកឧកញ្ញ៉ា សុខ គង់ ក៏ដូចជាអភិបាលនៃគណៈអភិបាលខេត្តព្រះសីហនុ បានទទួលការដឹកនាំចង្អុលបង្ហាញពីសម្តេចតេជោ ដើម្បីរៀបចំបើកផ្លូវ ១ខ្សែ ពីកំពូលភ្នំបូកគោទៅកាន់ផ្លូវជាតិលេខ ៤ ត្រង់ចំណុចគីឡូម៉ែត្រលេខ១៥៨+២៩១ ដែលផ្លូវនេះពិតជាបានតភ្ជាប់ពីកំពូលភ្នំបូកគោជាកំពូលភ្នំដ៏ខ្ពស់មានកម្ពស់ដល់ទៅ ១ ០៧៥ ម៉ែត្រ ផ្លូវនេះបានតភ្ជាប់គ្នាជាស្ថាពរ។ ឯកឧត្តមឧបនាយករដ្ឋមន្រ្តី បានសាទរ និងកោតសរសើរចំពោះការខិតខំប្រឹងប្រែងក្នុងការបំពេញភារកិច្ច ដ៏លំបាកនេះ ដោយពេលនេះយើងបានឈូសឆាយតភ្ជាប់រួចរាល់ជាស្ថាពរបើទោះបីផ្លូវនេះមិនទាន់មានសភាពរាបស្មើយ៉ាងណាក្តី ប៉ុន្តែក៏អាចឱ្យរថយន្តប្រភេទខ្ពស់ធ្វើចរាចរណ៍បានយឺតៗផងដែរ។ ឯកឧត្តមឧបនាយករដ្ឋមន្រ្តី ជា សុផារ៉ា បានបញ្ជាក់ថាគម្រោងការនេះពិតជាបានផ្តល់នូវសក្តានុពលខ្ពស់ជាពិសេសចំពោះប្រជាពលរដ្ឋ ដែលបានទិញលំនៅឋាន និងដីឡូត៍នៅក្នុងតំបន់នេះ។ ឯកឧត្តមឧបនាយករដ្ឋមន្ត្រី ជា សុផារ៉ា បានស្នើឱ្យអាជ្ញាធរគ្រប់លំដាប់ថ្នាក់ និងស្ថាប័នថ្នាក់ជាតិជួយលើកទឹកចិត្តតាមបច្ចេកទេស ឆន្ទៈ និងជំនាញរបស់ស្ថាប័នក្នុងការជួយគាំទ្រ ដើម្បីឱ្យផ្លូវនេះក្លាយទៅជាផ្លូវមានលក្ខណៈប្រវត្តិសាស្រ្តមួយសម្រាប់បម្រើឱ្យការអភិវឌ្ឍនៅភ្នំបូកគោនេះ៕
សារស្វាគមន៍
ឯកឧត្តម ជា សុផារ៉ា
ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
សេវាសាធារណៈ
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ចំនួនអ្នកទស្សនា
ថ្ងៃនេះ :
013092
ម្សិលមិញ :
036309
សរុប :
20404139
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលនទ្រព្យនៅកម្ពុជា