ឯកឧត្តមឧបនាយករដ្ឋមន្រ្តី ជា សុផារ៉ា អនុញ្ញាតអឱ្យប្រធានថ្មីតំណាង JICA ចូលជួបសម្ដែងការគួរសមក្នុងឱកាសចាប់ផ្តើមបំពេញបេសកកម្មការងារនៅប្រទេសកម្ពុជា

May 15, 2023

នាព្រឹកចន្ទ ១១រោច ខែពិសាខ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៥ ខែឧសភា ឆ្នាំ២០២៣ ឯកឧត្តមឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឱ្យលោក SANUI Kazumana ប្រធានថ្មីតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA ចូលជួបសម្ដែងការគួរសម និងជម្រាបសួរនៅទីស្តីការក្រសួង ក្នុងឱកាសដែលលោកចាប់ផ្តើមបំពេញបេសកកម្មការងារនៅព្រះរាជាណាចក្រកម្ពុជា។ ក្នុងជំនួបនេះ ឯកឧត្តមឧបនាយករដ្ឋមន្រ្តី ជា សុផារ៉ា បានមានប្រសាសន៍ស្វាគមន៍ចំពោះវត្តមាន លោក SANUI Kazumana ប្រធានថ្មីតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA ដែលបានចាប់ផ្តើមបំពេញបេសកកម្មការងារនៅក្នុងប្រទេសកម្ពុជា ហើយក៏ចាត់ទុកថានេះជាឱកាសពិសេសមួយ ដែលធ្វើឡើងស្របពេលដែលកម្ពុជាកំពុងធ្វើជាម្ចាស់ផ្ទះនៃព្រឹត្តិការណ៍ប្រកួតកីឡាស៊ីហ្គេមលើកទី ៣២ ដែលកម្ពុជារង់ចាំអស់រយៈពេល ៦៤ ឆ្នាំមកហើយ ដោយរក្សាបានសុវត្ថិភាពយ៉ាងល្អប្រសើរក្នុងការរៀបចំព្រឹត្តិការណ៍នេះ។ ឯកឧត្តមឧបនាយករដ្ឋមន្រ្តី បានលើកឡើងថា កាលពីអតីតកាលមុនពេលមានសង្រ្គាម កីឡាករកម្ពុជាក៏ធ្លាប់ជាកីឡាករ ដែលមានភាពល្បីល្បាញ ប៉ុន្តែជាអកុសលនៅពេលមានសង្រ្គាម គឺវិស័យកីឡាបានធ្លាក់ចុះដល់សូន្យ ប្រជាពលរដ្ឋស្គាល់តែភាពអត់ឃ្លាន និងការភ័យខ្លាច ប៉ុន្តែមកទល់បច្ចុប្បន្ននេះ ដោយសារមានការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន បានធ្វើឱ្យប្រទេសជាតិមានសុខសន្តិភាពពេញបរិបូរណ៍ និងមានការអភិវឌ្ឍសេដ្ឋកិច្ចសង្គម ហើយជីវភាពប្រជាពលរដ្ឋក៏ត្រូវបានលើកលម្ពស់ជាបន្តបន្ទាប់ និងបានលើកស្ទួយប្រទេសជាតិឱ្យស្មើមុខស្មើមាត់ជាមួយសហគមន៍អន្តរជាតិ។ ឯកឧត្តមឧបនាយករដ្ឋមន្រ្តី បានឱ្យដឹងថា ក្នុងរបត់ប្រជាធិបតេយ្យនេះ គឺយើងបានចូលរួមនិងរៀបចំការបោះឆ្នោតជាសកល និងអសកលបាន ១១លើក ហើយ ដែលនេះបង្ហាញឱ្យឃើញពីការអភិវឌ្ឍសេដ្ឋកិច្ចសង្គម ដើម្បីជាប្រយោជន៍ក្នុងការរក្សាស្ថានភាពរឹងមាំខាងនយោបាយ ហើយជឿជាក់ថា តទៅមុខប្រជាពលរដ្ឋ ដែលកំពុងតែមានការគាំទ្រចំពោះការរីកចម្រើននេះនឹងគាំទ្រចំពោះរាជរដ្ឋាភិបាលដឹកនាំដោយ សម្ដេចអគ្គមហាសេនាបតីតេជោ ហ៊ុន សែន ជាបន្តទៀត។ ជាមួយនេះយើងបានបើកគោលនយោបាយទំនាក់ទំនងក្រៅប្រទេសដោយឈរលើគោលការណ៍ខិតខំប្រឹងប្រែងខ្លួនឯង និងស្វាគមន៍ចំពោះការគាំទ្រពីបរទេសក្នុងនោះក៏មានវត្តមានប្រទេសជប៉ុន ដែលបានជួយគាំទ្រមួយផ្នែកធំក្នុងប្រទេសកម្ពុជាលើផ្នែកហេដ្ឋារចនាសម្ព័ន្ធផងដែរ ហើយជំនួយដែលប្រជាជន និងរដ្ឋាភិបាលជប៉ុនបានផ្តល់មកព្រះរាជាណាចក្រកម្ពុជា គឺប្រកបដោយប្រសិទ្ធភាពនិងផ្លែផ្កា។ ឯកឧត្តមឧបនាយករដ្ឋមន្រ្តី បន្តថា ការងារធំៗដូចជាហេដ្ឋារចនាសម្ព័ន្ធ ការរំដោះផ្ទៃដីឱ្យមានសុវត្ថិភាពតាមរយៈការដោះមីន ការរៀបចំការស្តារគាំទ្រលើវិស័យវប្បធម៌ និងការដាក់បញ្ចូលប្រាសាទអង្គរវត្តជាសម្បត្តិបេតិកភណ្ឌពិភពលោកក៏មានការគាំទ្រពីជប៉ុនផងដែរ ជាមួយនេះជប៉ុនក៏បានជួយសាងសង់ស្ពានធំៗចំនួន ២ គឺស្ពានស្សឹបាស្សា និងស្ពានគីហ្សូណា ថែមទៀតផង។ រីឯវិស័យទឹកស្អាត ជប៉ុនបានជួយសម្រាប់ឱ្យមានការលើកកម្ពស់ជីវភាពប្រជាពលរដ្ឋទាំងនៅរាជធានីភ្នំពេញ និងតាមបណ្តាខេត្ត ព្រមទាំងការស្តារហេដ្ឋារចនាសម្ព័ន្ធក្រោមដីក៏ជប៉ុន បានជួយផងដែរ។ ឯកឧត្តមឧបនាយករដ្ឋមន្រ្តី ជា សុផារ៉ា បានសាទរចំពោះការគាំទ្ររបស់ក្រសួងហេដ្ឋារចនាសម្ព័ន្ធ ទេសចរណ៍ និងដឹកជញ្ជូន របស់ប្រទេសជប៉ុន ដែលបានផ្តល់កិច្ចសហប្រតិបត្តិការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងការរៀបចំច្បាប់សំណង់ និងកំពុងដំណើរការសុវត្ថិភាពនៃការគ្រប់គ្រងសំណង់។ ដោយឡែកការគ្រប់គ្រងដីធ្លី ក៏ទទួលបានលទ្ធផលប្រកបដោយប្រសិទ្ធភាព ដោយមានការរៀបចំឧបករណ៍សម្ភារៈសម្រាប់រៀបចំគ្រប់គ្រងចុះបញ្ជីទិន្នន័យដីធ្លី ប្រកបដោយសុវត្ថិភាព និងមានភាពជឿជាក់។ ឯកឧត្តមឧបនាយករដ្ឋមន្រ្តី ជា សុផារ៉ា បានបង្ហាញពីការបើកទូលាយចំពោះទំនាក់ទំនងជាឯកជនក្តី និងជាផ្លូវការក្តីចំពោះបំណងប្រាថ្នារបស់ លោក SANUI Kazumana ក្នុងការបំពេញការងារទាំងឡាយ គឺសូមទំនាក់ទំនងមកទីនេះ ដើម្បីបង្ហាញពីការពង្រឹងចំណងមិត្តភាពកិច្ចសហប្រតិបត្តិការរវាងប្រជាជន និងរាជរដ្ឋាភិបាលកម្ពុជាជាមួយជប៉ុនកាន់តែល្អប្រសើរថែមទៀត។ ជាការឆ្លើយតប លោក SANUI Kazumana ប្រធានថ្មីតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA បានថ្លែងអំណរគុណដល់ ឯកឧត្តមឧបនាយករដ្ឋមន្រ្តី ជា សុផារ៉ា ដែលបានឱ្យដឹងពីស្ថានភាព នៃកិច្ចសហប្រតិបត្តិការលើវិស័យនានាកន្លងមករបស់ជប៉ុននៅក្នុងប្រទេសកម្ពុជា ជាពិសេសលើវិស័យកសាងហេដ្ឋារចនាសម្ព័ន្ធស្ពានធំៗចំនួន ២ នៅកម្ពុជា ដើម្បីជួយសម្រួលដល់ការធ្វើដំណើរទៅមករបស់ប្រជាពលរដ្ឋក្នុងការឆ្លងកាត់ទន្លេដែលជួយអភិវឌ្ឍជីវភាពរស់នៅរបស់ប្រជាពលរដ្ឋប្រកបដោយនិរន្តរភាព។លោកបានកត់សំគាល់ថាបច្ចុប្បន្នកម្ពុជាមានការអភិវឌ្ឍរីកចំរើននូវសំណង់អគារខ្ពស់ៗទំនើបៗជាច្រើនខុសប្លែកជាងពីមុន ដូច្នេះលោកមានក្តីរីករាយដែលបានចូលរួមចំណែកជួយអភិវឌ្ឍក្នុងប្រទេសកម្ពុជាបន្តទៀត។លោកបានលើកឡើងនូវពាក្យស្លោករបស់ JICA គឺ: “ដើម្បីកសាងប្រទេសជាតិត្រូវកសាងធនធានមនុស្ស” ដូច្នេះលោកគាំទ្រឱ្យមានការកសាងធនធានមនុស្សឱ្យបានច្រើនថែមទៀតលើវិស័យនានាដើម្បីធានាអោយមានការអភិវឌ្ឍប្រកបដោយនិរន្តរភាព ។ លោកបញ្ជាក់ថា JICA នឹងធ្វើយ៉ាងណាបន្តនូវជំនឿជឿជាក់ និងរឹតចំណងមិត្តភាពកិច្ចសហប្រតិបត្តិការរឹងមាំរវាងកម្ពុជា និងជប៉ុន និងជាមួយពិភពលោក ហើយលោកក៏បានចូលរួមអបអរសាទរជាមួយកម្ពុជា ដែលបាននឹងកំពុងធ្វើជាម្ចាស់ផ្ទះរៀបចំព្រឹត្តិការណ៍ប្រកួតកីឡាស៊ីហ្គេមលើកទី ៣២ ប្រកបដោយជោគជ័យផងដែរ៕