កម្មវិធីសំណេះសំណាលរបស់ ឯកឧត្តមទេសរដ្ឋមន្ត្រី ជា សុផារ៉ា ជាមួយប្រជាពលរដ្ឋ មេឃុំ និងក្រុមប្រឹក្សាឃុំ នៅក្នុងឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ថ្ងៃទី ២០ ខែឧសភា ឆ្នាំ២០១៦

May 20, 2016

នាព្រឹកថ្ងៃទី ២០ ខែឧសភា ឆ្នាំ ២០១៦ បន្ទាប់ពីបញ្ចប់ពិធីរំឭកវិញ្ញាណក្ខន្ធអ្នកដែលបានស្លាប់បាត់បង់ ជីវិតក្នុងរបបដ៏សែនយង់ឃ្នង នៅវត្តអន្លុងពោង ឃុំទន្លេបិទ ខេត្តត្បូងឃ្មុំ ឯកឧត្តមទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារថ្នាក់ជាតិចុះមូលដ្ឋានខេត្តត្បូងឃ្មុំ បានឆ្លៀតឱកាសនេះចុះជួបសំណេះសំណាលសួរសុខទុក្ខប្រជាពលរដ្ឋ មេភូមិ មេឃុំ និងប្រធានក្រុមប្រឹក្សាឃុំ ក្នុងឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ដែលមានអ្នកចូលរួមសរុបប្រមាណ ២០០ នាក់ ។ ឯកឧត្តមទេសរដ្ឋមន្ត្រី បានសម្តែងនូវក្តីសោមនស្សរីករាយ និងបានពាំនាំនូវការនឹករលឹកពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់ប្រជាពលរដ្ឋទាំងអស់ដែលរស់នៅក្នុងឃុំទន្លេបិទ ដែលជានិច្ចកាលសម្តេចទាំងពីរលោកតែងតែគិតគូរពីសុខទុក្ខរបស់ ប្រជាពលរដ្ឋខ្មែរគ្រប់ទីកន្លែង ។ នៅក្នុងការសំណេះសំណាលសួរសុខទុក្ខនេះ ឯកឧត្តមទេសរដ្ឋមន្ត្រី បានធ្វើការក្រើនរលឹកដល់មេឃុំ មេភូមិ អោយចេះស្រឡាញ់ និងគោរពតួនាទីរបស់ខ្លួន ដោយធ្វើការយកចិត្តទុកដាក់ជាពិសេសលើត្រកូលរៀមច្បងដែលជាចាស់ ទុំរស់នៅក្នុងភូមិឃុំរបស់ខ្លួន តាមរយៈការដាក់ផែនការប្រចាំថ្ងៃ ប្រចាំខែរបស់ខ្លួន និងណែនាំដល់មន្ត្រីក្រោមឱវាទក្នុងការចុះជាប់ជាមួយនូវសុខ ទុក្ខរបស់ប្រជាពលរដ្ឋ ដើម្បីផ្តល់នូវអ្វីដែលជាតម្រូវការពិតប្រាកដ និងមានភាពឱនលំទោន អត់ធ្មត់ក្នុងការផ្តល់សេវាសាធារណៈ ជៀសវាងការបង្កភាពស្មុគស្មាញក្រោមរូបភាពណាមួយដល់ប្រជាពលរដ្ឋ ។ ទន្ទឹមនឹងនេះផងដែរ ឯកឧត្តមទេសរដ្ឋមន្ត្រី បានធ្វើការកោតសសើរនូវការខិតខំរបស់ពួកគាត់ទាំងអស់គ្នា និងសូមឲ្យមានការរួបរួម សហការណ៍គ្នាឲ្យកាន់តែខ្លាំងជាងនេះទៅទៀតក្នុងការអនុវត្តឲ្យ សម្រេចបាននូវគោលនយោបាយរបស់រាជរដ្ឋាភិបាល ដើម្បីទទួលបាននូវជ័យជំនះ ការរីកចម្រើន សន្តិភាព និងភាពសុខដុមរបស់សង្គមជាតិ ។ ឯកឧត្តមទេសរដ្ឋមន្ត្រី ក៏បានផ្តាំផ្ញើដល់ប្រជាពលរដ្ឋឲ្យជួយថែរក្សាសន្តិភាព និងស្ថេរភាពដែលកើតមានឡើងពីការខិតខំរបស់សម្តេចអគ្គមហាសេនាបតីជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងចូលរួមថែរក្សានូវសមិទ្ធិផលទាំងឡាយដែលបានកសាងរួច ដែលជាទុនដ៏ចាំបាច់សម្រាប់យុវជនជំនាន់ក្រោយ ។ ជាចុងក្រោយ ឯកឧត្តមទេសរដ្ឋមន្ត្រី ក៏បាននាំយកនូវអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន ដល់អ្នកចូលរួមទាំងអស់ទទួលបានថវិកាចំនួន ២០.០០០រៀល/១នាក់ និងមេឃុំ និងប្រធានក្រុមប្រឹក្សាឃុំ ទទួលបាន ៣០.០០០រៀល/១នាក់ ផងដែរ ។