ឯកឧត្តម ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អនុញ្ញាតឲ្យ លោក Alassane Sow ប្រធានធនាគារពិភពលោកប្រចាំព្រះរាជាណាចក្រកម្ពុជា ចូលជួបសំដែងការគួរសម និងពិភាក្សាការងារ

June 14, 2016

នៅព្រឹកថ្ងៃអង្គារ ដប់កើត ខែជេស្ឋ ឆ្នាំវក ព.ស.ពីរពាន់ប្រាំរយហាសិបប្រាំបួន ត្រូវនឹងថ្ងៃទីដប់បួន ខែមិថុនា គ.ស. ពីរពាន់ដប់ប្រាំមួយ វេលាម៉ោង ១០ នាទីព្រឹក ឯកឧត្តម ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឲ្យ លោក Alassane Sow ប្រធានធនាគារពិភពលោកប្រចាំព្រះរាជាណាចក្រកម្ពុជា ចូលជួបសំដែងការគួរសម និងពិភាក្សាការងារមុននឹងបញ្ចប់បេសកកម្មនៅកម្ពុជា ។ នៅក្នុងជំនួបនេះ ឯកឧត្តមទេសរដ្ឋមន្ត្រី ជា សុផារ៉ា បានសំដែងនូវការថ្លែងអំណរគុណយ៉ាងជ្រាលជ្រៅចំពោះ លោក Alassane Sow ប្រធានធនាគារពិភពលោក និងសហការីទាំងអស់ដែលតែងតែមានកិច្ចសហប្រតិបត្តិការល្អជាមួយរដ្ឋាភិបាលកម្ពុជាពិសេស លោក Alassane Sow ផ្ទាល់ដែលខិតខំបំពេញភារកិច្ច និងមានទំនាក់ទំនងយ៉ាងជិតស្និតជាមួយស្ថាប័នពាក់ព័ន្ធនៃរាជរដ្ឋាភិបាលកម្ពុជាកន្លងមក ។ ជាកិច្ចចាប់ផ្តើម លោក Alassane Sow បានសម្តែងនូវសេចក្តីសោមនស្សរីករាយដែលបានចូលជួបសម្តែងការគួរសមចំពោះ ឯកឧត្តមទេសរដ្ឋមន្ត្រី ជា សុផារ៉ា ជាលើកចុងក្រោយមុននឹងបញ្ជប់បេសកកម្មរបស់លោកក្នុងព្រះរាជាណាចក្រកម្ពុជានៅថ្ងៃទី ១៤ ខែកក្កដា ខាងមុខនេះ និងបានឆ្លៀតឱកាសធ្វើការណែនាំ លោកស្រី Inguna Dobraja ដែលនឹងអញ្ជើញចូលកាន់តំណែងជាផ្លូវការនៅថ្ងៃទី ២០ ខែកក្កដា ឆ្នាំ ២០១៦ នេះ ។ ជាមួយនឹងការទទួលស្វាគមន៍ លោកស្រី Inguna Dobraja ឯកឧត្តមទេសរដ្ឋមន្ត្រី បានមានសម្តែងនូវសេចក្តីសោមន្សរីករាយជឿជាក់ថាកិច្ចសហប្រតិបត្តិការរវាងក្រសួងរៀបចំដែនដី នគរូបនីយកម្ម និងសំណង់ ជាមួយនឹងធនាគារពិភពលោកនឹងមានទំនាក់ទំនងកាន់តែប្រសើរឡើង ពិសេសលើការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន ២ ដែលនឹងត្រៀមអនុវត្តក្នុងរយៈពេល ៥ ឆ្នាំ ដោយផ្តោតសំខាន់លើការចុះបញ្ជីចេញបណ្ណកម្មសិទ្ធិដីធ្លីជូនប្រជាពលរដ្ឋតាមកិច្ចសន្យាសម្បទានដីសង្គមកិច្ច ដែលស្របនឹងគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយឆន្ទៈខ្ពស់របស់ សម្តេចអគ្គមហាសេនាបតីតេជោ នាយករដ្ឋមន្ត្រី ព្រមទាំងការអនុវត្តផែនការសំខាន់ៗផ្សេងៗទៀត ពិសេសលើការសាងសង់ហេដ្ឋារចនាសម្ព័ន្ធ និងរៀបចំដីកសិកម្មដើម្បីទ្រទ្រង់ និងលើកកម្ពស់ជីវភាពរស់នៅរបស់ប្រជាពលរដ្ឋ ។ ឆ្លៀតក្នុងឱកាសនេះផងដែរ លោកស្រី Inguna Dobraja ក៏បានបង្ហាញនូវការតាំងចិត្តយ៉ាងមុតមាំក្នុងការសហការជាមួយក្រសួងរៀបចំដែនដី នគរូបនីយកម្ម និងសំណង់ និងស្ថាប័នពាក់ព័ន្ធដើម្បីសម្រេចឲ្យបាននូវភាពជោគជ័យសម្រាប់ជាគុណប្រយោជន៍ដល់ប្រជាពលរដ្ឋនៅមូលដ្ឋាន ក៏ដូចជាកិច្ចសហប្រតិបត្តិការរវាងកម្ពុជា និងធនាគារពិភពលោក ។ មុននឹងបញ្ជប់ ឯកឧត្តមទេសរដ្ឋមន្ត្រី ជា សុផារ៉ា ក៏បានជូនពរ លោក Alassane Sow និងសហការីទាំងអស់ឲ្យជួបនូវជោគជ័យក្នុងបេសកកម្មចុងក្រោយរបស់លោកក្នុងព្រះរាជាណាចក្រកម្ពុជា ទន្ទឹមនឹងនេះក្រសួងរៀបចំដែនដី នគរូបនីយកម្ម និងសំណង់ បាននិងកំពុងត្រៀមខ្លួនជានិច្ចក្នុងការធ្វើកិច្ចសហប្រតិបត្តិការជាមួយធនាគារពិភពលោក ។

កិច្ចប្រជុំបានបញ្ជប់នៅវេលាម៉ោង ១១ ១៥ នាទី នៅថ្ងៃខែឆ្នាំដដែល ក្នុងបរិយាកាសរីករាយ និងទទួលខុសត្រូវខ្ពស់ ៕