អនុស្សារណៈយោគយល់រវាងក្រសួងរៀបចំដែនដី នគរូបនីយកម្ម និងសំណង់ និងសហព័ន្ធសមាគមអ្នកច្បាប់ Shiho Shoshi នៃប្រទេសជប៉ុន

July 20, 2016

ព្រឹកថ្ងៃពុធ មួយរោច ខែអាសាឍ ឆ្នាំវក ព.ស.ពីរពាន់ប្រាំរយហុកសិប ត្រូវនឹងថ្ងៃទីម្ភៃ ខែកក្កដា គ.ស. ពីរពាន់ដប់ប្រាំមួយ វេលាម៉ោង ប្រាំបីនិងសាមសិបនាទី ឯកឧត្តម ឆាន់ សាផាន់ រដ្ឋលេខាធិការ និងជាតំណាង ឯកឧត្តម ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញជាអធិបតីក្នុងពិធីចុះអនុស្សារណៈយោគយល់រវាងក្រសួង រៀបចំដែនដី នគរូបនីយកម្ម និងសំណង់ និងសហព័ន្ធសមាគមអ្នកច្បាប់ Shiho Shoshi នៃប្រទេសជប៉ុន ។ ជាកិច្ចចាប់ផ្តើម ឯកឧត្តម ឆាន់ សាផាន់ ក្នុងនាម ឯកឧត្តមទេសរដ្ឋមន្ត្រី បានសំដែងការស្វាគមន៍ និងថ្លែងអំណរគុណយ៉ាងជ្រាលជ្រៅចំពោះកិច្ចសហប្រតិបត្តិការរបស់ សហព័ន្ធសមាគមអ្នកច្បាប់ Shiho Shoshi នៃប្រទេសជប៉ុនដែលបានយកចិត្តទុកដាក់ផ្តល់នូវជំនួយបច្ចេកទេស សម្រាប់ការអនុវត្តការចុះបញ្ជីអចលនទ្រព្យ ៣ ដំណាក់កាលកន្លងមកដោយជោគជ័យ ។ ជាការឆ្លើយតប លោក MIKAJIRI Kazuo ប្រធានសហព័ន្ធសមាគមអ្នកច្បាប់ Shiho Shoshi នៃប្រទេសជប៉ុន ក៏បានសំដែងការថ្លែងអំណរគុណចំពោះក្រសួងរៀបចំដែនដី នគរូបនីយកម្ម និងសំណង់ ដែលបានអនុញ្ញាតឲ្យសហព័ន្ធសមាគមអ្នកច្បាប់ Shiho Shoshi នៃប្រទេសជប៉ុនធ្វើកិច្ចសហប្រតិបត្តិការផ្តល់ជំនួយបច្ចេកទេស សម្រាប់ការអនុវត្តការចុះបញ្ជីអចលនទ្រព្យ ដែលតាមរយៈនេះសហព័ន្ធសមាគមអ្នកច្បាប់ Shiho Shoshi នៃប្រទេសជប៉ុនបានផ្លាស់ប្តូរបទពិសោធន៍ និងយល់ដឹងច្រើនអំពីច្បាប់នៅក្នុងព្រះរាជាណាចក្រកម្ពុជា ហើយតាមរយៈ លោកស្រី Emiko Kantake ទីប្រឹក្សាច្បាប់របស់សហព័ន្ធនឹងបន្តខិតខំប្រឹងប្រែងបន្ថែមទៀត ដើម្បីជួយរៀបចំតាក់តែងសេចក្តីច្បាប់នៅកម្ពុជា ឲ្យកាន់តែមានភាពល្អប្រសើរក្នុងការឈានចូលទីផ្សារអាស៊ាន ។ គួរបញ្ជាក់ផងដែរថាអនុស្សារណៈយោគយល់នេះ ត្រូវបានរៀបចំឡើងដើម្បីអនុវត្តជំនួយការបច្ចេកទេសសម្រាប់ការ អនុវត្តការចុះបញ្ជីអចលនទ្រព្យដំណាក់កាលទី ៤ ដែលនឹងត្រូវបញ្ជប់នៅដំណាច់ខែមិថុនា ឆ្នាំ ២០១៧ ខាងមុខនេះ ក្នុងគោលបំណងដើម្បីរួមចំណែកដល់ការចុះបញ្ជីដីធ្លីក្នុងព្រះរា ជាណាចក្រកម្ពុជាឲ្យបានត្រឹមត្រូវ និងអភិវឌ្ឍន៍សមត្ថភាពមន្ត្រីនៃក្រសួងរៀបចំដែនដី នគរូបនីយកម្ម និងសំណង់ ក្នុងការតាក់តែងសេចក្តីព្រាងច្បាប់ ពិសេសគឺការប្រឹក្សាយោបល់ផ្នែកច្បាប់ដើម្បីដោះស្រាយបញ្ហាដែលមាន ចំពោះមុខ និងនាពេលអនាគតដែលពាក់ព័ន្ធនឹងបញ្ហាច្បាប់សម្រាប់ការចុះបញ្ជី ដីធ្លី ។ ចុងបញ្ចប់ ឯកឧត្តម ឆាន់ សាផាន់ បានជូនពរលោក MIKAJIRI Kazuo ប្រធានសហព័ន្ធសមាគមអ្នកច្បាប់ Shiho Shoshi នៃប្រទេសជប៉ុន និងប្រតិភូទាំងអស់ ទទួលបានជោគជ័យក្នុងបេសកកម្មក្នុងព្រះរាជាណាចក្រកម្ពុជា ។

ពិធីចុះអនុស្សារណៈបានបញ្ចប់នៅវេលាម៉ោង ៩:១០ នាទីព្រឹកនៅថ្ងៃខែឆ្នាំដដែល ក្នុងបរិយាកាសរីករាយ និងស្និទស្នាល ៕