ឯកឧត្តម ទេព ធន អញ្ជើញបើកវគ្គផ្សព្វផ្សាយស្ដីពីការអនុវត្តប្រកាសរួមថ្មី ស្ដីពីការផ្ដល់សេវាសាធារណៈ និងការផ្ដល់ថវិការង្វាន់លើការគ្រប់គ្រង និងការប្រមូលចំណូលពីកម្រៃសេវាសាធារណៈ

August 21, 2017

វគ្គផ្សព្វផ្សាយស្ដីពីការអនុវត្តប្រកាសរួមថ្មី ស្ដីពីការផ្ដល់សេវាសាធារណៈ និងការផ្ដល់ថវិការង្វាន់លើការគ្រប់គ្រង និងការប្រមូលចំណូលពីកម្រៃសេវាសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ ក្រោមអធិបតីភាព ឯកឧត្តម ទេព ធន អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ នៅទីស្ដីការក្រសួង ថ្ងៃចន្ទ ១៤រោច ខែស្រាពណ៍ ឆ្នាំរកា ព.ស.២៥៦១ ត្រូវនឹងថ្ងៃទី ២១ ខែសីហា គ.ស. ២០១៧។

វគ្គផ្សព្វផ្សាយនេះ មានគោលបំណងផ្សព្វផ្សាយ និងដាក់ឱ្យអនុវត្តនូវប្រកាសរួមចំនួនពីរគឺ៖ ១. ប្រកាសរួមលេខ ៦៤៨ សហវ.ប្រក ចុះថ្ងៃទី០៧ ខែកក្កដា ឆ្នាំ២០១៧ ស្ដីពីការផ្ដល់សេវាសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ ២.ប្រកាសរួមលេខ ៦៤៩ សហវ.ប្រក ចុះថ្ងៃទី ០៧ ខែកក្កដា ឆ្នាំ២០១៧ ស្ដីពីការផ្ដល់ថវិការង្វាន់លើការគ្រប់គ្រង និងប្រមូលចំណូលពីកម្រៃសេវាសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ ដល់មន្រ្តីរាជការទាំងអស់របស់ក្រសួង ក៏ដូចជាមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី-ខេត្ត គ្រប់ការិយាល័យរៀបចំដែនដី នគរូបនីយកម្ម សំណង់ និងភូមិបាល ក្រុង-ស្រុក-ខណ្ឌ ដើម្បីធ្វើការផ្សព្វផ្សាយបន្តឱ្យបានទូលំទូលាយដល់គ្រប់អង្គភាព មន្រ្តីរាជការក្រោមឱវាទ និងប្រជាពលរដ្ឋក្នុងការចូលរួមអនុវត្តឱ្យមានប្រសិទ្ធិភាពចាប់ពីថ្ងៃទី ០១ ខែកញ្ញា ឆ្នាំ២០១៧ តទៅ។

ក្នុងឱកាសនោះ ឯកឧត្តម ទេព ធន មានប្រសាសន៍ថា ផ្អែកតាមតារាងឧបសម្ព័ន្ធនៃប្រកាសរួមថ្មី ដែលកំពុងធ្វើការផ្សព្វផ្សាយនេះ ឃើញថា ប្រភេទមុខសេវារបស់ក្រសួងទាំងក្នុងសមត្ថកិច្ចកណ្ដាល និងសមត្ថកិច្ចរបស់មន្ទីររៀបចំដែនដី នគរូបនីយកម្ម សំណង់ និងសុរិយោដី និងរដ្ឋបាលរាជធានី-ខេត្ត បានរហូតដល់ ៣៩៣មុខសេវា គឺមានការកើនឡើងចំនួន ២៣៩មុខសេវា បើធៀបទៅនឹងតារាងឧបសម្ព័ន្ធប្រកាសរួមលេខ ៩៩៥ ដែលមានត្រឹមតែ១៥៤មុខសេវាតែប៉ុណ្ណោះ ដោយមិនរាប់បញ្ចូលនូវមុខសេវាផ្ដល់លិខិតអនុញ្ញាតសាងសង់សំណង់ក្រោម ៥០០ម៉ែត្រក្រឡា ដែលអនុវត្តដោយច្រកចេញចូលតែមួយរបស់រដ្ឋបាលក្រុង ស្រុក ខណ្ឌ ដែលធ្វើប្រតិភូកម្មអំណាចរួចហើយនោះទេ។ ឯកឧត្តមបានបន្តថា ការផ្ដល់សេវាសាធារណៈបានល្អ មានប្រសិទ្ធភាព និងគុណភាព គឺជាការចូលរួមយ៉ាងសកម្មក្នុងការលើកស្ទួយកម្រិតជីវភាពរស់នៅរបស់ប្រជាពលរដ្ឋឱ្យបានល្អប្រសើរឡើង ដែលជាគោលបំណងរបស់រាជរដ្ឋាភិបាលក្នុងការកាត់បន្ថយភាពក្រីក្រ។ ដើម្បីសម្រេចគោលបំណងនេះ មន្រ្តីរាជការចាំបាច់ត្រូវប្រកាន់ភ្ជាប់នូវវិន័យ ការអនុវត្តភារកិច្ចតាមការកំណត់នៃច្បាប់ និងបទប្បញ្ញត្តិជាធរមាន ពិសេសច្បាប់ស្ដីពីសហលក្ខន្តិកៈ មន្រ្តីរាជការស៊ីវិល ។ រាល់ការបំពេញការងាររបស់ថ្នាក់លើ ដែលបានប្រគល់ភារកិច្ចត្រូវមានភាពអព្យាក្រឹត្យ ហើយមិនអនុញ្ញាតឱ្យប្រើប្រាស់មុខដំណែងរបស់ខ្លួន និងទ្រព្យសម្បត្តិរដ្ឋជាប្រយោជន៍ផ្ទាល់ខ្លួន ឬយកម៉ោងរដ្ឋបាលទៅប្រកបមុខរបរផ្ទាល់ខ្លួនឡើយ។ ឯកឧត្តមបានសង្កត់ធ្ងន់ថា ដើម្បីធានាប្រសិទ្ធិភាព តម្លាភាព គណនេយ្យភាព និងគោរពពេលវេលាកំណត់នៃការផ្ដល់សេវាសាធារណៈ ឆ្លើយតបបានទៅនឹងសំណូមពរ និងបំណងប្រាថ្នារបស់ប្រជាពលរដ្ឋ អ្នកផ្ដល់សេវាត្រូវអនុវត្តតាមគោលការណ៍ទាំង ៥ គឺ ១.គុណភាព៌ព័ត៌មាន ២.ភាពងាយស្រួលក្នុងការទទួលយកសេវា ៣.ភាពយកចិត្តទុកដាក់ក្នុងការទទួលប្រជាពលរដ្ឋ ៥.សេវាផ្ដល់តាមគោលការណ៍កំណត់ និងអភិបាលកិច្ចល្អ និង ៥. យន្តការព័ត៌មានត្រឡប់នឹងបណ្ដឹងរបស់ប្រជាពលរដ្ឋ៕