ក្រសួងស្នើមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី - ខេត្ត ត្រួតពិនិត្យឡើងវិញ តាមបណ្ដារោងចក្រ សហគ្រាស និងគ្រឹះស្ថាននានា ដែលកំពុងដំណើរការក្នុងភូមិសាស្រ្តរបស់ខ្លួន

August 25, 2017

កាលពីថ្ងៃទី ២០ ខែសីហា គ.ស.២០១៧ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានណែនាំឱ្យរៀបចំបង្កើតមណ្ឌលសុខភាព ឬមន្ទីរពេទ្យបង្អែកនៅជិតរោងចក្រ សហគ្រាស និង គ្រឹះស្ថាននានា ដើម្បីងាយស្រួលក្នុងការផ្ដល់សេវាកម្មថែទាំសុខភាពជូនកម្មករ និយោជិត ដែលបម្រើការងារក្នុងគ្រឹះស្ថានទាំង។ តាមស្មារតី និងក្របខណ្ឌការងាររៀបចំដែនដី នគរូបនីយកម្ម និងសំណង់ ក្រសួងសូមស្នើឱ្យលោកប្រធានមន្ទីរ រៀបចំដែនដី នគរូបនីយកម្ម សំណង់ និងសុរិយោដីរាជធានី - ខេត្ត ចាត់វិធានការ៖ ១/. ធ្វើការត្រួតពិនិត្យឡើងវិញ តាមបណ្ដារោងចក្រ សហគ្រាស និងគ្រឹះស្ថាននានា ដែលកំពុងដំណើរការក្នុងភូមិសាស្រ្តរបស់ខ្លួន ដើម្បីតម្រូវការឱ្យមានគិលានដ្ឋានអចិន្រ្តៃយ៍មួយក្នុងរោងចក្រ សហគ្រាស និងគ្រឹះស្ថានទាំងនោះ សម្រាប់ព្យាបាលកម្មករនិយោជិត ដែលមានជំងឺ ឬគ្រោះថ្នាក់ក្នុងពេលបម្រើការងារ ដោយសហការជាមួយមន្ទីរការងារ មន្ទីរសុខាភិបាល និងអាជ្ញាធរមូលដ្ឋាន។ ២/. ចំពោះការស្នើសុំសាងសង់ថ្មី ដូចជាអគាររោងចក្រ សហគ្រាស គ្រឹះស្ថាន ឬអគារសេវាកម្ម ដែលមានមនុស្សច្រើនបម្រើការងារ ត្រូវគូសបញ្ជាក់អំពីគិលានដ្ឋានអចិន្រ្តៃយ៍ នៅក្នុងគំនូសប្លង់ស្ថាបត្យកម្ម ស្នើសុំលិខិតអនុញ្ញាតសាងសង់ ឱ្យបានសមស្របតាមបទដ្ឋានបច្ចេកទេស និងបទដ្ឋានគតិយុត្តិនានាជាធរមាន៕