លោកជំទាវ ទិត្យ ច័ន្ទតារីន អញ្ជើញបើកសិក្ខាសាលាស្ដីពីការបញ្ជ្រាបយេនឌ័រ និងដីធ្លី ផ្សព្វផ្សាយអនុសញ្ញា ស៊ី-ដ ៥២ ចំណុច និងអនុសាសន៍ ៦ចំណុច របស់សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន និងភាពជាអ្នកដឹកនាំ

August 30, 2017

នៅថ្ងៃ ពុធ ៩កើត ខែភទ្របទ ឆ្នាំរកា ព.ស. ២៥៦១ ត្រូវនឹងថ្ងៃទី ៣០ ខែសីហា គ.ស. ២០១៧ លោកជំទាវ ទិត្យ ច័ន្ទតារីន អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអញ្ជើញបើកសិក្ខាសាលាស្ដីពីការបញ្ជ្រាបយេនឌ័រ និងដីធ្លី ផ្សព្វផ្សាយអនុសញ្ញា ស៊ី-ដ ៥២ ចំណុច និងអនុសាសន៍ ៦ចំណុច របស់សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន និងភាពជាអ្នកដឹកនាំ។

ក្នុងឱកាសនោះ លោកជំទាវ ទិត្យ ច័ន្ទតារីន មានប្រសាសន៍ថា សិក្ខាសាលារយៈពេល ០២ថ្ងៃនេះ ត្រូវបានរៀបចំឡើងដើម្បីផ្ដល់ឱកាសដល់ស្រ្តីបានស្វែងយល់ពីការដឹកនាំ និងគ្រប់គ្រងលើវិស័យដីធ្លី ការទំនាក់ទំនងសេវាសាធារណៈជាមួយប្រជាពលរដ្ឋ និងដៃគូអភិវឌ្ឍន៍ ដើម្បីទទួលបានបទពិសោធន៍ដែលអាចប្រើប្រាស់ប្រកបដោយប្រសិទ្ធភាព និងចីរភាព។ លោកជំទាវបានបន្តថា ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា ដែលបាននាំមកនូវសុខសន្ដិភាព ទើបមានការអភិវឌ្ឍន៍លើគ្រប់វិស័យ និងគ្រប់ទីកន្លែង ប្រជាពលរដ្ឋរស់នៅប្រកបដោយភាពសុខដុមរមនា ពិសេសស្ដ្រីបានរស់នៅជួបជុំគ្រួសារ និងមានឱកាសបន្តអភិវឌ្ឍសមត្ថភាពស្មើមុខស្មើមាត់ ស្មើសិទ្ធិ ទាំងក្នុងឆាកជាតិ និងអន្តរជាតិផងដែរ។ ប្រមុខរាជរដ្ឋាភិបាលកម្ពុជា បានខិតខំប្រឹងប្រែងលុបបំបាត់រាល់ទម្រង់វិសមភាពយេនឌ័រ និងការរើសអើងចំពោះស្រ្តីភេទ ព្រមទាំងធានាបាននូវការការពារសិទ្ធិ ការចូលរួមដោយពេញលេញ និងស្មើភាពរបស់ស្រ្តី ក្នុងការធ្វើសេចក្ដីសម្រេចនៅគ្រប់កម្រឹត ពង្រឹងយន្តការគណនេយ្យសមត្ថភាពយេនឌ័រគ្រប់វិស័យ។ ទន្ទឹមនេះ ក្រោមការដឹកនាំរបស់ ឯកឧត្តម ជា សុផារ៉ា ទេសរដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានយកចិត្តទុកដាក់មន្រ្តីរាជការជាស្រ្តី មិនត្រឹមតែការងារចំពោះមុខតែប៉ុណ្ណោះទេ គឺគិតដល់យុទ្ធសាស្រ្តសម្រាប់ភាពស្ថិតស្ថេរយូរអង្វែងថែមទៀត។ ផែនការយុទ្ធសាស្រ្តបញ្ជា្របយេនឌ័រ ក្នុងស្ថាប័នក្រសួងក៏ដូចជាក្នុងវិស័យដីធ្លី ដែលស្ថិតក្នុងសមត្ថកិច្ចរបស់ខ្លួន ដើម្បីឆ្លើយតបយ៉ាងពិតប្រាកដទៅនឹងចក្ខុវិស័យរួម ដែលបានកំណត់ក្នុងគោលនយោបាយដីធ្លីរបស់រាជរដ្ឋាភិបាល ដែលបានរៀបចំឡើងដោយមានការត្រួតពិនិត្យ វាយតម្លៃការអនុវត្តច្បាស់លាស់រៀងរាល់ដំណាច់ឆ្នាំដូចវិស័យផ្សេងៗទៀតផងដែរ។ លោកជំទាវបានមានប្រសាសន៍បន្ថែមថាដោយគោរពតាមអនុសាសន៍ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលមាន ៥ចំណុច ក្នុងការបញ្រ្ជាបយេនឌ័រ ដើម្បីលើកកម្ពស់ស្រ្តី គឺ៖ ១). បង្កើតការយល់ដឹង និងការវិភាគយេនឌ័រ ដល់ក្រុមការងារយេនឌ័រ និងថ្នាក់ដឹកនាំគ្រប់ស្ថាប័ន ២). បង្កើតចំនួនមន្រ្តីរាជការជាស្រ្តី ក្នុងក្រសួង-ស្ថាប័ន ៣). បង្កើតសមត្ថភាពចូលរួមរបស់មន្រ្តីរាជការស៊ីវិលជាស្រ្តី និងបណ្ដុះបណ្ដាលតម្រង់ទិសដល់មន្រ្តីរាជការស៊ីវិលក្របខណ្ឌថ្មីដែលទើបប្រឡងជាប់ ៤). បញ្ជ្រាបយេនឌ័រ នៅក្នុងកម្មវិធីកំណែទម្រង់រដ្ឋបាលសាធារណៈគ្រប់ស្ថាប័ន និង ៥). ផ្ដល់ឱកាសឱ្យមន្រ្តីនារី ទទួលបាននូវតួនាទី ធ្វើ់សេចក្ដីសម្រេចចិត្ត និងបង្កើនភាពអង់អាច៕